¹ Mu Engeli umwe wavo vatwaliliro visha vitano na viviri makura aya kukwande aghamba ashi, ''Ronda uye kuno, nuya kuneyede mpanguro yayinene ya mukadi wa rushonda ogho ana shungire pa mema ghamangi, ² kumwe nava Hompa va mu udjuni ovo vashondero naye, kumwe navo vakaro mu udjuni ovo vano vinyu ya rushonda rwendi mbyo va korwa.'' ³ Makura mu Engeli andamuna nuyende mu mpepo antware mumburundu, makura anu kamona mukadi ana shungiri pa mutwe wa shikashama shashigeha shasho kwayulire madina ghakushwaura. shikashama kwa kalire na dimutwe ntano na mbiri ntani na mbinga murongo. ⁴ Mukadi kwa dwatire vidwata vya vigeha vya ufughuli na ugeha na ma urenga gha ngorodo, na mawe ghandiro ntani na makwarara ghandiro.Ghuye kwa kwatilire nkinda ya ngorodo muliwoko lyendi oyo ya yuliro vihuna vyendi naushungu wa rushonda rwendi. ⁵ Pashipara shendi kwatjangapo lidina olyo lya karo na shihoramo shina, kutanto ashi: ''Ame Babiloni shitata shashinene ame nyokwa wa vaka rushonda navo vakuruwana vihuna vya vinene pa ntunda ya livhu.'' ⁶ Ame makura anu mono ashi mukadi ana korwa honde ya pongoki nayi ya vakareli va Jesus. Opo na mumonine ghuno mukadi, ame kwatetukire unene. ⁷ Mu Engeli makura ampura ashi, ''Vinke una kutetuka ? Ame kunu kutantera shino shihoromo sha mukadi ntani nashikashama ashi ana rondo ashi vinke shina kutanta, shino shikashama sha shadimutwe ntano na mbiri na mbinga murongo. ⁸ Shikashama oshi wa monine shakaliropo, kapi nka shina karapo weno, ntani ngashi tunda kushirongo sha kuntji-ntji sha kupira shinko. Shasho ngashi yenda mulidjonauko. Kwavo vatungo mu udjuni, ovo vapira kutjanga madina ghavo mu mbapira ya monyo kutunda kulishito lya udjuni- vavo ngava tetuka opo ngava mona shikashama, osho sha kaliroko, weno kapi shina karako, makura nga shikakareko nka waro. ⁹ Vino vya weno kwa hepa ndunge na ukonentu. Dino dimutwe ntano-na mbiri da shikashama kuna kwateremo ndundu ntano-na mbiri odo ashungira uno mukadi. ¹⁰ Ntani nka dado mbo vahompa vatano-na vaviri. Va Hompa vatano kapi nka vana karapo weno, ano umwe shimpe mpwalipo, ntani ghumwe shimpe kapi ana monekepo, opo ngamoneka ngakarapo tupu shiruwo sha shifupi tupu. ¹¹ Ano shikashama oshi shakaliroko, ano ngoli weno kapi shina karapo, shasho ndje Hompa wa utano-na utatu. Naye kwa hamena kwava vatano-na vaviri ntani nka naye ngayenda mulidjonauko. ¹² Ano mbinga murongo odi una mono ovo vahompa ovo vapiro kupangera rumwe virongo, ano ngoli ngava vapa lipangero ngava kare vahompa shirugho shashifupi tupu kumwe na shikashama. ¹³ Vavo kwa kalire mutjima umwe tupu, makura ava tapa nkondo na lipangero lyavo kwa shikashama. ¹⁴ Vavo ngava rwa vita va rwanite ndjwighona. Ndjwighona ngayifunda vita mukondashi yayo ndje mupanguli wa vapangeli ntani ndje Hompa wa vaHompa-ghuye kuna kara kumwe navo ayita, navo atoghorora ntani nava puli.'' ¹⁵ Makura mu Engeli aghamba name ashi, ''Mema ogho una mono, opo ana shungiri mukadi wa rukeshe, ndo dimuhoko, na mbunga da vantu, na virongo ntani na maraka. ¹⁶ Mbinga murongo odi una mono-vavo va Hompa na shikashama ovo vanyengo mukadi wa rukeshe. Vavo ngava mushutura nga kare rutu-rutu, makura ngava lye rutu rwendi, makura ngava kamushore mumundiro ngaka rungwenene. ¹⁷ Mukondashi Karunga ndje ava po dimutjima da kukufana ngava tape lipangero lyavo kwa shikashama ngava tikitemo ovyo vapanga dogoro ngadi tikiliremo nkango da Karunga. ¹⁸ Oghu mukadi una mono ntjo shitata shashinene oshi shakaro na nkondo da kupangera vaHompa navantje va mu udjuni.''