¹ Muliwiru makura amu moneke shiyivito shashinene ashi: Mukadi kuna dwata liyuva, ano kakwedi kwa kalire kuntji ya mpandi dendi ntani kumutwe wendi kwakalire ko nkata ya mbungururu murongo-na mbiri. ² Ghuye kwa kalire na marutu maviri, makura atakuma na kulira unene mukonda ya kukora pa kushampuruka mwanuke. ³ Muliwiru makura amumoneke nka shiyivito sha uviri: Monenu! Kwamonikire likongoro lyalinene lyaligeha yira mundiro lyayo kwa kalire na dimutwe ntano-na mbiri ntani na mbinga murongo ntani kwa kehe mutwe kwa kalireko nkata. ⁴ Mushira walyo makura aghu kombo shiutatu sha mbungururu da kuwiru va divhukumine pa livhu. Likongoro aliyimana kumeho ya mukadi ogho ashanino kushampuruka, ashi ndi limine mwanuke, opo vamushampurukire. ⁵ Makura mukadi ashampuruka mukeke wa mumati, mwanuke wa mumati, ogho ngapangero dimuhoko nadintje na mburo ya shikugho. Makura mwanuke ava munyangura vamu ghupe kukwedi va mutape kwa Karunga kushipundi sha Uhompa, ⁶ makura mukadi atjwayukiri mu mburundu, kulivhango olyo amu wapayikilire Karunga, vakamurere mayuva liyovi na mafere maviri na mayuva dimurongo ntano-na limwe ( 1260). ⁷ Makura muliwiru avi shapuka vita: Michael na va Engeli vendi varwite likongoro nava Engeli valyo varwe vita. ⁸ Makura ava lifundu likongoro, kapi nka lyavhulire kukara na livega muliwiru kumwe nava Engeli va lyo. ⁹ Limukongoro lyalinene-liyoka lya kare olyo vatwenyanga ashi mudjonauli ndi Satana, olyo lyapukito udjuni na ghuntje- ava livhukumini pa livhu, kumwe nava Engeli valyo. ¹⁰ Makura anuyuvhu liywi lyalinene muliwiru kuna kuyiyira ashi: Weno liyoghoro na nkondo na untungi wa Karunga wetu, nalipangero lya Kristus wendi. Mbyovoshi muna vimpempa wava unyetu ogho kava rundirango matiku na mwi kwa Karunga kwa wetu vana muvhukuma atunde mo. ¹¹ Vavo kwa mufundire na honde ya ndjwi ghona na nkango da umbangi wavo, mbyovyoshi vavo kapi vavhulire kuhoreka munyo davo dogoro ku mfa. ¹² Mpo ngoli ashi kara naruhafo, ove liwiru nava vakaromo! Lihudi lya linene kukwenu muna karo palivhu na mulifuta, mukondashi mudjonauli vana muvhukumini kukwenu! Ghuye kuna kara na lishandu lyalinene mukonda ana yiva shi shirugho shendi oshi shina hupoko shifupi unene. ¹³ Makura opo lyamonine likongoro ashi vana livhukumini pa livhu, makura alitjida-tjida mukadi ogho asha mpurukiro mwanuke wa mumati. ¹⁴ Makura makadi ava mupa mavava maviri gha likangakodi lyalinene ashi atuke ayende mumburundu kulivhango olyo vamuwapayikilire. Kulivhango oko vaka murerera shirugho, virugho na ghukahe: kutanta ashi mwedi ntatu na ukahe-ghuye akare ure na liyoka kapishi limumone. ¹⁵ Makura limuyoka aliruku mema mu kanwa kalyo gha kufana yira mukuro kunyima ya mukadi ashi ghuno mukuro ghuka ghuka mupitilire ghuno mukadi. ¹⁶ Ano ngoli livhu alipopere uno mukadi. Livhu kwa yashamine limine uno mukuro lya rukire likongoro utunde mukanwa kalyo. ¹⁷ Makura likongoro ali garapa unene kwa mukadi ali yendi lika rwanite ruvharo rwa mukadi, oro rwatikitangomo vipango vya Karunga ntani vavo kwalimburuka vakare va mbangi va Jesus. ¹⁸ Makura likongoro aliyendi likayimane pa musheke wa lifuta.