¹ Makura ame anu mono mu Engeli umwe wa nkondo kuna kutunda mu liwiru. Ghuye kuna dwata liremo, ntani pamutwe wendi kwakalirepo likongoro. Shipara shendi kwafanine yire liyuva ntani maghuru ghendikwa fanine yira ngundi da mundiro. ² Ghuye kwa kalire na mbapira yayididi, oyo vafikulire vayihonyonone muliwoko lyendi. Makura ghuye mpadi yendi ya kurulyo ayilyata mulifuta ntani mpadi yendi ya ku rumontjo ayilyata pa urundu. ³ Makuru ayiyiri na liywi lyanene yira momu anunganga Nyime. Opo ayiyilire ngoli, makura maywi matano na maviri agha vareke kundunduma. ⁴ Opo andundumine aghano maywi matano-na maviri, hambara nuvareke kutjanga ovyo nayuvire, makura anu yuvhu liywi lina kutundo muliwiru kuna kughamba ashi, ' '' Ovino ana kutanta ghano maywi matano-na maviri akare mulihoramo ngagha kare viyivito. Kapishi ghuvitjange.'' ⁵ Makura mu Engeli aghu na monine ana yimana mulifuta na pa ghurundu ayerura lighoko lyendi lya kurulyo muliwiru. ⁶ Makura aturapo mughano wa mulidina lya ghu akaro na monyo wa naruntje na naruntje, ogho ashito liwiru kumwe na navintje ovo vya karamo, mushiti wa livhu kumwe na navintje ovyo vya karomo, ntani mushiti wa lifuta kumwe na navintje ovyo vya karomo, makura mu Engeli atanta ashi, '' Weno kwato nka kukuranga. ⁷ Ano ngoli opo ngaghatikamo mayuva opo ngashiva mu Engeli wa utano-na uviri rumbendo rwendi, vihoramo vya Karunga ovyo ashorolire tupu kuva kareli vendi vaPorofete mpo ngavi tikiliramo navintje, yira momu vayuvitire mbudi ya untungi wa Karunga. ⁸ Makura ame anu yuvhu liywi lina kutundo muliwiru kuna kughamba name ashi: '' Yenda, kwa mu Engeli oghu ana yimano mulifuta na pa urundu ghuka upe mbapira muliwoko lyendi oyo vanafikura.'' ⁹ Makura ame anu yendi kwa mu Engeli anu mutantere atape kukwande mbapiraghona. MAkura uye antantere ashi, '' Ghupa yino mbapiraghona ghuyilye. kughuyuvha kukora mulipumba lyoye, ano ngoli mukanwa koye ghutovali yira Ushi.'' ¹⁰ Makura anu ghupu mbapiraghona muliwoko lya mu Engeli makura anu yilipo. Mukanwa kande kwa tovalire yira Ushi, opo namanine kulya, mulipumba lyande amu kara ururu ghunene. ¹¹ Makura ghumwe antantere ashi, '' Ghuna hepa kuPorofeta ghupumbe kuhamena kudimuhoko dadingi, na kumarudi, na kumaraka ntani ku vaHompa.''