¹ Makura Jesus atantere mbunga ya vantu ntani na kuvarongwa vendi kuhamena vino. ² Ghuye aghamba ashi, ''Varongi matjangwa ntani na Vafalisayi kwa shungira pashipundi sha Moses. ³ Muna hepa kutikitamo navintje ovyo vana kumuntantera, limburukenu kuveta nadintje muditikitemo. Ano ngoli anwe nakadidi shi kuhonena viruwana vyavo, mukondashi vavo kapi varuwananga ovyo vaghambanga ashi ditikemo nkango davo. ⁴ Ushili ashi, vavo kumanga dimurongerero dadinene daghudito kudamuna, makura vavo vature pamapepe ghavantu. Ano ngoli vavo vavene nakadidishi vakwateko nyara vadamune. ⁵ Vavo kuruwana vya weno mposhi viruwana vyavo vimoneke vantu navantje. Vavo kutjanga veta pamaruvya ghavo na nkango dadinene makura kudwata, ntani vavo kudwata vyuma vyavinene ovyo vatura malimba ghamanene vamoneke kuvantu ashi vakara kwa mfumwa ya Karunga. ⁶ Vavo kwa hora mavango ghamawa ghava mpititi pavipito ntani kwa hora kushungira kuvi puna vyaku memo muSinagoge, ⁷ ntani vavo kwa hora ashi vantu vavamorore na kuva kunda kumavango gha ngeshefa, ntani vavo kwa hora ndi vantu vavayite ashi ''Rabbi' - Murongi. ⁸ Ano ngoli anwe varongi vande narumweshi ngava muyite ashi 'Rabbi',- Murongi, mukondashi anwe murongi ghumwe tupu mwakara naye, ntani ghuye kumutwenya anwe na muvantje ashi vaghuni vendi. ⁹ Ntani anwe kwato muntu ogho ngamu twenya pano palivhu ashi shenu, anwe kwa kara nashenu ghumwe tupu, ghuye kwa kara muliwiru. ¹⁰ Ntani narumweshi ngava muyite ashi 'Muhona,' anwe kwa kara na muhona ghumwe tupu, Kristus. ¹¹ Ano ngoli kehe ghuno wamunenepo mukatji kenu ghuye akona kuruwanena navantje. ¹² Keho ghuno ngaku yeruro mwene ngava kamu didipita, ntani waku kudidipita mwene ngava kamuyerura. ¹³ Ano ngoli lihudi unene kukwenu anwe, varongi matjangwa ntani na vafalisayi, anwe vavikupaki! Anwe kuna kughara untungi wa liwiru ku vantu. Mukonda shi anwe kapi ngamu kangena mo, ntani anwe kapi muna kupulitira ovo vana shano kungenamo ashi vangenemo. ¹⁴ Matjangwa ghamwe kwatanta ashi, (Lihudi unene anwe, varongi matjangwa ntani na vafalisayi, anwe vavikupaki! Anwe kumanapo limona lyamu mandi ghavakadi vakufita vavyavo, ntani anwe kuraperera ndapero dadire unene. Anwe ngamu kawana mpanguro na matengeko ghaghudito unene). ¹⁵ Lihudi unene kukwenu anwe, varongi matjangwa ntani naVafalisayi, anwe vavikupaki! Anwe kuruta lifuta mutware mbudi kuvantu kuma vhango ghakukushuva-shuva, ano ngoli kehe ghuno wakutambura marongo ghenu ghuye kukara naghurunde wa unene ngaka yende mulidjonauko mumundiro wanaruntje kumwe nanwe. ¹⁶ ''Lihudi unene anwe, kukwenu anwe vapititili vavatwiku, anwe kughamba ashi, ''Kehe ghuno waku tapa mughano muNtembeli, kwato mulyo. Ano ngoli kehe ghuno wakughanita ngorodo yamuNtembeli, akona kutikitamo mughano wendi.' ¹⁷ Aghunwe magova na vatwiku! Vinimbyopo vyavinene, ngorodo ndi Ntembeli oyo ya renkitango ngorodo yikare yina pongoka? ¹⁸ Ntani nka ashi, 'Kehe ghuno wakughanita shidjambero, kwato mulyo. Ano ngoli kehe ghuno wakughanita shiruwanita osho vaturapo, akona kutikitamo mughano wendi.' ¹⁹ Aghunwe vatwiku! Vinke vya vinenepo, viruwanita ndi shidjambero osho sharenkitango viruwanita vikare vina pongoka? ²⁰ Mpo ngoli shi, kehe ghuno wakughanita shidjambero ghuye kughanita navintje ovyo vya karopo. ²¹ Kehe ghuno wakughanita muNtembeli ghuye kughanita Ntembeli nayintje kumwe nogho atungomo. ²² Ntani nka kehe ghuno wakughanita liwiru ghuye kughanita na lipuna lyaHompa Karunga ogho ashungiropo. ²³ Lihudi unene anwe, varongi matjangwa ntani na Vafalisayi, anwe vavikupaki! Anwe kutapa vitwa-murongo vya mbuto na muyangu ntani na limona lyenu, ano ngoli anwe mbyo mwa shuva vyavinenepo ku veta ya Karunga - uhungami na nkenda ntani na lipuro. Ovino mbyo mwa hepa kuruwana ntani anwe mwa hana kushuvako vimwe. ²⁴ Anwe vapititili vavatwiku, anwe kudindako vimbumburu pakunwa mema ghadidi ano ngoli anwe nkene kuna kumina ngamero, kumininina navintje! ²⁵ ''Lihudi unene anwe, varongi matjangwa ntani na Vafalisayi, anwe vavikupaki! Anwe kukenita pantunda yankinda na shisha, ano ngoli munda muna kara makurulya na lidovo. ²⁶ Anwe Vafalisayi vavatwiku! Pamuhovo kenitenu munda yankinda na shisha, mposhi pantunda ntani ngapa kara panakene. ²⁷ ''Lihudi unene anwe, varongi matjangwa na vafalisayi, anwe vavikupaki! Anwe muna kara yira mayendo vadika nawa mbyo vaturako peyinde, yaku moneka ghufuuli pantunda, ano ngoli munda kwa yuramo vifupa vyavantu na hando na nyata. ²⁸ Anwe mongoli mwa fana pantunda, anwe kumoneka kuvantu ashi vapongoki ntani vahungami, ano ngoli munda yenu kwa yura ghulingi-lingi na ukorokotji na udini veta. ²⁹ ''Lihudi unene anwe, varongi matjangwa na vafalisayi, anwe vavikupaki! Anwe kutunga mayendo ghavaporofete kumwe naku wapeka mbira davantu vavahungami diwape. ³⁰ Anwe kughamba ashi, "Atwe ndi kwa tungire tuparuke pa shirugho shava kurona vetu, ndi kapi tuna kara na ndjo ya honde davaporofete.' ³¹ Anwe mbyo muna kutapa umbangi kukwenu naghu-mwetu ashi anwe vana vavo vadipayo vaporofete vakare. ³² Mpo ngoli ashi nanwe tikitenumo ngoli ovyo varuwana kare vakurona venu. ³³ Anwe mayoka, anwe rudi rwava mbaroka vaghushungu unene, weni omo ngamu ruwana mposhi ngamu vhure ku kashenduka mpanguro yamumundiro wa naruntje? ³⁴ Mpo ngoli shi, kengenu, amen kuna kutuma vaporofete na vantu vaghukonentu ntani na varongi matjangwa. Vamwe mukatji kavo ngamu vadipaya ntani vamwe ngamu vapamparera kushilivindakano, ntani vamwe ngamu vashepura ngora muSinagoge denu ntani vamwe ngamu vatjida vatunde mushitata yenda shitata. ³⁵ Makura anwe ngamuwana ndjo ya honde ya vantu navantje vavahungami ovo vadipayera muno udjuni, kutunda kuhonde yaAbeli muhungami, dogoro kuhonde yaSakariya mona Berekiya, ogho vadipayire vakurona venu mulivhango lyaku pongoka pakatji ka Ntembeli na shidjambero. ³⁶ Vya ushili naku mutantera ashi, ndjo nadintje dino ngadiya papenu anwe muna kuparuko weno namuntji. ³⁷ ''Jerusalemu, Jerusalemu, ove wa dipaya vaporofete ntani mbyo nka wa toghona mawe vantu ovo vatuma vaye kukoye! Rukando rungashi na shanine kuya kukoye nupongeke kumwe vana voye, yira momu yapongekanga nkuku vitjiyo-tjiyo munda yamavava, ano ngoli ove kapi wavi pakelire mbili! ³⁸ Kenga shi, ndjugho yoye ngayi kara muporongwa. ³⁹ Mbyo ngoli naku kutantera ashi, Ame kapi nka ngaghu nkenga wangu kutunda pano dogoro ngaghu ghambe ashi, 'Lirago unene kwa muntu wakuya mulidina lya Hompa.'