¹ "Untungi waliwiru kwa fana yira mbovanya vakadona murongo ovo va shimbiro ramba davo vayende vaka taterere mukwali. ² Vavo kwa kalire vakadona vatano vavagova ntani vatano vaku kotoka. ³ Vano vakadona va vagova opo vadamunine ramba davo, kapi vashimbireko maholi ghaku tura muramba. ⁴ Ano ngoli vano vakadona vaku kotoka vavo ava damuna ramba davo ntani ava shimbiko nka ndini da maholi ghaku tura muramba davo. ⁵ Makura mukwali aku ranga kuya kapi ayatikire wangu, makura vavo navantje avarara vaporokere muturo. ⁶ Makura pakatji kamatiku ava yuvhu liywi kuna kuyiyira ashi, 'Kengenu, mukwali anaya tiki.' Yendenu muka gwanekera naye.' ⁷ Makura vano vakadona navantje ava rambuka vatwede ramba davo. ⁸ Vakadona vavagova ava rombo maholi kuva kadona vakukotoka ashi, 'Tupenuko maholi mukondashi ramba detu kuna kudima.' ⁹ ''Ano ngoli vakadona vakukotoka ava limburura naku ghamba ashi, 'Hawe kapi ghavhura kugwaneka kukwetu ntani nanwe, vya viwapo tupu yendenu mukaghure kwavo vana kughulito.' ¹⁰ Tupu vatundirepo vayende vakaghure maholi, mukwali ayatiki, ovo vamutatiliro ava ngene kumwe naye vakadjobwane shipito shankwara, makura ava ghara nakupata livero. ¹¹ Kunyima opo vayatikire vano vakadona vavagova navo ava yiyiri naku ghamba ashi, 'Hompa, Hompa, natwe tugharure. ¹² Ano ngoli ghuye alimburura kumwe naku vatantera ashi, 'Vya ushili naku mutantera ashi, Ame kapi namu yiva anwe.' ¹³ Karenu muna kotoka, mukondashi kapi muna yiva liyuva na shirugho na viri. ¹⁴ ''Untungi wa liwiru kwa fana yira murume ghunya ashanino kuyenda ghugenda kushirongo shapeke. Ghuye ayita vakareli vendi atapa limona lyendi ku kwavo. ¹⁵ Kwaghu wakuhova ghuye atapako mafere matano, waghuviri ghuye atapako mafere maviri, ntani waghutatu ghuye atapako lifere limwe. Kehe ghuno kwa wanine kutwara mughukonentu wendi, makura ghuno murume ashapuka ayende muruyendo rwendi. ¹⁶ Ghuno vapire mafere matano ayendi aka ruwanite yino shiringa dogoro aka wedererapo nka mafere matano. ¹⁷ Mo nka ngoli ogho vapire mafere maviri ayendi aka ruwanite yino shiringa dogoro aka wedererapo nka mafere maviri. ¹⁸ Ano ngoli oghu vapire lifere limwe, ghuye ayendi, aka tima likwina, makura aka vhumbikemo naku horeka vino vimaliva vya muhona wendi. ¹⁹ Opo shapitirepo shirugho shashire unene muhona makura aka vyuka aya wane vakareli vendi kumwe naku yakenga limona lyendi ashi weni omo varuwana. ²⁰ Mukareli wendi oghu vapire mafere matano atapa kukwendi ntani atapa nka mafere matano ogho awederelirepo. Ghuye aghamba ashi, 'Muhona, ove kwatapire kukwande mafere matano. Kenga, ame mbyo na wedererapo nka mafere matano.' ²¹ ''Muhona wendi amutantere ashi, 'Waruwana nawa, ove mukareli wamuwa wa walipuro waku limburuka! Mukondashi wa pakera mbili vino vyavi sheshu. Ame nganu wederera limona lya liyingi mulipangero lyoye. Ngena ngaghu viyare kumwe na muhona ghoye.' ²² ''Oghu vapire mafere maviri naye aya kwa, ' Muhona wendi agahamba ashi, 'Muhona, ove kwa tapire kukwande gahno mafere maviri. Kenga, Ame mbyo naka wedererapo nka mafere maviri.' ²³ ''Muhona wendi amutantere ashi, ''Waruwana nawa, ove mukareli wamuwa walipuro walihuguvaro! Ove kwa pakera mbili lino limona lyalisheshu. Ame nganu tapa limona lya liyingi mulipangero lyoye. Ngena ngaghu viyare na muhona ghoye.' ²⁴ ''Ntani oghuno awanino lifere limwe naye ayatiki makura aghamba ashi, 'Muhona, Ame nakuyiva ashi ove muntu wamukukutu. Mukondashi ove kushana kuyangura ovyo wapira kutapeka, ndi kuwana ovyo wapira kukuna. ²⁵ Ame nakara naghoma, mbyo nayenda nuka horeke vimaliva vyoye mulivhu. Kenga, limona lyoye nalintje lino.' ²⁶ ''Makura muhona wendi amutantere ashi, Ove muruwani wa murunde na ghudwa, ove wayiva ashi ame kuwana ovyo napira kutapeka ntani kuyangura ovyo napira kukuna. ²⁷ Mukonda munke wa pilire kutura vimaliva vyande mu mbanga, mposhi nuwanemo viyeramo opo nganu yatika vyavyo vina vhuka. ²⁸ Makura ava mushakana limona lyendi na lintje ava litapa kwaghu akaliro na liyovi limwe. ²⁹ Mpo ngoli shi ogho akaro na limona lya liyingi, ngava kawederera limona lyendi - ngaka kara na limona lya liyingi. Ano ngoli wakupira kuweka limona, nampili kehe shino akara nasho ngava kamu shakana. ³⁰ Mukareli waweno kwato mutompo vakona tupu kumu vhukumina mumundema, omo ngakalira naku kukwetja mayegho.' ³¹ ''Mona Muntu opo ngaya mughuyerere wendi kumwe na vaEngeli vendi navantje, ghuye nga shungira pashipundi shendi sha uHompa mughuyerere wendi. ³² Dimuhoko nadintje ngadi yaponga kumeho yendi, makura ghuye ngahangura vantu ngava kugaunuke, yira moomu apanguranga mushita vindjwi na vimpendje vikugaunuke. ³³ Ghuye ngatura vindjwi vikare kurulyo rwendi, ntani vimpendje kurumontjo rwendi. ³⁴ Makura Hompa nga tantera ovo ngava karo kurulyo rwendi ashi, 'Yenu, anwe vantu va lirago ovo vatungika Vavava, ghupenu ghupingwa wenu wa untungi waliwiru ogho vamu wapayikira kutunda kulitateko lyaghudjuni. ³⁵ Ame nayuvire ndjara amumpa ndya nulye; nafire linota amumpa mema nunwe; Kapi na kalire namararo amumpa mararo; ³⁶ Nakalire nkagi amumpa vyuma nudwate; Navelire mushipangero amuyendi mukandingure mumpakere mbili; Nakalire mudorongo amuyendi mukandingure.' ³⁷ ''Vano vantu vahungami ngava kalimburura naku ghamba ashi, 'Hompa, liyuva munke wa fire ndjara atu kupa ndya ghulye? Ntani wafire linota atu kupa mema ghunwe? ³⁸ Liyuva wapilire mararo atu kupa mararo? Ntani wafire nkagi tukupe vyuma udwate? ³⁹ Liyuva munke wa kalire mushipangero tuye tuya kudingure na kukupakera mbili; wa kalire mudorongo tuye tuya kudingure? ⁴⁰ Makura Hompa alimburura naku vatantera ashi, 'Vya ushili naku mutantera ashi, kehe vino mwa ruwanine kwavano vavadidipo vano vaghuni vande, ame tupu mwavi ruwaninine.' ⁴¹ Makura ghuye ngatantera vakurumontjo rwendi ashi, 'Tundenupo pa pande, anwe mwapwa kufinga, yendenu mumundiro wa naruntje ogho vawapayikira Satana nava Engeli vendi, ⁴² mukondashi nafire ndjara, kapi mwa mpire ndya; Nafire linota, kapi mwa mpire mema nunwe; ⁴³ Nakalire numugenda, kapi mwa mpire mararo; Nakalire nkagi, kapi mwa mpire vyuma nudwate; Navelire mushipangero, kapi mwa yendire muka ndingure mu mpakere mbili; Nakalire mudorongo, kapi mwa yendire mukandingure.'' ⁴⁴ ''Vavo ngava kalimburura naku ghamba ashi, 'Hompa liyuva munke twa kumonine ove kuna kufa ndjara, ndi linota, ndi mugenda, ndi nkagi, ndi kuna kuvera, ndi mudorongo , ntani tupire kukupakera mbili?' ⁴⁵ Ghuye ngaka limburura naku vatantera ashi, 'Vya ushili naku mutantera ashi, kehe vino mwa pilire kuruwanena ghumwe wavano vavadidi, ame tupu mwa pilire kuvi ruwanena.' ⁴⁶ Vano vantu vavadona ngava kayenda mumatengeko ghanaruntje, ano ngoli vantu va vahungami ngava kawana liparu lyanaruntje.''