¹ Kurughana pofotji nedi, karo kuna kumukumbera eshi mbadi mutambure thineke thaNyambi nyara-nyara. ² Aye ngeno ghana kughamba eshi, ''Munako dhodhihunga na kuyuvire, nomudi yuwa dyo makomweneno na kughamwenine.'' Mone, nako dhino ne dhihunga. Mone, dyaro ne diyuwa dyo makomweneno. ³ Mbadi tuna tura thiginditho kughutho waghumweya, mbadi tuna shana eshi yirughana yetu yakupire mudyo. ⁴ Tunongonone twathinda kuyikara yetu, eshi atwe twapika Nyambi. Atwe twa pikendi mughudhughutjima, muyinyanda, muyikudhekera, kurughana thikuma, ⁵ kumupumura, kumutura makashitiko, muyirughana yoyikukutu, mbadi wa kurara thiwana turo, mumandhara, ⁶ mughukushuki, pamaghano, mukudhidhimeka, mughuhunga, mwaMupepo ghoKupongoka, muruhakitho ro kuyarerera. ⁷ Atwe twa pikendi mumanando nomughushemwa, mumangcamu ghaFumu Nyambi. Twakara nothirwitha thoghuhunga kudyoko dyorudyo nodyo rumoho. ⁸ Atwe kurughana mufuma nomudishamu, mukumangopitha nomukukugha, yira hapemukithi, ene twaka ghushemwa. ⁹ Twa rughana yira mbadi ha tudimuka ene shime ha tu dimuka thiwana. Twa rughana yira hafu ene- mone- shime ghatupara. Kotuna kurughana yira kuna kutuhumbitha kuyitenda yetu ene mbadi ha tu pangwera kuyifa. ¹⁰ Atwe kurughana yira twa tokota, ene twa kara no yishamberera kuroruheya. Atwe kurughana yira twa ka kunyanda, ene twatenda hohengi hatungi. Atwe kurughana yira mbadiko eyi twawana, ene twawana yinu yoyiheya. ¹¹ Twamana kughamba ghushemwa ghoghuhe kukwenu, haKorinte, nomitjima dhetu dhayandhuruka thikuma. ¹² No mbadi twa mudhindire, ene mwakudhinda mwathinda mumitjima dhenu. ¹³ Mukughamba ghushemwa- kuna kughamba yira kohanuke- mukuyandhurure mwathinda karo. ¹⁴ Mbadi mukukureke djoko dhofotji nawayiharuri. Ngepi edi gho kukara ghundambo pakatji kamukushuki nathiharuri? ¹⁵ No ngepi edi gho kukara ghundambo pakatji ko thishe nodikokore? Yikuyuva yongepi yo kukara pakatji kaKristusi naBeliya? Endi yikutapera munye yakara pakatji kamutawi nowa hakakupira kutawa? ¹⁶ Nomakuyuvero munye gho kukara pakatji ko tembeli waNyambi? Atwe twa tembeli waNyambi ghomuyumi, thika kenge gha ghamba Nyambi eshi: ''Nanyi na kukare mumwagho no kuyenda nawo. Nanyi na kukare noNyambi wawo, no mbo hana kara hanu wange.'' ¹⁷ Podigho keho, ''Mutunde mumwawo, nomukukarere pithenu,'' Dyo ghana kughamba Nyambi. ''Mbadi mukwate kehe thino tho kunyata, no nanyi ni mutambure. ¹⁸ No nanyi na kukare nowihenu, no namwe mwa kukare mwahanange nawanage hohakamadi,'' Dyo ghana kughamba Fumu ghomukamangcamu.