¹ Kunyima makura anumono vaEngeli vane vana yimana kuma kovhu ghahuka ne namu udjuni, vavo kuna kwaterere mpepo ne da pantunda ya livhu mposhi yipire kupepumuka yiyende pantunda ya livhu, ndi mulifuta, ndi kuvitondo. ² Makura ame anumono mu Engeli kuna kutundilira ku Upumeyuva, ghuye ana kwaterere makumba ayature viyivito vya Karunga muna monyo. ³ Ghuye ayiyiri na liywi lyalinene atantere va Engeli vane ovo apire Karunga nkondo va djonaure livhu, ndi mema ghalifuta, ndi vitondo dogoro ngatu mane kupata na kutura viyivito pa vipara vya vakareli va Karunga. ⁴ Ame makura anu yuvhu shivaro shavo vatulire viyivito: Vavo kwatulire viyivito pava vakutika mayovi lifere dimurongo ne na ne gha vantu vadimuhoko da Israeli: ⁵ Va mulira lya va Juda ovo vatulire viyivito kwahulire pa mayovi murongo na vaviri; va mulira lya Rubeni mayovi murongo na maviri, ⁶ va mulira lya Gabi mayovi murongo na maviri, va mulira lyava Nafutali mayovi murongo na maviri, va mulira lya Manase mayovi murongo na maviri, ⁷ Va mulira lya Simiyoni mayovi murongo na maviri, va mulira lya Levi mayovi murongo na maviri, va mulira lya Isaskali mayovi murongo na maviri, ⁸ va mulira lya Sebuloni mayovi murongo na maviri, va mulira lya Josef mayovi murongo na maviri, ntani va mulira lya Benyameni mayovi murongo na maviri mbo vatulire viyivito. ⁹ Kunyima ya vino makura amono, mbunga yayinene ya kupira kuvhura kuvarura-vavo kwatundilira kudimuhoko nadintjer, ku maliraka naghantje-vavo vana yimana kumeho ya shipundi sha Uhompa ntani na kumeho ya ndjwighona. Vavo kuna dwata marwakani gha makenu ntani vana kwaterere makushuvare mumaghoko ghavo, ¹⁰ vavo kuna kuyiyira unene na liywi lya linene ashi: ''Hompa Karunga wetu, ogho ashingiro ku shipundi sha uhompa, kumwe na ndjwighona kwa kara nkondo dakuyoghora monyo detu da liparu lya naruntje!'' ¹¹ Va Engeli navantje kwayimanine va kundurukite shipundi sha uhompa kumwe na matimbi kumwe navina monyo vine, makura ava tongamene kumeho ya shipundi sha uhompa. Vavo ava tanga Karunga, ¹² kumwe nakutanta ashi, ''Amen! lishamberero, na lifumano, na lipangero, ntani na nkondo nadintje da Karunga wetu wa naruntje na naruntje! Amen! ¹³ Litimbi limwe aliya kukwande lipure ashi, ''Vare vano, vana dwato marwakani gha makenu, ntani kuni vanakutunda?'' ¹⁴ Ame anu limburura ashi, ''Mukalikuto , ovyo ove wa kuvhura kuviyiva,'' Ghuye antantere ashi, ''Ovano mbovo vapito mumahepekeko na mumaghudito ghamanene ghunene. Vano mbovo vakusho vyuma vyavo mbyo vavikushita vikare vya vikenu na honde ya ndjwighona. ¹⁵ Mukonda yino, mbyo vanaya yimanene kushipundi sha uhompa sha Karunga, vakanderere matiku na mwi muntembeli yendi. Ano ngoli oghuno ashingiro kushipundi sha uhompa ghuye mbyo avatura mulivhango lyendi ava popere. ¹⁶ Vavo kapi nka ngava fa ndjara nalinota. Kapi nka ngava yuvha upyu washite shaliyuva ashi ngashishore marutu ghavo. ¹⁷ Mukondashi ndjwighona ndjo yina karopo pakatji kashipundi sha uhompa ndjo ngayi karo mukungi wavo, ndjo ngayi vatwaro kumukuro wa mema ghamonyo, Karunga ngakokota maruntjodi ghavo naghantje kushipara.''