¹ Na monine Fumu gha nemana kumbadi dhothinyaku, no gha ghambire eshi, ''Pumure kuwiru dhomaghundhi podiyo eshi matatekero ghawo ne gha kashe. Mutetaghure maghundhi podiyo eshi tembeli dhiwere hanu wahe no kuwa pagha, no nanyi nitume munyathi ghakapaye hokuthiyarako. No yo fotji temba sho gha pare, no yo fotji temba sho gha tjire. ² Ngambi hatjirere kudikunga dyawafu, nyara dhange nanyi dhakawashimbe ko. Ngeshi hadhine kudiwiru, nanyi nakawaghurumune. ³ Ngambi haka kunde pawiru dhodirunda dyaKarameli, nanyi nakawashane nokawawana. Ngambi hakuyereke kuyenda kwishi dhodikuruviya, oko nanyi na katape marawero kudiyoka, no nanyi dyakawa hume. ⁴ Ngambi ha kuwa kwate hanyathi nokuwa thiyeneka hayende kumatunga ghamwe, oko nanyi nakatendithe hanyathi wawo hawapaye. Nanyi na kuwa kengerere thiwana no kukoneka eshi yinu ngenyu yoyimango sho yi wa hokokere no mbadi yo yiwa.'' ⁵ Fumu Nyambi wawamashurundate ghomuwiru gha kwata kaye no kuyenyumuka; wahe awa ha tunga mokuguva; kokahe nanyi ka kuyeyuke yira rware, no kuvera karo yira rware rwaEgiptena. ⁶ Yodiye gha tenda mbara dhendi mudiwiru, no gha tenda wiru dhi kare yira thikavitho thopakaye. Gha shimba meyu ghomudikuruviya nokughatenda gharoke pakaye, Nyambi ne dina dyendi. ⁷ ''Mbadi yira hanu homuKushi kukwange mwe, mwanu ghomuIsragheli- oyi ne yo gha ghamba Nyambi- mbadi na shwayithire Isragheli muEgiptena me, haFilistine kutunderera kuKerete, no haArameyane kutunderera kuKiri? ⁸ Mumone, Ame Fumu Nyambi ne na mona eshi hanu hoghufumu ghu ne hanu ho maharwero, nanyi na kahanyaghurepo ghufumu ghu, ene mbadi nakuhanyawerera po haka kakoghatji kaYakopu- oyi ne yo gha ghamba Nyambi. ⁹ Mumone, nanyi na kuraghure, no nanyi na kunyunge hanu homuIsragheli mukatji komako ghomahe, thika kenge ghumwe gha tjipanga mbuto patjipa, podiyo eshi mbadiko kawe kokambiru aka ka kuwa pamuve. ¹⁰ Hanyathi nanyi ha kupaye haharweri ho hanu wange, awa ha ghamba eshi, 'Yinyanda ne mbadi yakuna tuwana endi kuna tupitakana.' ¹¹ Poruya ruvedhe, ghufumu waDavita ne nanyi wakukare yira tende yu ghana ghu, ene nayi nakughuyeyure karo, no nanyi nakutendurure makuma wagho. Nanyi na kughutendurure no kughutenda ghutanare yira pashakare, ¹² podiyo eshi hakushimbe dyango dyaEdomu di dyathiyarako, no mako ghomahe agha gha karire ghange- oyi ne yogha ghamba Nyambi- gha yi tenda. ¹³ Mumone, nanyi gha kwiye mayuwa- oyi ne yo gha ghamba Nyambi- apa mbo ha pitakana hakakupurura hakakukesha, no hakakukokora mandjembere nanyi ha kupitakane awa haka kukuni mbuto. marundu ghanyi gha kundoke novinyu ghomutowi, no mandundu ghomahe. ¹⁴ Nanyi nakahuthe hanu wange hakaIsragheli kumatunga ghokayenda. nanyi ghakunatende mambara agha gha yipa no kuna tunga mo, nanyi ghakuna kune mapya ghovinyu no nanyi ha kumunwe vinyu wapo, nanyi ha kutende yikwinino no kudya mbuto dhayo. ¹⁵ Nanyi nakuwa kune muditunga dyawo, ndani mbadi mbo hawa dhura mo mudinga di nawapa,'' gha ghamba Nyambi gho Nyambi wenu.