¹ Makura ame anu mono shikashama kuna kutunda. Shasho kwakalire nadimutwe ntano-na mbiri ntani nambinga murongo. Kehe kuno kuruvinga kwa kalireko nkata, ntani kudimutwe dasho kwa kalireko madina gha kushwaura. ² Shino shikashama na monine kwafana yira lishumbu. Maghuru ghasho kwafana yira limbungu, ntani kanwa yira Nyime. Likongoro alitapa lipangero, shipundi sha Uhompa ntani na nkondo dadinene da kupangera. ³ Kumutwe ghumwe wa shikashama kwaremana shironda shashinene unene, ano ngoli shironda shashinene shaveruka livavi tupu. Udjuni naghuntje makura aghutetuka pa kumona shikashama shino. ⁴ Vavo avatongamene likongoro, olyo lyapiliro nkondo kushikashama. Vavo ava tongamene, nka, shikashama, kumwe nakughamba ashi, ''Are wa kuvhura kutika pashino shikashama?'' ntani ''Are wa kuvhura kushirwanita?'' ⁵ Shikashama kwa shipire kanwa kakanene kukughamba nkango da kukunenepita na kushwaura. Makura ava shipa ruvede na nkondo da kupangera shirugho sha kutika ku makwedi dimurongo ne-namaviri. ⁶ Makura mukanwa kashikashama adi rupukamo nkango da kushwaura Karunga, na kushwaura lidina lyendi kumwe na kushwaura Ntembeli yendi, kumwe navo vatungo muliwiru. ⁷ Shikashama kwa shipire nkondo da kurwita vantu vaKarunga kumwe na kuvafunda. Ntani, kwashipire nkondo da kupangera marudi naghantje, vantu navantje, maraka naghantje ntani navirongo navintje. ⁸ Navantje ovo vatungo palivhu ngavatongamena shikashama, ava vapira kutjanga madina ghavo mu mbapira ya monyo, ya ndjwighona oyi vadipayire kutunda pa lishito lya Udjuni. ⁹ Kehe uno akaro na matwi, ayuvhe. ¹⁰ Kehe uno ngava panga ashi vamuture mudorongo, ndje tupu ngavatura mudorongo. Kehe uno ngava panga ashi vamudipaye na rufuro, ndje tupu ngava dipaya na rufuro. Vino kuna kutanta ashi vantu vaKarunga karenu munakaro nalididimiko kumwe na lipuro. ¹¹ Makura ame anu mono shikashama shimwe kuna kutunda mulivhu. Shasho shambinga mbiri da kufana yira ndjwighona, shakughamba yira likongoro. ¹² Makura shasho ashiruwanita nkondo da shikashama sha kuhova kumeho ya sho, shasho ashi renke udjuni navo vatungomo vatongamene shikashama sha kuhova-oshi shakaliro na shironda sha shishinene ano ngoli sha veruka. ¹³ Shasho kwaruwanine vitetu vya vinene. Shasho kuyita mundiro utunde muliwiru usheumuke palivhu mpopo vantu kuna kuvi mona na montjo ghavo. ¹⁴ Shahso makura ashi pukita vantu vavangi ovov vakaro pa ntunda ya livhu, mukonda ya kuruwana vitetu vino kumeho ya shikashama sha kuhova, shasho ashi tantere vantu vapalivhu ashi varuwane lifanao lya shikashama-oshi varemikire shironda na rufuro, mbyo sha parukire. ¹⁵ Shasho kwa shipulitilire mukutura monyo mulifano lya shishakama livhure kughamba ntani kumwe na kudipaya kehe uno wa kushwena kutongamena kwa shikashama. ¹⁶ Makura shikashima ashi tininiki vantu navantje, vakare vanuke ndi vakurona, vangawo ndi va hepwe, vamanguruki ndi vapika, kehe uno va muture shiyivito kulighoko lya rulyo ndi pashipara shendi. ¹⁷ Naghumweshi wa kuvhura kughura ndi kughulita nkwandi ndjeghu akaro nashiyivito shalidina lya shikashama, ndi po, nomora ya lidina lyasho. ¹⁸ Vino kwa hepa ukonentu. Kehe uno akaro na ukonentu, avare shivaro sha shikashama. Mbyovo shi shasho shivaro sha lidina lya muntu. Shivaro sha nomora yendi mafere matano-na limwe na dimurongo ntano-na yimwe na ntano-na yimwe, ndipo 666.