¹ Opo lyapitire liyuva lya Sabata, ngura-ngura yaku kwamako ya liyuva lyaku hova mushivike, Maria Magdalena na Maria ghunyendi ava meneke ngura-ngura vaka kengeko ku mbira. ² Va kengako, kuna kara likinko livhu lyalinene, muEngeli waHompa kwa tunda mu liwiru, aya aghandumuna liwe litundeko, makura ashungiripo. ³ Ghuye kwa monekire yira shite sha ruvadi, ntani vyuma vyendi kwa monikire ghukenu yira ndaghu. ⁴ Vakavita vaku kunga mbira ava kara naghoma waghunene vavo ava fu shitutu vakare yira vana fu. ⁵ Ano ngoli MuEngeli aghamba atantere vano vakamali ashi, ''Kapishi mukare naghoma, ame nayiva ashi anwe Jesus muna kushana, ogho vapampalire kushilivindakano. ⁶ Mwato muno, ana vhumbukamo, yira momu tupu aghambire. Yenu muya mone livhango omo vamu vhumbikire Hompa. ⁷ Yendenu wangu muka tantere varongwa vendi ashi, 'Ghuye ana vhumbuka kughu fe. Kengenu, ghuye kuna piti kumeho yenu ayende kuGalileya. Oko nko muka vhura kumu wana muka mumone.' Kengenu, anwe kwatenu lighano kwavino naku mutantera.'' ⁸ Vano vakamali makura ava tundu ku mbira wangu-wangu vavo vana kara naghoma ntani oku vana kara naruhafo rwarunene, vavo ava duka vakatantere varongwa vendi. ⁹ Vaharukako ava mono, Jesus kuna kuya kukwavo agwanekere navo, ghuye aghamba ashi, ''Morokenu!" Vakamali ava ya kukwendi, ava mukwata kumpadi makura ava tongamene pangoro vakanderere kukwendi. ¹⁰ Makura Jesus ava tantere ashi, ''Kapishi mukare naghoma. Yendenu muka tantere vaghuni vande vayende kuGalileya. Oko nko nuka gwanekera navo vaka mone''. ¹¹ Vano vakamali vavo mundjira yavo, vayuvhako, ashi vakavita vaku kunga mbira vana yendi mushitata vaka tantere vapristeli vavanene kwa navintje ovyo vya shorokiro. ¹² Vapristeli vavanene mpopo tupu ava gwanekere na matimbi ghava Juda vaku yonge vya kuhamena kwavi vya shorokiro, makura ava tapa vimaliva vyavi yingi kuva kungi vavakavita, ¹³ ava vantere ashi, "Ghambenu ashi, 'Varongwa va Jesus kunaya matiku mbyo vana vaka vadamune rutu rwendi okuno atwe tuna rara'. ¹⁴ Nkeneshi yino mbudi kuyi katika kwa mupangeli, kutu ghamba tupu naye asheghumune mutjima wendi mposhi nanwe ngamu yoghokeremo.'' ¹⁵ Vakavita ava ghupu vimaliva makura ava varuwana yira momu vavantantilire. Oyino mbudi ayi kuhanene muva Juda mbyo yayenda nakuntje dogoro na namutji. ¹⁶ Ano ngoli varongwa vendi vano murongo na-ghumwe ava yendi kuGalileya, kundundu oyo ava tantilire Jesus oko vayenda. ¹⁷ Opo vamu monine, vavo ava tongamene pa ngoro vakanderere kukwendi, ano ngoli vamwe ava tamangere. ¹⁸ Jesus aya kukwavo makura aghamba navo ashi, ''Una nkondo nadintje damu liwiru ntani nadi dapalivhu vadi tapa kukwande. ¹⁹ Mpo ngolishi anwe yendenu mu udjuni naghuntje kumuhoko nadintje karongenu vaka kare varongwa vande. Kava kushenu mulidina lya Vashe, na Mona, ntani na Mpepo ya Kupongoka. ²⁰ Kavarongenu ngava limburukwe kwa navintje ovyo namutantera. Kengenu, Ame nganu kara papenu kehe kuno - kehe pano, dogoro kughuhura wa udjuni.