¹ Opo vya pwire vino makura anu yuvhu liywi lyalinene lya mbunga yayinene ya muliwiru kuna kughamba ashi, ''Shambererenu Hompa. Liparu, na uyerere na nkondo vya Karunga wetu. ² Mbyovyoshi mpanguro dendi mu ushili ntani kwa hungama, ghuye kuna pangura uno mukadi wa rushonda omo adjonaura udjuni mudima na rushonda rwendi rwa runene. Karunga ana muvyuta rughoko mukondashi ghuye adapaya va kareli vendi.'' ³ Makura mbunga ayi ghamba nka rwa uviri ashi: ''Shambererenu Hompa! mbyovyoshi muti wa shitata shashinene kapi nga ushaya kututumuka pa rutu rwendi.'' ⁴ Makura matimbi dimurongo mbiri na ne kumwe navi namonyo vine avi kugandere pa livhu vitongamene Karunga, ogho ashungiro kushipundi sha Uhompa. Ava ghamba ashi, ''Amen, Shambererenu Hompa!'' ⁵ Makura kushipundi sha Uhompa akutundu liywi lina kutanto ashi, ''Pandurenu Karunga wetu, anwe vakareli vendi namuvantje kumwe nanwe mwa mutjiliro, mukare va vadidi ndi vavanene.'' ⁶ Ame makura anu yuvhu nka maywi ghamanene gha kufana yira mbunga yayinenen, ghakupupira yira mema gha yingi unenen, ghakufana yira shindundumo sha mvhura yayinene ya maruvadi, kuna kughamba ashi, ''Shambererenu Hompa! mbyovyoshi Hompa Karunga wetu, wa nkondo nadintje, ana kara ngoi mupangeli. ⁷ Tuhafenu kumwe na kupembura tutape mpandu kukwendi! Mbyovyoshi shipito sha likwareko lya ndjwighona shina tikimo, mufuko wendi ana kuwapayikiri. ⁸ Mufuko kwa mupulira adwate vyuma vya vikenu vya kuvembera na kupayima vya kukushuka.'' ( Vyuma vya vikenu vya kukushuka kuna kutanta ashi viruwana vya uhungami vya vapongoki.) ⁹ Makura mu Engeli aghamba name ashi, ''Tjanga vino: Lirago lyalinene kukwenu anwe vana yita kushipito shalikwareko lya ndjwighona.'' Ghuye aghamba nka shimpe name ashi, ''Dino ndo nkango da Karunga da ushili.'' ¹⁰ Ame makura anu kugandere kumeho ya mpadi dendi mu Engeli ashi numutongamene, ano ngoli ghuye atantere ashi, ''Na kadidishi ashi uviruwane! Ame mukareli wa Karunga mukareli unyoye ogho akwaterero lipuro lya umbangi wa kuhamena kwa Jesus. Tongamane Karunga, mbyovyoshi ushili ogho watapo umbangi wa kuhamena kwa Jesus ngo wa hwamekango mpepo ya Uporofete.'' ¹¹ Ame makura anu mono liwiru lina gharuka, makura anu mono nkambe ya yikenu yina karomo. Murondi wa nkambe lidina lyendi ndje mulimburuki ntani ndje muna ushili. ghuye kupangura mu uhunga ntani lipenda ;ya kurwa vita. ¹² Mantjo ghendi kwafana yira maruraka gha mundiro, ntani ghuye kwadwata nkata dadingi da uhompa pamutwe wendi. ¹³ Ghuye vamuntja lidina parutu olyo vapira kuyiva navntje knwandi mwene tupu ti. Ghuya kwa dwata vikoverero ovyo va tupika muhonde, ntani lidina lyendi ndje nkango ya Karunga. ¹⁴ Mbunga da vakavita va muliwiru va kudwata vikoverero vya vikenu, vya kukushuka, vavo kuna kumukwama vana rondo pa nkambe da dikenu. ¹⁵ Makura kanwa kamurondi amutundu rufuro rwarutwe oro ngatoghonita virongo, ntani ghuye ngapangera na mburo ya shikugho. Ghuye nga lyatangera pa marovhu gha mushikamito sha lishandu lya linene lya Karunga wa nkondo nadintje. ¹⁶ Pashikoverero shendi na palitungi lyendi kwa tjangapo lidina lyendi ashi, ''Hompa wa vahompa na mupangeli wa vapangeli.'' ¹⁷ Ame makura anu mono mu Engeli ghumwe ana yimana muliyuva. Ghuye makura ayiyiri na liywi lyalinene vidira navintje ovyo vina kupito mu mpepo ashi, yenu muyaponge kushipito shashinene sha Karunga. ¹⁸ Yenu muyalye nyama ya vahompa, nayi ya vapititili vavakavita, nayi ya mapenda gha nkondo, nanyama ya nkambe kumwe nayi ya varondi va nkambe, yenu muyalye nyama ya vantu navantje, vamanguruka kumwe navapika, vahepwe kumwe navangagho. ¹⁹ Makura ame anumono shikashama na va Hompa vapalivhu kumwe navakavita vavo. Vavo kwapongire ashi varwanite oghu ana rondo pa nkambe nava kavita vendi. ²⁰ Makura shikashama ava shikwata kumwe na muPorofete wa vimpempa ogho karuwanango vitetu kumeho yavo. Ghuye karuwanangavitetu apukite vantu ov o vatamburo shiyito shashikama ntani navo vatongamenango kulifano lyasho. Navantje mu uviri wavo ava va vhukumini na uyumi mulikurudiva lya mundiro wa kurokota kumawe gha mundiro. ²¹ Vakavita ovo vahupiropo kwava dipayire na rufuro oro rwatundiro mukanwa kaghu arondiro nkambe. Makura vidira navintje avili vikute nyama yavo.