¹ Opo amanine Jesus kughamba dino nkango dendi nadintje, ghuye atantere varongwa vendi ashi, ² ''Muna yiva ashi weno mayuva maviri tupu ana hupoko litikemo liyuva lya kudana shipito sha Paska, makura Mona Muntu ngava mutapa vamupamparere kushilivindakano.'' ³ Makura vapristeli vavanene na matimbi ghava Juda ava pongo kumwe mumbara ya mukurona wava vapristeli, wa lidina Kayifasi. ⁴ Ava pongo vaku yonge naku kuyuvha ashi vakwate Jesus muka horere-hore makura vamu dipaye. ⁵ Vavo ava ghamba ashi, "Ano ngoli kapishi vishoroke paruvede rwa shilika sha Paska, mposhi yipire kukarapo ndjorongani mumbunga ya vantu.'' ⁶ Jesus kwa kalire muBetani mumundi wa Simoni wavingondwe, ⁷ ghuye kwa shungilire kushitafura, makura mukamali aya kukwendi ana kwaterere likende lyaliwa omo ghakalire mahadi ghandiro unene, makura aghatere pa mutwe wendi. ⁸ Varongwa vendi opo vamonine vino, ava garapa unene ava ghamba ashi, ''Mukonda munke ghuna kugha hepekera weno? ⁹ Ghano maghadi ghandiro ndi kuna kagha-ghulita kundando ya kuyeruka tukawanemo vimaliva vyaviyingi tuka tape kuvahepwe.'' ¹⁰ Makura Jesus, opo adimburulire vino, ghuye ava tantere ashi, ''Vinke muna kuhepekera ghuno mukadi? Mbyovi ana kuruwana ghuwa ku kwande ndi. ¹¹ Anwe ngamutunga kumwe navahepwe kehe kuno kehe pano, ano ngoli kapi ngamu kara name kehe pano kehe kuno. ¹² Ghuno mukadi kuna tere akwite ghano maghadi parutu rwande, ghuye kuna viruwana vino muku wapayika lihoreko lyande. ¹³ Vya ushili naku mutantera ashi, kehe kuno ngava kayuvita yino Mbudi ya Ruhafo mu Udjuni naghuntje, navi ana ruwana ghuno mukamali ngava kavighamba ngavi kakare umbangi wendi. ¹⁴ Ghumwe wa varongwa vendi vano murongo navaviri, wa lidina Judas Isakalyoto, ayendi kuva kurona vavaPristeli ¹⁵ aghamba ashi, ''Vinke ngamu vhura kutapa ku kwande mposhi ame nganu tape Jesus ku kwenu?'' Vavo ava varura vimaliva vyaku tika ku dimurongo ntatu da Siliveli ava tapa ku kwendi. ¹⁶ Kutunda mpopo ghuye ashana mpito ashi weni omo avhura kumutapa ku kwavo. ¹⁷ Muliyuva lyaku hova kushirugho sha kuduva mboroto yaku pira vishashita varongwa vendi avaya kwa Jesus ava mupura ashi, ''Kuni nko ghuna horo oko tuvhura kuwapayikira shilika sha Paska?'' ¹⁸ Jesus ava tantere ashi, ''Yendenu mushitata kwa ghuno mukafumu ghumwe kamu tanterenu ashi, 'Murongi kuna ghamba ashi, ''Shirugho shande kuna kutikamo. Ame kuna kuya danena shilika sha Paska mumundi ghoye kumwe na varongwa vande.'''''' ¹⁹ Varongwa vendi ava ruwana yira momu ava tantilire Jesus, ava yendi vaka wapayike ndya dashilika sha Paska. ²⁰ Opo yatikire ngurova, makura Jesus ashungiri alye kumwe na varongwa vendi murongo navaviri. ²¹ Vavo vana shungiri kuna kulya, Jesus aghamba ashi, ''Vya ushili naku mutantera ashi ghumwe mukatjikenu ndje ngaka nturo muliyome.'' ²² Opo vayuvire vino vavo ava kara naliguvo unene, makura kehe uno akupura pamwene ashi, ''Vya ushili kapishi me, Hompa.'' ²³ Ghuye alimburura ashi, ''Ndjeghu nakulya naye pano pa shisha shimwe tupu ndje nga nturo muliyome. ²⁴ Vino vya kona kushoroka kwa Mona Muntu, yira momu tupu vavitjanga. Ano ngoli lihudi lya linene kwa muntu ogho ngaka turo Mona Muntu muliyome! Hasha tupu muntu waweno ndi kapi vamu shampuruka.'' ²⁵ Judasi, ogho aka mutuliro muliyome amupura ashi, ''Are mwene ogho ame, Murongi ndi?'' Jesus alimburura ashi, ''Ovyo naghu moye ghuna kuvighambo.'' ²⁶ Vavo kuna kulya, Jesus adamuna mboroto, ayi kandayiki makura ayi tete ayi bamaghura. Ghuye ayi damuna atapa kuvarongwa vendi makura aghamba ashi, "Ghupenu, lyenu. Oruno ndo rutu rwande.'' ²⁷ Makura aghupu nkinda atapa mpandu ku Vashe, makura atapa kuvarongwa vendi, ghuye aghamba ashi, ''Nwe-numo, namuvantje. ²⁸ Yino ndjo honde yande yakuyita ligwanekero lyalipe, oyo ngayitekero vantu vavayingi ngava wane lidongononopo lya ndjo davo. ²⁹ Ano ngoli ame kuna kumutantera ashi, ame kapi nka nganu vhura ku nwa vinyu ya mandjembere ghamu shikunino shino, dogoro ngali tikemo liyuva omo nganu kanwa vinyu yayipe kumwe nanwe ku Vavava mu Untungi waliwiru.'' ³⁰ Opo manine kuyimba rushumo rwaku tapa mpandu, makura ava yendi kuNdundu ya Maghuywe. ³¹ Makura Jesus ava tantere ashi, ''Namuvantje kuna kuyenda mukakuhanauke muka tunde kukwande kungurova yanamuntji mukonda yande, mposhi matjangwa atikiliremo ogho atanto ashi, 'Ame nganu dipaya mushita wa ndjwi makura ghutanga wa ndwji ngaghu kuhanaghuke.' ³² Ano ngoli kuruku nganu kavhumbuka, makura nganupita kumeho yenu nganu yende ku Galileya.'' ³³ Makura Peturus aghamba ashi, '' Nampili navantje ngava kushuve ngava kulimbe nove, ame kapi nganu kushuva nutundeko kukoye.'' ³⁴ Jesus amu tantere ashi, ''Vya ushili naku kutantera ashi, kumatiku ghana muntji, kumeho shiyiye shikondomboro, ove ghuna kanana rukando rutatu ashi kapi wa ndjiva.'' ³⁵ Peturus amutantere ashi, ''Ame nampili kuna fu nove nawa tupu, ame kapi nganu kanana ashi kapi nakuyiva.'' Varongwa vendi navantje ava ghamba nkango daku kufana. ³⁶ Opo atundirepo Jesus kumwe na varongwa vendi ava yendi kushipata sha lidina Gesemane makura atantere varongwa vendi ashi, ''Shungirenu mukare pano ame tanko nuyende kunya nukaraperere.'' ³⁷ Ghuye makura apitura Peturus ntani na vana vaSebedeus vaviri ayende navo ghuye kuna kara na liguvo unene ntani monyo wendi ghuna mupatakana. ³⁸ Makure ghuye ava tantere ashi, ''Monyo wande ghuna kara na liguvo unene, kushana ku fa. Karenu mpo pano anwe mukare muna vangara kumwe name.'' ³⁹ Ghuye ashwene kumeho akunape navo, makura aghu kaghomba shipara mulivhu, kuna kuraperera. Ghuye aghamba ashi, "Vava, nkene shi kuvhura, renkenu yino nkinda yinkunduruke. Ano ngoli, kapishi mbyovyo na panga, nane ngoli mpangera yenu yitikiliremo.'' ⁴⁰ Opo amanine aka vyuka kuvarongwa vendi kuya vawana vanarara, ghuye atantere Peturus ashi, ''Weni, kapi ghuna kuvhura kuraperera name nampili ghure waviri yimwetupu? ⁴¹ Rapererenu ntani karenu muna vangara mposhi kapishi muwere mumasheteko. Monyo ghuna shana ntani ghuna rerupa, ano ngoli rutu kapi runa kuvhura mwato nkondo.'' ⁴² Ghuye ayendi akunapa navo rukando rwaghuviri aka raperere. Ghuye araperere ashi, "Vava, yino nkinda naku vhurashi yikupitire ame nahana kunwamo ndi, hawe ruwanenu viruwana vyenu vitikiliremo." ⁴³ Ghuye aka vyuka nka shimpe kuya vawana vana porokere muturo, ntani turo tuna vakwata unene kapi vana kuvhura kupahura mantjo. ⁴⁴ Ghuye ava shuvu nka shimpe ayendi akarapere rukando rwa utatu, avyukuruka nka ndjoyo ndapero. ⁴⁵ Kutunda po aka vyuka kuvarongwa vendi ava vatantere ashi, ''Anwe ne kuna rara ndi kuna kupwiyumuka? Kengenu, shirugho shina tikimo, Mona Muntu kuna kana kuyenda vamutape mumaghoko ghavantu va ndjo. ⁴⁶ Shapukenu weno, tuyendeko. Kengenu, oghu ana kunturo muliyome kuna kuya pepi ana kara.'' ⁴⁷ Ghuye shimpe kuna kughamba vamonako tupu, Judas, ghumwe wa varongwa vendi, ana yatiki. Ghuye kwa yire na mbunga yayinene oyo yamu kwamino kumwe nava Pristeli vavanene ntani na matimbi ghava Juda. Vavo kwa shimbire marufuro ntani na dimuramu. ⁴⁸ Murume ogho atuliro Jesus muliyome kwava tantelire shiyivo ashi, ''Ndjeghu nuka ncumita ndje ndjegho. Ndje muka kwata.'' ⁴⁹ Mpopo tupu naye ayatiki makura ayendi kwa Jesus aghamba ashi, ''Moro, Murongi!'' makura amuncumita. ⁵⁰ Jesus amutantere ashi, ''Muholi, ruwana wangu ovyo ghuna yere.'' Makura vanya vavo avaya kukwendi, ava mumanga kuma ghoko, ava mukwata. ⁵¹ Vakengako tupu, muntu ghumwe ogho akaliro na Jesus kuna kukwata mushintjwako shendi, kuna kupweyuramo rufuro rwendi, makura akankara litwi litundeko lya mukareli ghumwe wava Pristeli vavanene. ⁵² Makura Jesus aharukiri murongwa wendi ashi, ''Vyutiramo turamo rufuro roye mushintjwako shoye, kehe ghuno waku rwanita na rufuro nga fa mfa da rufuro. ⁵³ Ove kuna kughayara ashi ame naku vhurashi kutantere Vavava, vatume Engeli vakurwa vita vakutika mayovi hambo-ghumwe kwavano vana shano kunkwata ndi? ⁵⁴ Ovino vina kona kushoroka ntani, mposhi matjangwa ghatikilire?'' ⁵⁵ Makura Jesus apura mbunga ashi, ''Anwe kunaya na marufuro na dimuramu kukwande muya nkwate yira muna widi ndi? Kehe pano ame kanu shungiranga muNtembeli denu numuronge, ano ngoli kapi mwa nkwatire. ⁵⁶ Ano ngoli navintje vino vina hepa kushoroka ntani mposhi matjangwa ghava porofete ghatikiliremo.'' Makura varongwa vendi navantje ava mushuvu vaka duke kehe ghuno na ndjira yendi. ⁵⁷ Makura opo vamu kwatire Jesus ava mutwara kwa Kayifasi mukurona wava Pristeli vavanene, oko vapongire varongi matjangwa na matimbi ghava Juda. ⁵⁸ Makura Peturusi naye ava kwama muruku kadidi-kadidi dogoro naye aka ngena mulivhango olyo vapanguliranga vaPristeli vavanene. Naye angene munda ashungiri aterere mpanguro na vitundwamo. ⁵⁹ Vakurona vavaPristeli vavanene kumwe na vapanguli kwashanine vambangi vatape umbangi wavi mpempa kwa Jesus mposhi vamu tokorere ku mfa. ⁶⁰ Vantu vavayingi kwayire vatape umbangi wavi mpempa, ano ngoli kapi vawanine ghundjoni kehe ghuno ⁶¹ vavo kwa ghambire ashi, ''Ghuno murume kuna ghamba ashi, 'Ame kuvhura kudjonaurapo yino Ntembeli yaKarunga ntani kuvhura kuyitunga yipwe mumayuva matatu.'' ⁶² Mukurona wa vaPristeli ashapuka amu tantere ashi, ''Lilimbururo munke ghuna kara nalyo? Vinke ghuvhura kughambako kwa navintje ovino vana kukurundira?'' ⁶³ Jesus amwena teyete. Mukurona wa vaPristeli amutantere ashi, ''Ame kuna kukutantera ghughambe ushili ntani yiva ashi Karunga kuna kuyuvha navintje ghuna kughamba pano, tutantere ushili nkeneshi shili ove Kristus, Mona Karunga.'' ⁶⁴ Jesus alimburura ashi, ''Uhunga, Ove naghumoye ghuna ghambo vya weno. Ame kuna kumutantera ashi, opo ngashitikamo shino shirugho anwe ngamu kenga Mona Muntu kuna shungiri ku rulyo rwa Karunga wa nkondo nadintje kuna kupangera, ntani anwe ngamu mumona opo ngaya pamaremo mu untungi waliwiru.'' ⁶⁵ Makura mukurona wa vaPristeli vavanene ataura vyuma vyendi aghamba ashi, ''Ghuye kuna shwaura Karunga! Mukonda munke tuka shanena nka vampangi vavayingi? Kengenu, weno kehe ghuno ana yuvhu omo ana shwaura Karunga. ⁶⁶ Anwe weni omo muna kughayara?'' Vavo ava limburura ashi, ''Ghuno mfa dina mutamba.'' ⁶⁷ Makura vavo ava mutipiri manyenye mushipara kumwe naku mutoghona na ngomi, ntani vamwe ava mukapura nkushi na maghoko, ⁶⁸ vavo ava ghamba ashi, ''Porofeta ghuneye ashi, are ana kutoghono mukatji ketu, nkeneshi ushili ove Kristus?'' ⁶⁹ Peturusi kwa shungilire pandje ya ndjugho ya kupangulira, makura mukareli ghumwe wa mukamali aya kukwendi aghamba ashi, ''Ove muntu ghumwe wa Jesus waku Galileya.'' ⁷⁰ Ghuye akanana kumeho ya navantje, kumwe naku ghamba ashi, ''Ame kapi nayiva ashi vinke ghuna kughamba.'' ⁷¹ Opo ayendire apite arupuke pandje ya livero, agwanekere na mukareli ghumwe wamukamali ogho amumonino kumwe na Jesus ghuye atantere vantu ovo vakaliro palivhango ashi, ''Ghuno mukafumu naye ghumwe wa vantu va Jesus waku Nazareti.'' ⁷² Ghuye shimpe nka akanana kumwe naku ghana ashi, ''Ame kapi namuyiva ghuno mukafumu!'' ⁷³ Kuruku rwa shirugho shashifupi tupu nka ovo vayimanino opo palivhango avaya pepi na Peturus ava ghamba ashi, ''Vya ushili ove ghumwe wavo, mukonda ya rughambito roye.'' ⁷⁴ Makura ghuye atameke kufinga na kuhana ashi, ''Ame kapi namuyiva ghuno mukafumu,'' mpopo tupu makura shikondomboro ashiyiyi. ⁷⁵ Makura Peturus avhuruka nkango odo aghambire Jesus ashi, ''Namuntji kumeho shikayiye shikondomboro ove ghuna kanana rukando rutatu ashi kapi wa ndjiva ame.'' Makura ayendi arupuka pandje akalira unene.