¹ Jesus opo amonine mbunga ya vantu, ayendi aronde kuwiru yandundu. Opo aka shungilire, makura varongwa vendi ava yendi ku kwendi. ² Ghuye atameke kughamba naku tapa marongo kukwavo kumwe nakughamba ashi, ³ "Lirago unene kwavo vakaro na unkundi mumutjima, vavo ngava kamona untungi waliwiru. ⁴ Lirago unene kwavo vana karo na liguvo mumutjima, vavo ngava kawana lishengawido. ⁵ Lirago unene kwavo vakaro na unongo, vavo ngava kapinga shirongo. ⁶ Lirago unene kwavo vakufa ndjara na linota mukonda ya uhungami, vavo ngava kakuta. ⁷ Lirago unene kwavo vakaro na nkenda, navo ngava kava fera nkenda. ⁸ Lirago unene kwavo vakushuko mumutjima, vavo ngava kamona Karunga. ⁹ Lirago unenene kwavo vayitango mpora pavantu, vavo ngava va twenya ashi Vana vaKarunga. ¹⁰ Lirago unene nkene ava muhepeke mukonda ya uhungami, anwe ngamu kawana untungi waliwiru. ¹¹ ''Lirago unene nkene vantu ava mutuku naku mushwaura nakumuhepeka naku mufinga kumwe naku murundira mukonda ya lidina lyande. ¹² Karenu na ruhafo anwe mupembure, mukondashi ngamukawana mfuto yayinene unene muliwiru. Nampili vaPorofete vakuhova navo movava hepikire ngoli. ¹³ ''Anwe muna karo mungwa wamu udjuni. Nkeneshi mungwa aghu hamupara ukombanite nkondo, weni ngava vhura kughuruwana mposhi ngaghu kare nka nankondo? Wagho kwato nka mutompo nkoko tupu kughu vhukumina palivhu vaghu lyatange na mpadi davantu. ¹⁴ Anwe nwe ramba yamu udjuni. Shitata osho vatura pandundu kapi sha horoma. ¹⁵ Ntani nka kwato muntu waku hamweka ramba makura ayiture munda yambete, nane ngoli wahepa kuyitura pantishe, mposhi yitape ukenu mundjugho kwa kehe uno. ¹⁶ Hamweka ramba yoye yitape ghukenu ku vantu vamone viruwana vyoye vya viwa mposhi vafumadekerepo Shetu wamu liwiru. ¹⁷ ''Kapishi mughayare ashi ame kwaya nuya ghupepo veta ndi matjangwa ghavaporofete. Ame kwayera kapishi kuyaghupapo veta na nkango davaporofete, nane ngoli kwayera mposhi diyatikitiliremo. ¹⁸ Ushili vya ushili naku mutantera ashi liwiru na livhu ngavi kadongonokapo, ano ngoli kwato ndanda yimwe ndi shikomona nampili shashididi osho ngashitundoko kuveta, nkwandi dogoro nkango nadintje ngaditikiliremo. ¹⁹ Kehe uno waku tjora veta yayididi pavipango vya Hompa makura ghuye ngaronge vantu vaviruwane ngoli ghuye ndje ngaka karo wamudidi unene mu untungi wa liwiru. Ano ngoli kehe uno wakutikitamo veta nadintje ntani ghuye adironge ditikiliremo ghuye ngaka wana lipundi lya linene mu untungi waliwiru. ²⁰ Ame kuna kumutantera ashi nkwandi muna hepa kukara na uhungami waku pitakana pa varongi matjangwa na vafarisayi, ntani ngamu kangena mu untungi waliwiru. ²¹ '' Anwe mwayiva matjangwa kwatanta ashi, 'Naku vhurashi udipaye, 'ntani, 'Kehe uno waku dipaya ngaka gwanekera na shiponga shampanguro.' ²² Ame kuna kumutantera ashi kehe uno akaro na ugara na unyendi ngava kamupangura; ntani kehe uno wa kutantera unyendi ashi, 'Ove kwato mulyo!' Matimbi ngagha kamupanguro; ntani kehe uno wakutantera unyendi ashi, 'Ove ligova! ngava kamu vhukumina mumundiro wanaruntje. ²³ Nkene shi ove kuna kuyenda utape ndjambo yoye ku shidjambero makura ghuvhuruke ashi waku djona na unyoye, ²⁴ tura palivhu vitapa vyoye kumeho ya shidjambero, yenda ghuvyuke. Kahove kushungida lighupiropo kwa unyoye, ntani ghuyenda ghuka ture ndjambo yoye pashidjambero. ²⁵ Kuyuvhe wangu na muna nkore ghoye ove shimpe kapi ghuna katika mumpanguro, ogho wa djonena kuvhura ngaka kutape mumaghoko ghavapanguli, makura ngaghu kayende mumaghoko ghaHompa, ngaka kuture mudorongo. ²⁶ Vya ushili naku mutantera ashi, ove kapi ngaghuka tundamo mudorongo wa hana kumana kufuta makongo ndi ndjo doye nadintje. ²⁷ ''Anwe mwa yiva matjangwa kwatanta ashi, 'Naku vhurashi kushondera.' ²⁸ Ame kuna kumutantera ashi kehe ghuno wa kukenga mukamali makura akare nalidogho mumutjima ashi ana muhoro ogho muntu ana shondere kare mumutjima wendi. ²⁹ Nkene lintjo lyoye lya rulyo kuna shana kukutwara ku ndjo, likorore litundemo kavhukumine muwiya. Hasha tupu kukombanita ruha rumwe tupu kurutu roye kupitakana omo ngava kavhukumina rutu roye naruntje ruyende mumundiro wa naruntje. ³⁰ Nkene lighoko lyoye lya rulyo kuna shana kukutwara ku ndjo, litete litundeko kavhukume muwiya. Hasha tupu kukombanita ruha rumwe kurutu roye, kupitakana mukukombanita rutu naruntje ruyende mumundiro wa naruntje. ³¹ Matjangwa kwatanta ashi, 'Nkene kuna kukugaunuka muku kombe na mukamali ghoye, wakona kumu tjangera mbapira yakukukomba.' ³² Ame kuna kumutantera ashi kehe ghuno wa kukomba mukamali wendi, pahana konda yarushonda, ogho mutjoli nkwara. Kehe ghuno ngakwaro ogho mukamali, naye nka mutjoli nkwara. ³³ ''Ntani, mwa yiva matjangwa kwatanta ashi, 'Kapishi kughana mughano wavipempa, nane ngoli wahepa kutikitamo mughano ghoye ogho wa twenyedera Hompa.' ³⁴ Ame kuna kumutantera ashi, nakadidishi kughana mughano, ntani nakadidishi kughana liwiru, mukondashi mo lyakara lipundi lya Hompa Karunga; ³⁵ nakadidishi kughana livhu, mukondashi ngo ulyatero wa mpadi dendi; ntani nakadidishi kughana Jerusalemu, mukondashi shitata shaHompa wa munene. ³⁶ Ntani nakuvhurashi kughanita mutwe ghoye, mukondashi ove kapi wakara nankondo daku tjindja huki mumutwe ghoye nampili yimwe tupu yikare ukenu ndi yikare ushovagani. ³⁷ Nane ngoli ghamba tupu nkango doye dikare ashi, 'Mongoli, Mongoli, ndi ' Hawee, Hawee!. Kehe yino nkango yakupitakana pano, yaku tunda kwa Satana. ³⁸ ''Anwe mwa yuvha omo vaghamba ashi, Lintjo na lintjo, ntani liyegho na liyegho'. ³⁹ Ano ngoli ame kuna kumutantera ashi, kapi shi ku ku hokwa-kwa navantu vaku ruwana urunde. Nane ngoli, kehe ghuno wa kutoghona litama lyoye lyarulyo, ghuna hepa kupiruka nka atoghone lya uviri. ⁴⁰ Nkene muntu kuna shana ngakutware kumpanguro mposhi ngaghupe shikoverero shoye, murenke tupu ngaghupe navintje kumwe na mbayikisha yoye. ⁴¹ Nkene mukavita kuna kuku tininika ashi udamune murongerero wendi shenema shaku tika ku Kilo-meta yimwe, ove damuna uyende shinema shaku tika ku Kilo-meta mbiri. ⁴² Nkene muntu kunaya aya rombe kehe shino kukoye damuna ghutape, kehe ghuno wakuya kukoye aya shane makongo damuna ghutape. ⁴³ ''Matjanwa kwa tanta ashi, 'Hora vamaparambo voye ntani nyenga vana nkore voye.' ⁴⁴ Ano ngoli ame kuna kumutantera ashi, horenu vana nkore venu ntani rapererenu ko vantu vaku muhepeka, Matjangwa ghamwe kwatanta ashi, "Shwera lirago vantu vaku kufinga ntani ruwanena uwa vantu vakukunyenga, ⁴⁵ mposhi anwe ngamukare yira vana vaShenu wamu liwiru. Mukondashi ghuye kwaturapo liyuva litape ukenu kuvantu vavawa nova vavadona, ntani ghuye kutuma mvhura kuva hungami naku varunde. ⁴⁶ Nkene tupu ashi ove kwahora tupu mbovo vakuhoro, mfuto yaku fana weni ngaghuka wanenapo? Nampili vafutiti mutero navo mbyo varuwananga vya weno? ⁴⁷ Nkene shi ove kumorora tupu vaghunyoye, vinke tupu walye ghuna ruwanapo vya mulyo? Nampili vapagani navo mbyo varuwananga vya weno? ⁴⁸ Muna hepa kukara na uhungami, yira momu akara Shetu wa muLiwiru mu uhungami.