¹ Muyuve nando dhi ghana ghamba kukwenu Nyambi, hanu waIsragheli, dhi nemanganyena diko dyodihe di na shwayithire muEgiptena: ² ''Yamwe ngenyu natorora kutunderera kumako ghomahe ghomukaye. Podiyo keho nanyi nimuhumbithe kumaharwero ghenu ghomahe.'' ³ Kukona hanu hawana kuyenda pofotji ngeshi mbadi hana yi kuyuvu? ⁴ Kukona nyime kuvuma mumuthitu ngeshi mbadiko thi ghana mono? Kukona nyimeghana ghashwaye mudikwina dyendi ngeshi mbadiko thi ghana kwata? ⁵ Kukona thinyunyi thirwe muthiraha pamuve ngeshi mbadiko thiraha thi hana thi teyi? Kukona thiraha thishwaye mumuve ngeshi mbadi thina kwata kehe thino? ⁶ Ngeshi torombita ha ghamba mumbara, mbadi sho ha tutume hanu? Ngeshi runyando rungene mumbara, mbadi Nyambi ghana rutumu? ⁷ Yashemwa Fumu Nyambi ne mbadiko eyi gha kutenda shimengwa ghana neghedha yighayara yendi kwawapikendi haporofeta. ⁸ Nyime ne ghana vumu; yidye shoghapire kuyapa? Fumu Nyambi ne ghana ghamba; yidye shoghapire kuporofeta? ⁹ Yuvithe yi mumango ghokukunga thikuma ghaAshidodi, nomumango ghokukunga thiwana ghomuEgiptena; ghambe eshi, ''Mukupongeke mwathinda pamarundu ghaSamariya no mumone eshi mayongarero munye ghomakuru ghadi mumwendi. ¹⁰ Awo mbadi ha dimuka eshi ngepi ghokutenda ghuhunga- Oyi ne yogha ghamba Nyambi- Awo kupungura yinu yi hedha mungcamu kwawamwe mumango ghawo. ¹¹ Oyi keho ne yo ghana kughamba Fumu Nyambi: ''Munyathi mbo ghana dhingumwetwedha dyango dyenu, mbo ghana with maghundhi ghenu ghongcamu no kuharanganya mango ghenu gha mwakunga thiwana.'' ¹² Oyi ne yo gha ghamba Nyambi: ''Thika kenge mudithi ghondjwi gha ghamwena ngeshi maghuru mukanwa konyime, endi ditwi dyofotji; no hanu waIsragheli wa hatunga muSamariya kemo dyombo hawaghamwena; mbo hana wa thiyerera ngenyu no dishonga dyothipura endi ghudidi ghokutjoka. ¹³ Muyuve ndani ghomushupe wimanganyena ndhugho dhaYakopu- oyi ne yighamba yaFumu Nyambi, Nyambi ghomashurundate ghomudiwiru: ¹⁴ ''Mudiyuwa di nakuhumbitha maharwero ghaIsragheli, nanyi nakuhumbithe no yinyaku yaBeteli. Manyiha ghothinyaku ne mbo ghana pu kughateta no kuwa pamuve. ¹⁵ Mbona yipitha ndhugho dhoditenya nondhugho dhopakufu. Ndhugho dhomayegho ghomayama ghomakuru mbodhina ghu, nomandhugho ghomakuru mbo ghana dhingunuko- oyi ne yo gha ghamba Nyambi.''