¹ Karenu muna kotoka ashi kapishi kuruwana viruwana vyenu vyaghu kareli Karunga kumeho yavantu vamu mone, nkene amuruwana vya weno ndi kapi ngamu kawana mfuto yenu kwa Shenu wamu liwiru. ² Nkene kuna kutapa shitapa kehe shino, kapishi kutapa mayuvito kwa kehe ghuno avi yuvhe, yira momu varuwananga vavikupaki muSinagoge na mundjira, mposhi vashane likuto kuvantu. Ushili naku mutantera ashi, vantu va weno vawana kare mfuto yavo. ³ Nkene kuna kutapa vitapa, liwoko lyoye lya rumontjo kapishi hepero kuyiva ovi lina kuruwana lighoko lyoye lya rulyo ⁴ mposhi vitapa vyoye vikare mukahore-hore. Makura Vasho ovo vamonango viruwana vyaku horama ngava tape mfuto kukoye. ⁵ ''Nkene kuna kuraperera, kapishi kukara yira vavikupaki, vavo kwa hora kuyima varaperere muSinagoge ntani namu ndjira mposhi vantu navantje vava kenge. Vya ushili naku mutantera ashi, vantu va weno vawana kare mfuto yavo. ⁶ Ano ngoli anwe nkeneshi kuna kuraperera, muna hepa kungena mu ndjugho. Kupata mavero naghantje, makura kushungida muraperere kwa Shenu ogho amonango vyamu kahore-hore. Mposhi Shenu ogho akengango vyamu kahore-hore nga tapa mfuto kukwenu. ⁷ Nkene kuna kuraperera, walye mwa vhukitanga nkango dadiyingi yira vaPagani, vavo kughayara ashi ndapero davo kuyuvika mukonda ya nkanga dadiyingi. ⁸ Mpongoshi, anwe naku honenashi vantu vaweno, Shenu ayiva kare navintje ovi munahepa kumeho yaku raperera mushungide kukwendi. ⁹ Anwe muna hepa kuraperera weno ashi, ''Shetu wamu liwiru, lidina lyoye lifumane. ¹⁰ Untungi ghoye ghutuyere. Vipanga vyoye vitikemo pano palivhu yira muliwiru. ¹¹ Tupenuko ndya detu da kehe liyuva. ¹² Tughupirenupo ma undjoni ghetu, yira momu twa ghupirangapo natwe vandjoni vetu. ¹³ Kapishi ghutu kengerere tunenukire kundjo, nane ghutu-yoghore ku udona.' Matjangwa ghamwe kwatanta ashi, "Ghuno untungi wenu, nkondo nadintje kwa hamena kukwenu, ghuyerere naghuntje wenu, naruntje na naruntje. Amen. ¹⁴ Mukondashi nkene amu dongononapo ndjo da vantu ovo vadjono kukwenu, Shenu wamu liwiru naye ngadongononapo ndjo denu. ¹⁵ Ano ngoli nkene kapi muna kudongononapo ndjo da vantu ovo vadjono kekwenu, na Shenu wamuliwiru naye kapi nga dongononapo ndjo denu. ¹⁶ "Nkene kuna kuraperera ndapero yaku dililira ndya, kapishi mufane na kumoneka yira vavikupaki, vavo kukara na liguvo mushipara vamoneke kwa kehe ghuno ashi kuna kara pa ndapero yaku dililira. Vya ushili naku mutantera ashi, vavo vana wana kare mfuto yavo. ¹⁷ Anwe nkeneshi kuna kuraperera ndapero yaku dililira, muna hepa kukusha dimutwe denu ntani muna hepa kukwita maghadi kushipara ¹⁸ mposhi kapishi mumoneke ku vantu ashi kuna kara pandapero yaku dililira, nane ngoli mumoneke tupu kwa Shenu ogho amonango ovyo vya horamo; makura Shenu ogho amonango ovyo vya horamo ngamu futa kumeho ya navantje. ¹⁹ Walye mwaku pongayikiranga limona lyapano pantunda yalivhu, lyaku likana kuvimbumburu naku djonauka kushitembwe na nkarawe, vawidi kuvhura vatjore ndjugho vavake vadamune vatware. ²⁰ Nane ngoli anwe kupongayikirenu limona lyamu untungi wamu liwiru, omo mwapiro vimbumburu na shitembwe na nkarawe, ntani omu mwapiro vawidi vaku tjora vavake. ²¹ Mukondashi nkoku lyakara limona lyoye, nko wakara monyo ghoye. ²² Ramba yarutu roye ne mantjo. Mpo ngolishi, nkeneshi mantjo ghoye gha ndjewa-ndjewa, na rutu roye naro ngaru kara rwa ndjewa-ndjewa ngaru kara yira ramba. ²³ Ano ngoli nkeneshi mantjo ghoye kuna kuvera kwato kumona nawa, makura rutu roye naruntje naro kukara mumundema. Mpo ngolishi, nkene ghukenu wamu rutu roye ghuku shintumuke ghukare ghushovagani, kuni nko ngaghu vhura ku katika ghuno mundema wamu rutu roye. ²⁴ Kwato muntu waku vhura kukarera vahona vaviri, ghuye nga nyengapo ghumwe ntani nga horapo ghumwe, ndi po ngakorera kwa ghumwe ntani ngatunda kwa ghumwe. Nanwe nka naku vhurashi kukarera Karunga na limona. ²⁵ Ame mbyo naku mutantera ashi, kapishi kupakera shinka monyo denu na marutu ghenu ashi vinke mulya ndi vinke munwa; ndi kuhamena marutu ghenu ashi, vinke mudwata. Mukondashi monyo denu dapitakana ndya ntani marutu ghenu kwa pitakana vidwata? ²⁶ Kengenu tupu vidira vyaku wiru. Vyavyo kapi vya kunanga mbuto ntani kapi vya yanguranga muyangu, ntani kapi vya pongekanga ndya, ano ngoli Shenu wamu liwiru ghuye kuvirera. Anwe mwa kara na mulyo waku pitakana vidira? ²⁷ Are ghumwe mukatji kenu ogho ana karo navinka vyavingi vya liparu, mbyo ana wederereko mwaka ghumwe wa liparu lyendi? ²⁸ Mukonda munke mukarera na shinka sha vyuma? Ghayarenu tupu dimuncungu damu lidiva ashi, weni omo damena dimucuko dogoro dikure. Dado kwato kuruwana, ntani kwato kuhondja vyuma. ²⁹ Ame kuna kumutantera ashi, nampili ndi Salomoni kumwe limona lyendi lyaliyingi unene, kapi kadwatanga akare naghu fughuli waku pitakana dino dimucuko. ³⁰ Nkeneshi Karunga kudwateka mushoni wamu wiya, ghuno ghuna karopo namuntji tupu na yona makura ngava ghutetepo ngava ghuvhukumine mulidiko, weni omo ngapira kumudwateka anwe mupitakane mushoni, anwe vantu lipuro lyenu lididi unene? ³¹ Mpo ngolishi kapishi mukare na shinka unene ashi, 'Vinke mulya?' ndi 'Vinke mu nwa?' ndi 'Vyuma munke ngamu dwata?' ³² Vapagani mbo vashanango ku kupongekera vininke, anwe Shenu wamu liwiru ana yiva kare ashi muna vihepa vino vininke. ³³ Mpo ngolishi pamuhovo shanenu Untungi wa liwiru na ghupongoki wendi, makura navintje vino muna hepa ngava viwederera ko kukwenu. ³⁴ Mpo ngolishi kapishi muku pakere shinka kwavi vya yona, mukondashi lya yona nalyo nalyavyo kare. Kehe liyuva kwa kara naghudito walyene.