¹ Tuna shana mudimuka, mwahakwa, thineke thaNyambi ethi gha tapire kumangirishe ghomu Masedoniya. ² Muruvedhe romayerekero ghoyinyanda yoyikuru, thingi tho yishamberera yawo no ghuhura ghoyinyanda yawo yaretire ghutungi ghushokuru mughutapi wagho. ³ Podigho hakumutongwera eshi hatapire thikuma dyodi ghakarire, noghawedhererire noyi gha konine, nopayihima yagho, ⁴ hatukumberire thikuma mughuwa gho kukuyarekera muthirughana tho hanu ho kupongoka waNyambi. ⁵ Eyi ne mbadi ya hokokire dyodi twa yikuruperire, ene hatangire kukutapa hathinda kwaFumu no kukwetu pamahimeno ghaNyambi. ⁶ Twa tjokedhire Titusi, oyu gha tangire ethi thirughana, mukuyimanitha papenu yirughana yothineke. ⁷ Ene mwe mwakara muyinu yoyihe- mumatawero, muyighamba, mughudimuki, nomumakonekitho, nomuruhakitho rokukwetu. Muninge karo eshi muvure muyirughana yothineke. ⁸ Kuna kughamba yi ene mbadi marawero. Podigho, na kughamba yinu yi mukuyereka ghushemwa ghoruhakitho rwenu mukuyipakerera muyihima yo hanu hamwe. ⁹ Amwe mwa dimuka thineke tha Hekudyetu Jesusi Kristusi. Ngambi kenge gha karire mutungi, gha karire muhepwe pamurando wenu, kupitera mughuhepwe wendi amwe mwa kona kukara mwatungi. ¹⁰ Apano kuna kumupa matjokedhero ogha sho gha mughamwene. Mwaka ghofotji ghuya nga ghupu, mbadi mwa konine ngenyu kutenda yinu, ene mwahimine mukuyitenda. ¹¹ No muyimanithe. Thika dyodi pakarire ghuhima no ruhakitho rokuyitenda, ninge namwe myirete kumamanithero, kukutha edi mwa kuyikona. ¹² Ngeshi kuna kumukumbera mukutenda ghuwa, ayo ne yiwa no ghayitambura. Yakona kurikanya koyi ghawana munu, ene mbadi poyi ghapira kuwana. ¹³ Ene yine mbadi ghuredhu kwawamweya noyinyanda kukwenu. Ene pakara noghufwiki temba. ¹⁴ Wingi wenu poruno ruvedhe mbo ghana yitapa mbo hanyanda. No karo eshi muwingi wayo nanyi mwakuwane eyi mwakunyanda, nombo pakare kupira ghufwiki. ¹⁵ Yapwa kutjanga: ''Oyu ghadi noyoyingi ghana kuthighara nyara-nyara, noyu ghadi noyoyipu mbadiko eyi ghanyandire.'' ¹⁶ Ene matumero kwaNyambi, oyu gha turire mumutjima waTitusi ghushemwa ghothinga nenu nidi kukwenu. ¹⁷ Ene mbadi gha tamburire ngenyu yikumbera yetu, ene gha karire noghushemwa gho kuhamenako. Gheyire kukwenu nomahimeno ghendi gho kukushuka. ¹⁸ Pofotji nendi twa tumine karo muyendhendi oyu ha tanaghura mumangirishe ghomahe kuyirughana yendi yo kuyuvitha mbudhi. ¹⁹ Ene mbadi yoyi pithako, ene hamu tororire mumambunga mukukara muyendha gho kuyenda nendi nothirughana thothineke. Agha ghayuvithire kukwetu padifumanekero dyaFumu yithinda noyihima yetu yoyiwa yokughamwena. ²⁰ Kotwa kushwena makoneno eshi kehe yuno gha kone kushivana yo kuhatera kughukaro ghoghutapi oghu tuna kushimba. ²¹ Twa kara nothinga mukurughana yoyiwa, mbadi kughutho waFumu pithako, ene kughutho wahanu. ²² Kotuna kutuma karo muyendha ghumweya nawo. Rwingi twa muyerekire mumandhira ghomengi notwa monine ghutoghoro gho yirughana yendi mumandhira ghomengi. Aye gha yitokomena thikuma pamurandu ghoghudhughutjima ghoghukuru oghu ghakara nawo mwenu. ²³ KwaTitusi, aye muyendhange nomukuthi gho murughani wenu. Kwawayendhetu, awo ne hatumi homangirishe. Awo ne fumwa dhaKristusi. ²⁴ Podigho, wa neghedhe ruhakitho, no kuneye kumangirishe thitambo thetu tho kukutanaghura kuhatera kukoye.