¹ Liyuva lyaku kwamako ngura-ngura yayinene, vakurona va vapristeli vavanene navantje na matimbi ghavaJuda ava kuyongo ashi weni omo varuwana mposhi vamu dipaye Jesus. ² Vavo ava mumanga, ava vamu twara, vaka mutape kwa Pilatusi mupangeli wa shirongo. ³ Judas, ogho amutuliro muliyome, opo amonine ashi Jesus vana mutokwere ku mfa, makura akuvere unene kwavi aruwanine, makura avyuta ovyo vimaliva dimuronga ntatu vya Siliveli kuva Pristeli vavanene kumwe na matimbi ghava Juda, ⁴ ghuye aghamba ashi, "Ame na tura ndjo mukutura muliyome muntu wakupira ndjo.'' Ano ngoli vavo ava mutantere ashi, ''Atwe kwato shinka shavyo kukwetu ovyo? Ovyo vikare vyoye naghumoye.'' ⁵ Makura ghuye avhukuma vimaliva vya Siliveli muNtembeli, makura akayenda, arupuka makura aka kumangerera mwene akupondo. ⁶ Vapristeli vavanene avaghupu vimaliva vyaSiliveli makura ava ghamba ashi, ''Kapi vya pulitira mukutura vino vimaliva mushimbangu shaku pungura vimaliva mukonda shi vino vimaliva vya honde,'' ⁷ Vavo opo vamana kukuyonga, makura ava tokora vaghure lifuva lya muntu wa kushonga lirova ngali kare livhango lyaku vhumbika vantunda virongo. ⁸ Mukonda yino lino lifuva ava liruku ashi, ''Lifuva lya honde" dogoro na namuntji lino. ⁹ Mposhi nkango odo aghambire muporofete Jeremiya da hepa kutiliramo, odo aghamba ashi, ''Vavo ava ghupu vimaliva dimurongo ntantu vya Siliveli, yikare ndando yendi kutwara momu va kuyuvire na vaIsrael, ¹⁰ vavo ava vitapa kulifuva lya mushongi wa lirova, yira momu tupu aghambire Hompa name.'' ¹¹ Makura Jesus aka moneka kumeho yamupangeli wa shirongo, ghuye amupura ashi, ''Ove Hompa wa vaJuda ndi?'' Jesus alimburura ashi, ''Ove ghuna kughambo vino vya weno.'' ¹² Ano ngoli opo vamupulire vamurundire vaPristeli vavanene na matimbi ghava Juda, ghuye kapi ava limburulire. ¹³ Pilatusi amu tantere ashi, ''Ove ne kapi ghuna kuyuvha odino nkango nadintje vana ku kurundira ndi?'' ¹⁴ Ano ngoli Jesus kapi alimburulire nampili nkango yimwe, mupangeli wa shirongo atetuka unene. ¹⁵ Kehe ruvede rwa shilika sha Paska mupangeli ghuye kumangurura nkwate ghumwe ogho vana toroghora vantu. ¹⁶ Pashirugho shino mudorongo kwa kaliremo nkwate wamurunde wa lidina Barabbasi. ¹⁷ Opo ya pongire mbunga ya vantu kumwe tupu, makura Pilatus pura ashi, ''Are muna shana ogho nuvhura kumangurura aye kukwenu?'' Barabbas, ndi Jesus oghu vatwenyanga ashi Kristusa?'' ¹⁸ Ghuye ayivire ashi vavo kwamu tapire Jesus kukwendi mukonda ya mfudu. ¹⁹ Ghuye shimpe kuna shungiri kushipuna sha kupangulira, makura mukamali wendi atumu nkango ku kwendi ashi, ''Kapishi ghuruwane kehe vino kukwendi ghuye kwato ndjo. Mukondashi ame kuna hepa unene namuntji kundjodi oyo na mono yaku hamena kukwendi.'' ²⁰ Vakurona vavaPristeli vavanene na matimbi ghava Juda ava shongaghura mbunga kumwe naku vatantera ashi vashungide Barabbas wamu korokotji vamu shuture, ano ngoli Jesus vamudipaye. ²¹ Makura mupanguli pura mbunga ashi, ''Pakatji kavano vantu vaviri are muna shana ogho numangurura aye kukwenu?'' Vavo ava ghamba ashi, "Barabbas''. ²² Pilatusi apura mbunga ashi, ''Vinke nuvhura kuruwana ghuno Jesus ogho vatwenyanga ashi Kristus?'' Navantje ava limburura ashi, ''Mupamparere kushilivindakano.'' ²³ Ghuye ava pura ashi, ''Mokonda munke, ghudona munke ogho aruwana?'' Ano ngoli vavo ava yiyire ngoli unene ashi, ''Mupamparere kushilivindakano.'' ²⁴ Pilatusi opo amonine ashi ghuye kwato nka ovi avhura kuruwana, ndjorongani yayinene kuna kutameka, ghuye aghupu mema, akukushu kuma ghoko ghendi kumeho ya vantu navantje, makura aghamba ashi, ''Ame kwato ndjo kuhonde ya ghuno muntu. Namuvantje muna vimono. ²⁵ Vantu navantje ava ghamba ashi, ''Honde yendi yitekere tupu papetu kumwe navana vetu.'' ²⁶ Makura ghuye amangurura Barabbasi ayende kukwavo, ano ngoli Jesus atapa vamushepure naku mutoghona makura amutapa vakamupamparere kushilivindakano. ²⁷ Kutunda pano vakavita va Pilatus ava twara Jesus mushinyanga mulivango lyaku pangwira omo ya pongire mbunga ya vakavita navantje. ²⁸ Vavo ava mushutura vyuma vyendi makura ava mudwateke lirwakani lya ligeha. ²⁹ Vavo ava ruwana nkata ya miya ava mudwateke kumutwe wendi, ntani ava damuna rughu ava tapa kukwendi akwaterere kulighoko lyendi lya rulyo. Vavo ava tongamene kumeho yendi kumwe naku mushepa ntani naku mushwaghura, naku ghamba ashi, ''Mfumwa, kwa Hompa wava Juda!" ³⁰ Vavo ava mutipiri manyenye, naku mushakana rughu vamu toghoniteko mumutwe wendi. ³¹ Opo vamanine kumushepa naku mushwaghura makura ava mushutura lirwakani lyendi ava mudwateke vyuma vyendi, ava mutwara vaka mupamparere kushilivandakano. ³² Opo varupukiremo, ava wana murume ogho atundiro kushirongo sha Kirene wa lidina Simon, ava mutininiki adumune shilivindakano sha Jesus ayende kumwe navo. ³³ Dogoro ava katika kulivhango vatwenyanga ashi Gologotha, lina kutanto ashi '' Livango lya vifupa-fupa.'' ³⁴ Vavo ava tapa vinyu ya ghururu yaku vhonga na nyangwe kukwendi anwe. Amakeremo, ghururu unene, ghuye ashwena kuyinwa. ³⁵ Opo vamanine kumupampara kushilivindakano, makura ava mushutura vidwata vyendi vavi kushakanene vikare vya fungu-fungu, ³⁶ makura vavo ava shungiri vakunge rutu rwendi. ³⁷ Pawiru yaMutwe wendi ava tjangapo nkango ghundjoni wendi, dina kutanto ashi, ''Ghuno ndje Jesus, Hompa wava Juda.'' ³⁸ Ghuye kwa mupamparelire kushilivindakano kumwe nava kawidi vaviri, ghumwe kurulyo rwendi ntani ghumwe kurumontjo rwendi. ³⁹ Vantu ovo vapitiro mundjira kwamu tukire naku mushwaura, kumwe naku puka dimutwe davo. ⁴⁰ vavo ava ghamba ashi, ''Ove waghambiro ashi ngaghu djonaghurapo yino Ntembeli makura ngaghu yitunga tupu mumayuva matatu, kuyoghore sha ngoli naghumoye! Nkeneshi ushili ove Mona Karunga, tundako oko kushilivindakano!'' ⁴¹ Momo munkedi yaku fana weno vakurona vavapristeli vavanene navo ava mushwaura, kumwe navarorongi matjangwa na matimbi ghava Juda, ava ghamba ashi, ⁴² "Ghuye kwayoghora vaghunyendi, mukonda munke ana kupira kukuyoghora mwene. Nkeneshi ghuye ndje Hompa wava Israel. Murenkenu atundeko sha ngoli kushilivindakano, atwe ntani ngatu pura mumwendi. ⁴³ Ghuye kwahuguvara mwaKarunga, renkenu Karunga wendi amupopere weno, tuvi kenge nkeneshi ushili Karunga wendi kuvhura kumu mangurura. Ntani ghuye kwaghambire nka ashi, 'Ame Mona Karunga.'" ⁴⁴ Ntani vano vakawidi ovo vamupamparelire kumwe navo ava ghamba vamushwaghure. ⁴⁵ Kutunda pametaha paviri yakutanga aku kara likuru ndema dogoro paviri ya utatu ku shitenguko. ⁴⁶ Paviha vya viri ya utatu, makura Jesus ayiyiri na liywi lyalinene ashi, "Eli, Eli, Lama Sabaktani?'' kutanta ashi, ''Karunga Wande, Karunga Wande, vinke ghuna kunkengerera?'' ⁴⁷ Vamwe ovo vakaliropo opo vaviyuvire, ava ghamba ashi, ''Ghuye kuna kuyita Eliya.'' ⁴⁸ Mpopo tupu ghumwe wavo aduka aka damune litarasi wona, ali tupiki muvhinyu yaghururu, makura atura kurughu rwa rure, ayerura rughu dogoro kukanwa kendi ghuye apoporeko. ⁴⁹ Makura mbunga ya vantu ava ghamba ashi, ''Mushuvenu akare pentjendi. Tukenge nkeneshi kwa moneka Eliya amuyoghore'' ⁵⁰ Makura Jesus shimpe ayiyiri nka naliywi lyalinene unene makura monyo wendi aghutundumo. ⁵¹ Vaharukako, likeshe lyamu Ntembeli lina taghuka mukatji kutunda kuwiru dogoro palivhu lina kara maruha maviri, ntani akukara likinko livhu udjuni aghu kunyunganga, mawe agha mwakuka mukatji. ⁵² Mbira na mayendo adigharuka, vantu vakupongoka ovo vafo kare ava vhumbuka vakare na monyo. ⁵³ Kunyima ya livhumbuko lya Jesus navo ava vhumbuka vatundemo mumbira, ava yendi ava kangena mushitata shakupongoka, vavo ava kamoneka kuvantu vavayingi unene. ⁵⁴ Vakurona vavakavita lifere ovo vakaliropo vakunge rutu rwa Jesus opo monine livhu kuna kukankama ntani na navintje ovyo vya shorokiro, ava kara naghoma waghunene ava ghamba ashi, ''Vya ushili oghuno kwa kalire Mona Karunga.'' ⁵⁵ Pakalire mbunga yavakamali vavayingi ovo vayimanino kughure ovo vakwamino Jesus vatundiro kuGalileya, vavo kwayire vaya mupakare mbili. ⁵⁶ Mukatji kavo kwa kaliremo Maria Magdalena, Maria vawina va Jakopo ntani Josef, ntani navawina va Jakopu na Johannes vana vaSebedee. ⁵⁷ Opo yatikire ngurova, aya murume wangagho ogho atundiro ku Aremateya, walidina Josef, naye kwa kalire murongwa wa Jesus. ⁵⁸ Ghuye ayendi kwa Pilatusi aka shungida vamupe rutu rwa Jesus. Makura Pilatus ava tantere vatape rutu rwa Jesus ku kwendi. ⁵⁹ Josef aghupu shimpu, ashidingiri pamakeshe ghamape ghama kenu, ⁶⁰ aka vhumbika shimpu muliyendo lyendi lyalipe olyo awa payikire mwene lyamu liwe. Makura ashindumwiniko liwe lyalinene kulivero lya mbira makura aka yenda. ⁶¹ Maria Magadalena ntani na Maria ghunyendi navo mpo vakalire, kwa shungilire munda ya ntoko vakengere. ⁶² Liyuva lyaku kwamako, kwa kalire liyuva lyaku kuwapayikira, makura vakurona Vavapristeli vavanene na vaFarisayi ava pongo kumwe kwa Pilatus. ⁶³ Vavo ava ghamba ashi, ''Mukalikuto, atwe kuna vhuruka ashi mupukiti opo akalire ghuye shimpe muyumi, kwa ghambire ashi, 'Kuruku rwa mayuva matatu nganu kavhumbuka kughufe.' ⁶⁴ Mpongoli shi renka vakunge naku nomena mbira yendi dogoro ngapapite mayuva matatu, varongwa vendi kuvhura vaka vyukeko vaya vakemo rutu rwendi makura ngava tantere vantu ashi, 'Ghuye kavhumbuka kughufe,' ano ngoli vimpempa vyaku hulilira ngavi donapa unene kupitakana vyaku hova.'' ⁶⁵ Pilatus ava limburura ashi, ''Katurenuko vakavita. Yendenu muka kengere naku nomena naku takamita yino mbira.'' ⁶⁶ Vavo ava yendi vaka kunge mbira, naku dekako limuwe naku turako vakungi.