¹ Opo vyapwa ko vino makura anu mono mu Engeli umwe nka kuna kutunda muliwiru asheumuke. Ghuye kwa kalire na nkondo da dinene, ntani shite sha ukenu wendi kwa twedilire pa livhu na pantje. ² Makura ayiyiri na liywi lya linene, ashi, ''Yina hanaukapo Babiloni yayinene, yina hanaukapo! Ntantani yina kara ngoli mandi gha mpepo da didona, na uvando wa mpepo da kunyata, ntani kuna kara nka uvando wa mpepo da kunyata dakukushuva-shuva na vidira vyakunyata vya kukushuva-shuva. ³ Mukondashi dimuhoko nadintje da muUdjuni dina korwa ku ugara wa vinyu ya rushonda rwendi. Va Hompa navantje vapalivhu va shondera naye. Ano vana ngeshefa na va uliti vamu udjuni mbyo vana kara na ungawo wa kutunda kunkondo darushonda rwa liparu lyendi.'' ⁴ Ame makura anuyuvhu nka liywi limwe kuna kutunda muliwiru ashi, ''Rupukenumo mushitata shendi, anwe vamuhoko wande, mposhi kapishi mukare mundjo dendi, ngamupire kuwana mahepeko ghendi. ⁵ Mukondashi ndjo dendi dina rondo unene dina katika muliwiru, ntani viruwana vyendi vyavidona Karunga ana vivhuruka. ⁶ Mufutitenu yira momu afutitanga ghuye va unyendi, ntani muvyutenu rughoko mumufutite kuviruwana vyendi pa ruviri; munkinda yimwe tupu oyo amupire munwe marovhu gha ururu, anwe renkenu nkinda yirurupe unene pa ruviri mumupe anwe. ⁷ Yira momu tupu akufumadeka mwene kumwe na kutikitamo madogho ghendi gha mumutjima, mpopo nka tupu kukora na liguvo lyendi mpo ngali kahulira. Ghuye kughamba mumutjima wendi ashi; ''Ame kuna shungiri yira Hompa wa mukadi; Ame kapishi mufita vyendi, ntani nka ame narumweshi nganu kara muligugho. ⁸ Mpo ngolishi mahepeko ghendi ngaghaya tupu liyuva limwe: mfa, malirankali na lirumbu. Ghuye ngava mushwakerera mumundiro, mukondashi Hompa Karunga wa nkondo nadintje ndje ngamupanguro.'' ⁹ Va Hompa vapa livhu ovo kava shonderango kumwe naye kumwe navo vakaliro mumadovo ghendi ghamadona vya yitilore ghoma ava vareke kulira, na kukema na kumukenyaukira opo vamumonine muti kuna kumushwakerera. ¹⁰ Vavo ava yimanene ku ure, vana tetuka ntani vana kara naghoma kumahepeko ghendi, ava ghamba ashi, ''Lihudi lyalinene, lihudi lyalinene kushitata shashinene, Babiloni, ove shitata sha nkondo! matengeko ghuye kunaya mushirugho sha shifupi tupu. ¹¹ Va nangeshefa va mu udjuni ava kara muliguvo va mulire mukondashi kwato nka umwe ogho avhuliro kuya aya ure ngeshefa yavo- ¹² ngeshefa ya ngorodo, na siliveli, na tuwe twa ndiro, na makwarara, na makeshe ghama kenu, na makeshe gha maghurenga, nagha, na vitovalita, gha mageha, na gha ghamashovagani navitondo vya lidumba lya kukushuva-shuva, mbinga da va ndjovhu, na vininke vya vitondo vya mulyo wa kuyeruka, navi vya ngoporo, navi vya siliveli, na mawe gha ufughuli, ¹³ kwato nka ogho avhuliro ku ghura mberera, na vitovalita, navi tutumukita vya lidumba lyaliwa, na dimurora, navi vyakutura mo vitutumuke muti, na vinyu, na maghadi, gha mundya, na utura wa uwa unene, na rukokotwa, na ngombe, na vindjwi, natukambe na matemba gha karukara, na vapika ntani na monyo da vantu nado. ¹⁴ Limona lyoye nalintje olyo wa dovaukira lina kutundu. Ghungawo ghoye na ghuntje na vyuma vyoye vya ndiro vya kuvembera vina kombana, kapi nga uvimona nka waro. ¹⁵ Va uliti ngeshefa yino ovo vangawopero mo mushitata shino ngava yimanena ure ntani ngava kara naghoma wa unene mukonda ya ruhepo na mahepeko ghendi ngava liora unene na liguvo. ¹⁶ Vavo ngava ghamba ashi, ''Lihudi lya linene, lihudi lya linene ku shitata shashinene osho vadwateka vikoverero vyaviwa vyavikenu, navi vya puli-puli na vi vya vigeha vyama urenga gha ngorodo, na mawe ghandiro na makwarara kwahanaukapo mushiruwo shashifupi tupu. ¹⁷ Limona nalintje kwa dongonokapo mushiruwo shashifupi tupu.'' Vakurona vamuvikepa, na varondimo, na varuwani muvikepa ntani navo va parukango mulifuta ava duka vaka yimanene ku ure. ¹⁸ Vavo opo vamumonine ghuye mumuti kuna kupya makura ava ghamba na liywi lya kudameka unene. Vavo ava ghamba ashi, ''Shitata munke shashinene shakuvura kutika pashino?'' ¹⁹ Vavo ava kufutiri livhu pa dimutwe davo makura ava takuma, na kulira va ghorome na kughamba ashi, ''Lihudi ghunene, lihudi unene kwa shitata shashinene osho shangawopeko vantu ovo vakaro navikepa na limona lya mulifuta. Mushirugho shashifupi tupu ngavi hanaukapo.'' ²⁰ Karenu na ruhafo mukatji kenu, navo vamuliwiru, nanwe vapongoki, na va Apostoli na vaporofete, weno Karunga ana mupangura kutwara muviruwana vyendi!'' ²¹ Mu Engeli ghumwe wa nkondo ghunene adamuna limuwe lyalinene unene alivhukumina mulifuta, aghamba ashi, ''Mo ngoli, Babiloni, shitata shashinene mongoli ngava shivhukuma na nkondo dadinene ngashiyende mulidjonauko makura kapi nka ngamushimona. ²² ghuye kapi nka ngayuvha marushumo, navayimbi, navadani vamarushumo na marumbendo. Vikare viruwana vyakukushuva-shuva kapi nka ngavimonekamo mumwedi. Dikare nampili mpumo dakupuma mahangu kapi ngadi yuvikamo mumwedi. ²³ Ghukare ukenu na shite sharamba kapi nka nga umonekamo mumwedi. Likare liywi lya shitenya na li lya mukamali ovo va kwareka kapi nka ngali yuvika mo mumoye, mbyovyoshi ngeshsfa yoye yinene yakaliro palivhu makura upure ghoye mbyo wa pukita dimuhoko nadintje dapa livhu. ²⁴ Mumwendi movawana honde ya vaporofete nayi yavapongoki na honde ya vantu navantje ovo vadipaya mu udjuni.''