¹ Mutegherere kunando dhi, amwe mwangongombe dhomuBashani, amwe mudi mudirundu dyaSamariya, amwe mwa nyandeka hahepwe, amwe mwapumura hakakunyanda, amwe mwatumanga hatutughughuru wenu eshi, ''Muturetere yinwa.'' ² Fumu Nyambi ne ghaneghedhera paghupongoki wendi, ''Mumone, mayuwa mbo gha neya papenu apa mbo ha mushimba nomarovo, amwe ghokumanuthera ne nomarovo ghokuroveritha thi. ³ Mbo muna shwaghera pamatju ghodikuma dyomumbara, keye yu ghopapenu nanyi gha kupiteremo, no nanyi ghakumushwayithemo mupirukere kuHaramoni- oyi ne yo gha ghamba Nyambi. ⁴ Muyende kuBeteli ne ghomukaharure, ku Giligati no ghomukawedherere maharwero, muretange miyambo dhenu kehe mathiku-thiku, thofotji kudikumi thenu kehe kughutho ghomayuwa mahatu. ⁵ Mutape muyambo dhondangi noghuroto; muyuvithe miyambo dhoghuhima; muyighambe, oyi ne kumuhafitha mwe, amwe mwanu waIsragheli- oyi ne yo gha ghamba fumu Nyambi. ⁶ Namupire mayegho ghomakenu mumambara ghenu ghomahe no napirithire ghuroto mumango ghenu ghomahe. Ene shime mbadi mwahuka kukwange- oyi ne yo gha ghamba Nyambi. ⁷ Mbadi na murokithere mvura oku tughonda tuhatu tuna thiyarako kukukesha. Na ningithire ngenyu gharokere mumbara dhofotji, no kutenda eshi mbadi gharokere mumbara dhimwe. Gharokire padyango dimwe, ene opo padyango ghapirere koroka ne pakukutire. ⁸ Mambara mawadi endi mahatu ghakokanine kumbara dhimwe ghakanwe kumeyu, ene mbadi hakarakire. Shime mbadi mwahuka kukwange- oyi ne yo gha ghamba Nyambi. ⁹ Nayipithire yimena yenu. Thingi yoyikwinino yenu, mapya ghovinyu, yitondo yenu yoghukuyu, no yitondo yenu yondhwe- mbathi-mbathi thayidire yoyihe. Ene shimwe mbadi mwa huka kukwange- oyi ne yo gha ghamba Nyambi. ¹⁰ Na tumine thinyandekitha papenu yira kenge pawaEgiptena. Na payire matjaha ghenu nodimende, nashimbire tukambe twenu, natendithire munuko ghodyango dyenu wiye kumayuru ghenu. Ene shime mbadi mwapiruka kukwange- oyi ne yo gha ghamba Nyambi. ¹¹ Nawithire mambara ghomukatji kenu, thika kenge ghawithire Nyambi Sodomu naGomora. Amwe mwakarire yira katondo komudiro ka hana shimbi pamudiro. Ene shime mbadi mwapiruka kukwange- oyi ne yo gha ghamba Nyambi. ¹² Podiyo keho nanyi nakutende yinu yoyimango kukoye, Isragheli; no yoyishi nanyi nakutende yinu yoyimango kukoye, kuroyithere wakawane Nyambi ghoye, Isragheli! ¹³ Kenge, oyu ghatenda marundu ne yoghatenda karo mupepo, ghahokora yighayara yendi kwawanu, ghatenda mathiku-thiku dikokore, ghayenda pamango ghokuyeyeka ghomakaye. Nyambi, Fumu wawamashurundate ghomudiwiru, ne dyodina dyendi.''