¹ Ndjwighona opo yatjolire yipaturure likumba lya Utano-na uviri, makura muliwiru amu mwena teete ghure wa ghukahe wa shirugho sha viri. ² Makura ame anumono va Engeli vatano-na vaviri vana yimana kumeho ya Karunga, vavo kuna kuvapa marumbendo matano-na maviri. ³ Makura mu Engeli umwe aya, ayimane kushidjambero, ghuye ana kwaterere shisha sha ngorodo shakutumunukita vitutumukitira muti. Makura ava mupa vitutumukita vya lidumba lyaliwa vya viyingi unene avi djambere kumwe na ndapero dava pongoki pa shidjambero oshi sha kuvyuko na shipundi sha uhompa. ⁴ Makura muti wa lidumba lyaliwa-kumwe na ndapero da vapongoki- adi kanduka ditunde mumaghoko ghamu Engeli ghayende kwa Karunga. ⁵ Mu Engeli makura aghupu shisha shakututumukitira makura ashi yuda mundiro wa kushidjambero. makura ashi vhukumini pa livhu, ashi yakutoghona palivhu na kundunduma yira mvhura, na dimutaku, na maruvadi ghakuvema, ntani nalikankamo livhu. ⁶ Makura va Engeli ovo vakwatiliro marumbendo matano-na maviri ava kuwapayikiri muku ghaveta. ⁷ Mu Engeli wa kuhova ashivi rumbendo rwendi, makura mvhura ya mawe na mundiro wakuku runga-runga na honde. Makura ava vivhukumini pantunda ya livhu, shi utatu sha livhu makura alipi na kurokota, ntani shi utatu sha vitondo na vimenwa avi rokotapo, ntani mushoni na untje wa uteke aghurokotapo. Matjangwa ghamwe kuna kutanta ashi, shi utatu shavininke navintje vyapa ntunda ya livhu avirokotapo. ⁸ Mu Engeli wa uviri ashivi rumbendo rwendi, makura vya kufana yira ndundu yayinene ya kutwera mundiro ava yivhukumini mulifuta. Makura shi utatu sha mema ghalifuta agha kushintumuka akare honde, ⁹ makura shi utatu shavinamonyo vya mulifuta avi fu, ntani shi utatu sha vikepa avidjonauka avidama. ¹⁰ Mu Engeli wa utatu ashivi rumbendo rwendi, makura ntungwedi yayinene ayi were pa livhu, ya kutwera unene yira ramba, yayo ayiwere pa shi utatu sha vidiva na mudimukuro da mema. ¹¹ Yino mbungururu lidina lyayo ne Ushungu. Makura shi utatu sha mema aghakara Ushungu, makura vantu opo vanwine mema ava fu kumema gha Ushungu. ¹² Mu Engeli wa Une ashivi rumbendo rwendi, shi utatu sha nkondo da liyuva, shi utatu sha nkondo da kakwedi ntani shi utatu sha nkondo da ntunguru adi tunduko. Navintje vitatu avi kombanita shite makura akukara likuru ndema; liyuva, na kakwedi ntani na ntunguru navntje vitau kapi vya vhulire kutapa ukenu makura aku kara likuru ndema. ¹³ Ame anumono, ntani anu yuvhu likuvi; matjangwa ghamwe kuna kutanta mu Engeli, kuna kutuka pawiru-wiru kuna kughamba na liywi lya linene ashi, '' ogho ana hupoko ogho ngava shiva vano va Engeli vatatu.''