¹ Jesus arupuka muntembeli aka yende. Makura varongwa vendi ava ya kukwendi ava ya muneyeda matungo gha Ntembeli. ² Ano ngoli Jesus ava limburura na kuvatantera ashi, "Ovino navintje muna kumona? Kuna kumutantera ghushili ashi, kwato nampili liwe limwe tupu olyo ngalihuparo pantunda ya mawe olyo ngava pira kuyungurura ngali pire kubomauka." ³ Kutunda po Jesus ayendi aka shungire pakatji kandundu da ma ghuywe, varongwa vendi ava ya kukwendi mukahore-hore kwa pentjavo ava pura Jesus ashi, "Tutantere, shirugho munke ngavishoroka vyene vino? Viyivito munke ovyo ngavi neyedo ashi pepi ghuna kara ntani tutantere viyivito ovyo ngavi neyedo ashi ghuhura wa udjuni papepi ghuna kara?" ⁴ Jesus ava limburura kumwe naku vatantera ashi, "Karenu muna vangara mposhi kapishi ngava mupukite ngava mushuve muliyome. ⁵ Mbyovyoshi, vavangi ngavaya mulidina lyande. Vavo ngava yaghamba na kukukitaghukira ashi, 'Ame Kristus,' mposhi ngava tware vantu vavayingi muliyome." ⁶ Anwe ngamuyuvha vita na marapoto ghaku kutjoka-tjoka. Anwe karenu muna vangara kapishi ngamu kare naghoma, ovino navintje vina hepa kushoroka; ano ngoli shimpe kapishi ngo uhura wa udjuni. ⁷ Mbyovyo shi dimuhoko ngadi kupiruka-piruka ntani virongo navyo ngavi ngavi kupiruka-piruka ngavi kulimba-limba. Ngakukara lirumbu na likankamo livhu kuma ruha ghakuku shuva-shuva. ⁸ Ovino navintje mbyo ngavi hovo kushoroka vikare viyivito ku udito wa unene. ⁹ Ntani anwe ngava mukwata ngava muhepeke mwa mudona ntani ngava mudipaya. Anwe ngava munyenga vadimuhoko nadintje mukonda ya lidina lyande. ¹⁰ Vavangi ngava punduka vatunde mulipuro, vavo ngava kurapota-rapota kumwe naku kunyenga-nyenga vene na vene. ¹¹ Ntani ngava shoroka vaporofete vavi mpempa ovo ngava pukito vantu vavayingi unene. ¹² Mukondashi urunde ngaghu vhuka unene, shihoro sha vantu vavangi ngashi kara shina tende. ¹³ Ano ngoli ogho ngakaro na lididimiko dogoro ku ghuhura ghuye ngaka paruka. ¹⁴ Ano ngoli yino Mbudi ya Ruhafo ya Untungi wa Karunga vana hepa kuyi yuvita mu udjuni na ghuntje ngayi kare umbangi ku dimuhoko nadintje. Ntani ngaku kakwama uhura wa udjuni. ¹⁵ Ntani nka, opo ngamu mona urunde wa udona mulivhango lya kupongoka, ogho aghambire muporofete Daniel" (Ogho ngavaruro ghano matjangwa nga kwate lighano ovyo ghana kutanta), ¹⁶ "Makura ovo ngava karo mu Judeya ngamu tjwayukire ku ndundu, ¹⁷ kehe uno nga karo pawiru ya ndjugho kapishi nga vyukemo munda yandjugho ashi ngaka damunemo kehe shino, ¹⁸ ntani kehe uno ngakaro kumafuva kapishi nga vyuke ko kumundi ngaka shimbe ko vyuma. ¹⁹ Ano ngoli lihudi unene kwavo ngava karo na vanuke vavakeke vaku yamwa mashini mumayuva ngogho! ²⁰ Rapererenu unene mposhi lino liyuva kapishi ngali kare paruvede rwa kufu ndi muliyuva lya Sabata. ²¹ Shino ngashi kara shirugho shama hepeko ghamanene, ogho ghapiro kushoroka rumwe kutunda pakutanga kwa udjuni, dogoro weno, nampili kumeho kapi ngavi shoroka nka vya weno. ²² Nkwandi vino virugho ngava vifupipite, ndi kwato muntu ogho ngaparuko nga hupepo. Ano ngoli mukonda ya vantu vaKarunga ovo vatoghorora ovino virugho ngava vifupipita. ²³ Kehe ghuno nga ghambo kukwenu ashi, 'Kengenu, Kristus ghuno pano! ndi po, 'Kristus mpwali kunya!' kapishi ngamu vipure. ²⁴ Vana nkore vaKristus na vaPorofete vavimpempa ngavaya vavo ngava ruwana vitetu na viyivito vyavinene, mposhi ngava pukite vantu vavayingi unene, kwa navantje, kumwe na vantu vaKarunga ovo vatoghorora. ²⁵ Kengenu, ame kuna kumu pukurura kumeho ya ruvede. ²⁶ Mpo ngoli shi, kehe ghuno ngamu tantero ashi, 'Kengenu, Kristus mpwali mumburundu.' kapishi ngamu yendemo mumburundu. Ndi ashi, 'Kengenu, Ghuye mpwali munda ya ndjugho,' kapishi ngamu vipure. ²⁷ Yira moomu tupu rwa vemanga ruvadi rwaro kutema unene shite kutundilira ku ghupumeyuva dogoro ku ghutokero, mo ngoli ngaku kara opo ngamoneka opo ngaya Mona Muntu. ²⁸ Kehe kuno ngaku karo shikorama shaku fa, nkoko nko ngagha ponga makuvi. ²⁹ Kuruku rwa shino shirugho shashidito unene liyuva ngali shovagana, kakwedi kapi ngaka tapa ukenu, ntungwedi ngadi wera palivhu ditunde ku liwiru, ntani nkondo damu liwiru ngadi kunyunganga. ³⁰ Viyivito vya Mona Muntu ngavi moneka ku liwiru, ntani dimuhoko nadintje dapa ntunda yalivhu ngadi kara mumalira-nkali. Vavo ngava mumona Mona Muntu omo ana kuya pamaremo muliwiru na nankondo dadinene ntani na ghuyerere wendi wa unene. ³¹ Ghuye ngatuma va Engeli vendi ngava shive rumbendo rwa kudameka unene, makura ngava pongeke vantu vendi vamu udjuni naghuntje ovo vatoghorora kutundilira ku maruha mane ghamu udjuni, oko watamekera udjuni dogoro nkoko waka shaya. ³² ''Kurongenu marongo ghaku hamena ku shitondo sha Ukuyu. Nkene tupu kuna kumona dimutavi dina pumini divareke kushokera ntani mahako kuna kumena, anwe muna yiva kare ashi kurombo pepi. ³³ Nanwe nka, yivenu ashi nkene muna mono navintje vino kuna kushoroka, yivenu ashi ghuye papepi ana kara, kuna kutika pa livero. ³⁴ Vya ushili naku mutantera ashi, ghuno muhoko kapi ngaghupita ngaghu katundepo makura navintje vino vina hepa kushoroka ntani. ³⁵ Liwiru na livhu ngavi ka dongonokapo navintje, ano ngoli ku nkango dande nampili shikomona kapi ngashi katundako. ³⁶ Vya kuhamena lino liyuva na shirugho kwato waku viyiva, vakare vaEngeli vamu liwiru, nampili Mona Muntu naye shi, nkwandi Vashe tupu mbo vaku viyiva. ³⁷ Yira moomu tupu vya kalire pa shirugho sha Nowa, mo nka ngoli ngavi shoroka opo nga moneka Mona Muntu. ³⁸ Kumeho ya shirugho sha ruhandjo vantu kavadjobwananga kumwe na kunwa, naku kwara ntani nama kwareko dogoro liyuva olyo angenine Nowa mushikepa, ³⁹ vavo kwato ovyo vayivireko vyaku hamena ruhandjo dogoro rwaya tikire aruva djonaura po navantje - mo ngoli nka ngaku kara kumeho nga moneke Mona Muntu. ⁴⁰ Vantu vaviri ngava ruwana mulifuva - ano ngoli ghumwe ngava mughupapo, ano ghumwe ngakara mpopo. ⁴¹ Vakamali vaviri ngava twa mahangu mushinu shimwe tupu - ghumwe ngava mughupapo ntani ghumwe ngakara mpopo. ⁴² Mpo ngoli shi karenu muna kotoka, mukonda shi kapi muna yiva shirugho asho ngamoneka Hompa. ⁴³ Karenu muyive vino ashi, nkene shi nturaghumbo wa mundi ghuye ayiva ashi shirugho munke vayanga vakawidi vatjore, ghuye ndi kapi araranga ndi kwa kunganga mundi wendi mposhi kapishi vavhure kutjora vavakemo. ⁴⁴ Mpo ngoli shi, nanwe karenu muna kotoka, Mona Muntu ngamoneka pa shirugho osho ghuna kupira kutaterera. ⁴⁵ ''Ano ngoli mukareli waku limburukwa wamu konentu ogho vatura akunge mundi wamuhona wendi waku tapa ndya pashirugho na ruvede? ⁴⁶ Lirago unene kwaghu ngava yawana ghuye kuna kuruwana viruwana vya muhona wendi. ⁴⁷ Vya ushili naku mutantera ashi, mukareli wa weno ngava mutura ngata kamite limona na lintje lya muhona wendi. ⁴⁸ Ano ngoli nkene shi muruwani wamudona kuna kughayara mutjima wendi ashi, 'Muhona wande kapi ngaya tika wangu,' ⁴⁹ makura atameke kurwanita varuwani va unyendi, naku djobwana kumwe na kunwa vikorwita nava nkorwi, ⁵⁰ makura muhona ayatiki pa shirugho naviri muliyuva olyo vana piri kumu taterera na kuyiva varuwani. ⁵¹ Muhona wavo ngavatengeka naku tetaura marutu ghavo makura ngava vavhukumine kuva korokotji vavikupaki, kuli vhango oko ngava kalira naku kukwetja mayegho.