¹ Mwahakwa, thika edi tudi no gha makuruperitho, ninge tu kukushure twathinda kuyoyihe eyi ya haruritha yirama nomupepo wetu. Ninge tu kuthe ghupongoki no mayapero ghaNyambi. ² Mututendere dyango! Mbadiko yu twaharwera endi kudhundeka kehe yuno. ³ Eyi ne mbadi mukumu tetera ndhango pakughamba yinu yi. Namana kuyimutongwera kare eshi amwene mumitjima dhetu mwakara, kukwetu mukufa pofotji no kupara pofotji. ⁴ Ni di no makurupero ghomakuru mumwenu, no yitanaghura yange yoyikuru kukwenu. Nayara no yihengaghura. Nayara no yishamberera ngambi mukehe ghano maghukuktu ghetu. ⁵ Apa tweyire muMesedoniya, yirama yetu mbadi ya turumuthire. Ene, twomapire mukehe ndhira kuyita yopanunda nowoma gho mwimi. ⁶ Ene Nyambi, oyu gha hengaghura awa hana kasha, gha tu hengaghure pamwiyero waTitusi. ⁷ Mbadi pamwiyero wendi ngenyu gha tu hengaghure Nyambi. Ene no pamahengawero agha gha wanine Titusi kukwenu. Gha tutongwere yodirura dyenu dyodikuru, yinyanda yenu, no thinga thenu thothikuru kukwange. Po na shambererire keho thikuma. ⁸ Ngambi kenge mbapira dhange dhamukashithire, mbadi na kuyikwera. Ene na yi kwerire apa na monine eshi mbapira dhange ne dha mukashithire, ngambi kenge eshi pakanakoghana ngenyu. ⁹ Pano ne nashamberera, mbadi yoyishi mwakashire, ene yoyishi yikasha yenu ne yamu retere mapirukero. Mwa kuwanekere no yikasha yaNyambi, mwa nyandire no mbadiko ethi mwa yongarithire pamurandu wetu. ¹⁰ Yikasha yomwaNyambi ayo kureta mapirukero agha twaranga kumaghamweno gho kupira kukwera. Yikasha yo mukaye, ayo, kureta yifa. ¹¹ Mumone mangcamu gho ngepi yikasha yomwaNyambi ghareta mwenu. No ngepi ghukuru gho yirughana mumwenu mukumu neghedha eshi amwene mwadhira murandu. Ngepi ghukuru gho ghupata, woma wenu, dirura dyenu, no yikuyuva yenu noyihima yenu mukumona eshi ngepi edi ghuhungami ne haghutende! Muyoyihe yi mwa neghedha eshi amwene mbadiko murandu kuyinu yi. ¹² Ngambi kenge na mutjangere, mbadi na yi mutjangere pamurandu gho yitenda yenu yoyimango, endi ghumwe gha nyandire paghuyi, ene ghuwa wenu gho kukwetu ghupwe kudimuka kurupara rwaNyambi. ¹³ Payinu yi potuna pwera kutjokedha. Kuwedhera kuma hengawero ghetu, twa shambeghere karo thikuma pamurandu gho yishamberera yaTitus, yoyishi mupepo wendi wapwire kukushukitha kukwenu mwahe. ¹⁴ Ngo na kununekire kwendi kuhatera mwe, ngo mbadi mwa ni fithire honyi. Ngambi kenge, dyo di ya karire eshi yoyihe eyi twa mutongwere ne yashemwa, yi kutanaghura yetu yo kwa Titus ne ya kuneyire eshi ghushemwa. ¹⁵ Ruhakitho rwendi rokukwenu ne rukuru shemwa dyodi ghana kuvuruka ghutawedhi wenu mwahe, edi mwana mutambure nowoma no kututuma. ¹⁶ Nashamberera yoyishi nidi no ghudhughutjima mumwenu.