¹ Ame kwa mpire Ruu rwa kufana yira mpango ya kumeta. Makura ava ntantere ashi, ''Shapuka ukafanekeke na kumeta Ntembeli ya Karunga na shidjambero ntani navo vana kukandereremo munda. ² Ano ngoli livhango lya pandje ya ntembeli kapishi ghulifaneke ghuna hepa kulishuva ko, kwa litapa kuva pagani. Vavo ngava lyatange shitata sha kupongoka makwedi dimurongo ne-na maviri. ³ Ame nganutapa nkondo kuva mbangi vande vano vaviri ngava yuvite mbudi ya Karunga mayuva liyovi limwe na mafere maviri na mayuva dimurongo ntano-na limwe (1260 mayuva), vavo ngava dwata muvi koverero vya malira nkali.'' ⁴ Vavo va mbangi vaviri mbo vitondo viviri vya ndjwe ntani na ma uyweko maviri gharamba ogho ayimano kumeho ya hompa pano palivhu. ⁵ Kehe ghuno ngashano kuvadipaya, mundiro nga ghutunda mutunwa twavo ngaghuveveke vana nkore vavo. Kehe uno ngashano kuva kwata pa marutu naye mo ngavhura kufa weno. ⁶ Vavo vambangi vaviri vakara na nkondo da kupata liwiru ashi kapishi ngayiroke mvhura mumayuvha ogho ngava yuvita. Vavo vakara na nkondo dakutjindja mema akare honde ntani kumwe na kuhepeka udjuni na mahepeko peke-peke kehe ghano vana shana. ⁷ Opo ngava tikitamo ghumbangi wavo, makura shikashama ngashi tunda kulikwina lya kushirongo sha kuntji ngashi yavarwanite. Makura ngashi vafunde na kuva dipaya. ⁸ Vimpu vyavo ngavirara mundjira ya shitata shashinene ( osho vatwenyanga ashi Sodomu ya mu Egipite) oku vaka pampalire Hompa wavo kushilivindakano. ⁹ Vantu vakudimuhoko nadintje, na marudi, na maraka ntani navirongo navintje ngava mona marutu ghavi mpu vyavo ghure wa mayuva matatu na ghukahe. Vavo ngava shwena kuvumbika vimpu vyavo mumbira. ¹⁰ Vantu ovo vatungo palivhu ngava hfera unene mfa davo kumwe nakudjombwana. Vavo ngava kutumina-tumina ma ushwi mukondashi vano va Porofete kavahepekanga unene vantu vapalivhu. ¹¹ Ngapapita mayuva matatu na ukahe makura mpepo ya kutunda kwa Karunga ngayiye mumwavo, makura ava rambuka vashapuke. Vantu ovo vavamonino ava kara naghoma wa unene. ¹² Ovo vaporofete vaviri makura ava yuvhu liywi lyalinene lya muliwiru kuna kuvatantera ashi, '' Rondenu muye kuno!'' Vavo makura ava rondo vayende mu liwiru va yendere muliremo, vana nkore vavo kuna kuva mona. ¹³ Pashirugho ntjosho tupu makura apa shoroka likankamo livhu lyalidito, makura shiumurongo sha shitata ashi djonaukapo. Vantu mayovi matano-na maviri ava fu kuli kankomo livhu, ava vahupiropo ava kara na woma wa ghunene makura ava tanga Karunga wa muliwiru. ¹⁴ lihudi lya uviri lina kapita. Kengenu! Lihudi lya utatu ntantani litike! ¹⁵ Mu Engeli wa utano na uviri ashivi rumbendo rwendi, mkaura muliwiru amutundu maywi gahmanene ghana kutanto ashi, '' Uhompa wa mu udjuni ntantani una kara ngoli wa Hompa wetu na Kristus wendi, ghuye ngapangera naruntje na naruntje.'' ¹⁶ Ano natimbi dimurongo mbiri-nane ogho ashi ngiliro ku vipundi vya uhompa kushipara sha karunga, ava kugandere palivhu vatongomene Karunga. ¹⁷ Ava tanta ashi, ''Atwe kuna kukupandura ove, Hompa Karunga wa nkondo nadintje, ove ghuna karoko ntani ove wakaliroko, mukondashi ghuna tameke kuruwanita nkondo doye dadinene mbyo una kupangera. ¹⁸ Va kavirongo kwa garapire unene, mukondashi shirugho sha lishandu lyoye shinatikimo. Shirugho shinatikimo sha kupangura vafe na shi shakutapa mfuto kuvantu voye va vaPorofete ntani na kuvapongoki va Karunga, ovo vatjiro valikuto ntani navahepwe. Shirugho shinatikimo sha kudjonaura ovo vana kudjonauro shirongo sha pantunda ya livhu.'' ¹⁹ Makura ntembeli ya Karunga ya muliwiru ayi paturuka makura limbangu lyamakukwatakano alimoneke muntembeli yendi. Makura apa moneke maruvadi gha kuvema, maywi, lindundumo, likankamo livhu ntani na mvhura yamawe.