¹ Tupu na kenga ko anu mono ndjwighona yina yimana pa ndundu ya Siyoni. Ndhjwighona kwa yimanine kumwe na vantu mayovi lifere na dimurongo ne nane ndi 144000 ovo vatjanga lidina lyendi na lidina lya vashe pavipara vyavo. ² Ame makura anu yuvhu liywi lina kutundo muliwiru lya kufana yira mema ghaku pupira ghamangi unene gha kundunduma ghunene yira maruvadi. Makura anu yuvhu maywi ghakufana yira kuna kuveta musika vayimbe. ³ Vavo kwa yimbire rushumo rwarupe kumeho ya shipundi sha uhompa na kumeho ya vinamonyo vine na matimbi. Ano ngoli na umweshi avhuliro kukuronga oro rushumo vahana shi mbovo tupu mayovi lifere na dimurongo ne nane ndi 144000 ovo vayoghora mo mu udjuni. ⁴ Vavo vano mbovo vapiro kukunyateka na vakamali, vavo kapi vakwara rumwe mukondashi vavo kwa kukunga mbyo vakushuka. Vavo mbo tupu vaku kwama ndjwighona kehe kuno yina kuyenda. Vano mbo vayoworamo muvantu navantje vakare vakuhoverera va Karunga nava vandjwighona. ⁵ Vavo kapi vakara na vimpempa mutunwa twavo, vavo kapi vakara na udjuni kehe uno. ⁶ Ame makura anu mono mu Engeli kuna kutuka mukatji ka muliwiru, ghuye kuna kuyuvita mbudi ya ruhafo ya naruntje ayuvititire vantu navantje vatungo palivhu-vaku virongo navintje, na dimuhoko nadintje. ⁷ Ghuye makura ayiyiri na liywi lyalinene ashi, ''Tjirenu Karunga ntani mushambererenu. Mbtyovyoshi shirugho shampanguro yendi shinatikumo. Mutongamenu, ogho ashito liwiru, na livhu, nalifuta na dimukuro da kupupa mema.'' ⁸ Mu Engeli umwe- mu Engeli wa uviri- oghu ava kwamino atanta ashi, '' Kuna kuwa, yina kuwa po Babiloni ya yinene, oyo yanwito dimuhoko nadintje vinyu ya nkondo yarushonda rwendi.'' ⁹ Mu Engeli umwe- mu Engeli wa utatu- ava kwama, aghamba na liywi lyalinene ashi, '' Kehe uno wa kutongamena shikashama ndi lifana lyasho makura vamuture shiyivito sha shikashama pashipara shendi ndi pa liwoko lyendi, ¹⁰ naye ndje tupu kunwa muvinyu yaq lishandu lya Karunga, vinyu oyo vapira kuvhonga vayihaure mbyo vayitura munkinda ya lishandu lyendi. Kahe uno wa kunwa ndje tupu kukapya mumundiro na mumawe gha mundiro kumeho ya va Engeli va KArunga vakupongoka na kumeho ya ndjwighona. ¹¹ Muti wa mundiro wa kuvahepeka wawo kurokota naruntje na runtje, matiku na mwi kwato kupwiyumuka-navantje vakutongamena shikashama na lifano lyasho, ntani navo vatambuliro shiyivito sha lidina lyendi. ¹² Muvininke vya weno vapongoki kwa hepa kukara na lihuguvaro kumwe na lididimiko vantu ovov va kwato maghoko maviri vipango vya Karunga na lipuro lya Karunga mwa Jesus.'' ¹³ Ame makura anu yuvhu liywi kuna kutunda muliwiru kuna kughamba kukwande ashi, ''Tjanga vino ashi: Vana lirago mbovo vana kufero mwa Hompa weno.'' Mpepo ayi limburura ashi, ''Ushili, mongoli.'' '' Vavo ngava kapwiyumuka kuma udito ghavo, mbyovoshi viruwana vyavo vyaviwa ngavivakwama.'' ¹⁴ Tupu na kankuka numone, makura anu mono liremo lya likenu. Ano ngoli gghumwe ana shungiri pa liremo wakufana yira mona muntu. Ghuye kuna dwata nkata ya nkondo pa mutwe wendi ntani kuna kwaterere shitetito shashitwe muliwoko lyandi. ¹⁵ Makura mu Engeli umwe arupuka mu ntembeli makura ayiyiri na liywi lyalinene kwa ghgu ashungiliro pa liremo ashi, ''Kwata nawa shitetito shoye shakuteta shinatikimo, mbyovoshi muyangu wamu udjuni una tikilirimo mukupya.'' ¹⁶ Makura oghu ashungiliro paliremo makura atoghona shitetito shendi pa ntunda ya livhu ava uyanguramo utundemo. ¹⁷ Mu Engeli umwe naye arupuka mu ntembeli ya muliwiru; naye ana kwaterere shitetito sha utwe. ¹⁸ Mu Engeli umwe naye arupuka mushidjambero, ghuye kwa kalire na nkondo da kupangera mudniro. ghuye ayiyiri na liywi lya kudameka unene kwaghu akwatiliro shitetito sha utwe ashi, '' Kwata nawa shitetito shoye sha utwe ghupongayike dimutavi da mandjembere gha mu udjuni, mukondashi mandjembere ghamo weno gha pi. ¹⁹ Mu Engeli makura atoghona shitetito shendi pa ntunda ya livhu aghupe mo mu yangu wa mandjembere pa ntunda ya livhu. Makura agha vhukumini mushidjamito shashinene sha shilishandu sha Karunga. ²⁰ Shidjamito kwashitulire pandje ya shitata, honde oyo yatundiromo kwapupire ghure wa shinema sha kilomita mafere matatu litondo lya muuro wa honde kakambe kungenamo nayintje kuhupako tupu liyuru.