¹ "Kapishi kukara nkwangu kupangura unyoye, mposhi ngava kapire kukupangura. ² Momu wa dameka kumpanguro ghunyoye, nove mo ngava kakupangura, ntani shimetito osho waruwanitire ghufutite ghunyoye, nove ntjo ngava karuwanita kumfuto yoye. ³ Mukonda munke ghuyiyira nkope oyo yina vindamo mu lintjo lya unyoye, ove ghupire kumona linanga olyo lina vindamo pamantjo ghoye? ⁴ Ntani weni omo utantare unyoye ashi, ' Renka nukughupe linanga olyo lina vindamo pamantjo ghoye,' nkeneshi pamantjo ghoye napo kuna vindamapo mananga? ⁵ Ove kuku twenya ashi muvi-kupaki! Pamuhovo ghupa mananga pamantjo ghoye gha kare ana kene, ntani uvhura kumona nawa mukughupa mananga pamantjo gha unyoye. ⁶ Walye mwa tapanga ku mbwa ovyo vya pongoko, ntani walye mwa vhukuminanga makwarara ghenu kumeho ya vinguru. Mukonda shi ngava ghalyatangera na makondo ghavyo, ntani ngavipiruka kukwenu ngavi kupapawire marutu ghenu. ⁷ "Romba, ngava kupa. Shana-shana, ngaghu viwana. Ngongora, ngava kugharura. ⁸ Kehe ghuno wakuromba, vakona kumupa; Kehe ghuno wakushana, akona kuwana; ntani kehe ghuno waku ngongora, vakona kumugharura. ⁹ Ndi are ghumwe mukatji kenu, nkene monoye kuna rombo mboroto, makura ghudamune liwe ghutape? ¹⁰ Ndi nkene kuna rombo ntjwi, ove ghudamu liyoka ghutape? ¹¹ Mpo ngolishi, nampili momu wakara shi ove muntu wa urunde, ano ngoli wayiva mutapa ma ushwi ghamawa ku vana voye, makura weni ngoli omo ngapira kupitakana Shenu wa muliwiru kutapa ma ushwi ghamawa kwovo vaku shungida kukwendi? ¹² Mpo ngoli shi, kehe vino muna shana vantu vavi ruwane kukwenu, nanwe mwa kona kuviruwanena vantu, weno mo dina kutanta veta na nkango dava porofete. ¹³ "Ngena ghupitire mulivero lyalididi. Mukondashi livero lya linene kwa yashama unene yayo yaku twara kulidjonauko, ntani vantu vava yingi ndjo vakwamanga. ¹⁴ Ntani nka livero lya lididi unene kwa kara nka na ndjira yayi didi unene ntani yino ndjira ya kutwara ku liparu, yayo udito unene kuyendamo, ntani vantu vasheshu vakuyiwana vayendemo. ¹⁵ Vangarenu karenu muna kotoka kuva porofete vavipempa, vavo ngavaya kukwenu kuna dwata shipapa namu shishwi sha ndjwi nane ngoli munda kuna karamo mambungu gha ndjara ghaku papaura vantu. ¹⁶ Vavo ngamuva dimburura kuvi yimwa vyavo. Vya ushili vantu kuvhura kunyanga mandjembere kushitondo sha migha ndi?, ndi kuvhura ku nyanga ukuyu ku shitondo sha kandjata ndi? ¹⁷ Mo vyakara ngoli ashi, shitondo shashiwa sha kona kuyimwa nyango ya yiwa, ntani shashidona kuyima nyango ya yidona. ¹⁸ Shitondo shashiwa naku vhura shi kuyima ko nyango yayidona, ndi shitondo sha shidona na kuyima ko shi nyango yayiwa. ¹⁹ Kehe shino shitondo shakupira kuyima nyango yayiwa vakona kushi teta shitundepo ntani vahepa kushi vhukumina mumundiro wanaruntje. ²⁰ Mpo ngoli shi, vavo ngamu vadimburura mukonda yavi yimwa vyavo. ²¹ Kapishi kehe ghuno wa kughamba ku kwande ashi, 'Hompa, Hopma,' ngaka ngena mu untungi wa liwiru, nane ngoli nkwandi mbovo tupu vaku ruwana viruwana vyava Vava vamu liwiru. ²² Opo ngalitika mo linya liyuva vantu vavayingi ngava kaghamba ku kwande ashi, 'Hompa, Hompa, nane kapishi mu lidina lyoye katu porofetanga, mulidina lyoye katu tjidanga mpepo dadidona, ntani mulidina lyoye katu ruwananga vitetu vyavinene?' ²³ Ame nganu vatantera ashi, 'Ame ndana kara kapi namuyiva! Tundenu ko ku kwande, anwe vatjoli-veta!' ²⁴ "Mpo ngoli shi, kehe ghuno wa kuyuvha nkango dande ntani ghuye alimburukwe kwa dino nkango, ghuye ngakara yira ndjeghunya mukafumu waku kotoka, ogho atungiro ndjugho yendi pa Liwe. ²⁵ Mvhura yayinene ngayi roka unene, mema gharuhandjo ngagha pupa nankondo, ntani mpepo ya likundungu ngayi yungu unene, ngayi kutoghone mo mu ndjugho yino, ano ngoli yino ndjugho kapi ngayitundapo, mukonda shi kwayi tungira pa Liwe. ²⁶ Ano ngoli kehe ghuno wakuyuva nkango dande ghuye ngapire kulimburukwa kwa dino nkango, ghuye ngafana yira ndjeghunya mukafumu wamu gova ogho atungiro ndjugho yendi pa musheke. ²⁷ Opo ya rokire mvhura yayinene, opo ayire mema gharuhandjo nankondo, ntani opo ya yungire unene mpepo ya likundungu yiku toghone mo, yino ndjugho ayi were palivhu, ayi djonauka kumwe naku hanaukapo." ²⁸ Opo amanine Yesus kughamba dino nkango, mbunga ayi tetuka unene kumarongo ghendi, ²⁹ mukondashi ghuye kwa rongire marongo gha nkondo unene, kapishi yira momu varonganga varongi matjangwa.