¹ Jesus aghamba nka navo muvifanikito, ashi, ² "Untungi waliwiru kwa fana yira Hompa ghunya awa payikiro shipito sha monendi wakumati sha nkwara. ³ Ghuye kwa tumine vakareli vendi vakatantere vantu ovo vayitire kushito sha nkwara vakwangure kuya, ano ngoli vavo kapi vamonikire. ⁴ Shimpe nka hompa atumu ko vakareli vendi vamwe, ava vatantere ashi, 'Katanterenu vantu ovo kava yita kushipito shankwara ashi, ''Kengenu, ame namana kuwapayika ndya dashipito. Hove kumwe na ngombe dakuneta kadipu kudipaya kare, navintje vina wapa. Yenu kushipito shankwara.'' ⁵ Ano ngoli vavo na mbiliko shi kehe ghuno akayenda na ndjira yendi, ghumwe ayendi ku mafuva ghendi, ntani ghumwe kulimona lyendi. ⁶ Vano vamwe ava kwata vakareli vahompa, vavahepeke na kuva shwaura, ntani naku vadipaya. ⁷ Hompa agarapa unene, makura atumu vakavita vendi vakadipaye ovo vantu vavarunde, ovo vasholiro shitata shavo. ⁸ Ghuye atantere vakareli vendi ashi, 'Shipito shalikwareko shinapu kuwapayika, ano ngoli vantu ovo kavayita kapi shina vawapere. ⁹ Weno yendenu mundjira nadintje kayitenu mbunga ya vantu navantje ovo muvhura kuwana vaye kushipito shankwara.' ¹⁰ Vakareli vendi ava yendi ku mavhango naghantje ava kayita mbunga ya vantu vaye vaya ponge pamwetupu, vantu vavadona ntani nava vavawa. Makura livhango nalintje aliyura vagenda ovo vayiro kushipito shankwara. ¹¹ Ano ngoli opo ayire hompa aya mone vagenda, ghuye amono mukafumu ghumwe ghuye kapi ana dwata vyuma vya likwareko. ¹² Hompa amupura ashi, ''Muholi, weni omo ghuna yendi ghungene mo muno ove wahana kudwata vyuma vya nkwara?' Ano ngoli mukafumu kwato ovyo avhulire kulimburura. ¹³ Makura hompa atantere vakareli vendi ashi, 'Mukwatenu ghuno murume mumumange kumaghoko na kumaghuru, makura mumu vhukumine pandje mu mundema, aka kare namalira-nkali kumwe na ku kukwetja mayegho.' ¹⁴ Vantu vayingi vayita, ano ngoli va sheshu vatoghorora.'' ¹⁵ Makura kutundapo vafalisayi ava yendi vakakuyonge ashi weni omu vavhura kukwata Jesus munkango da mwene. ¹⁶ Makura vavo ava tumu varongwa vavo ku kwendi, kumwe nava kwaHerodesiya. Vavo ava ghamba kwa Jesus ashi, ''Murongi, atwe twa yiva ashi ove wahungama, mbyo wa ronganga marongo ghaKarunga mu ushili mundjira ya uhunga. Ove kapi wapakeranga mbili maghano ghamuntu, ntani ove kapi wakenganga kuvipara vya vantu. ¹⁷ Tu tantere, weni omo ghuna kughayara kwavino? Vyahungama vyaku renka ashi atwe tufute mutero kwa Hompa wa Roma ndi hawe?'' ¹⁸ Ano ngoli Jesus ayivire ashi vavo kuna kara na maghano ghaghurunde makura ava tantere ashi, "Anwe vavikupaki, ame muna shana kusheteka ndi? ¹⁹ Neyedenu shilinga ya shitenda ya mutero.'' Makura ava yita kukwendi shiringa ya shitenda. ²⁰ Jesus ava pura ashi, ''Shipara share ntani lidina lyare lina karopo? ²¹ Vavo ava limburura ashi, "Lya Hompa wa Roma.'' Makura Jesus ava tantere ashi, ''Muna hepa kutapa kwa Hompa wa Roma vininke ovyo vya hameno kwa Hompa wa Roma, ntani muna hepa kutapa kwaKarunga vivinke ovyo vyahameno kwa Karunga.'' ²² Opo vayuvire vino, vavo ava tetuka unene. Vavo ava tundupo vaka yende. ²³ Muliyuva ndyo lyo tupu vaSadukayi vamwe, ovo vaghambo ashi kwato livhumbuko lyava fe, ava ya ku kwendi. Vavo ava mupura, ²⁴ ashi, ''Murongi, Moses kwatanta ashi, 'Nkene murume adohoroka, ghuye kwato vanuke, mughunyendi akona kukwara mukamali wendi mposhi ngaturepo vanuke va mukurwendi.' ²⁵ Mukatji ketu mwa kalire muntu ogho akaliro nava ghunivendi vavarume vatano-na-vaviri. Wa mbeli akwara mukamali makura adohoroka. Ghuye kapi atulirepo vanuke, munyendi aghupu mukamali wa mukurwendi akwara. ²⁶ Munyendi wa uviri naye kwato kapi atulirepo vanuke, wa utatu mushikwavo, dogoro navantje vatano-na-vaviri. ²⁷ Opo va dohorokire navantje, mukamali naye adohoroka. ²⁸ Palivhumbuko lyava fe, oghuno mukamali ware ngaka karopo pavano varume vatano-na-vaviri? Nkene shi vavo navantje vamukwalire.'' ²⁹ Jesus ava limburura kumwe naku ghamba ashi, ''Anwe mwapuka mukondashi kapi mwayiva matjangwa ndi nkondo daKarunga. ³⁰ Mukondashi pa livhumbuko lyava fe vantu kapi ngava kukwara-kwara ndi kwato nkwara. Vavo, ngava kakara yira vaEngeli vaKarunga va muliwiru. ³¹ Vyaku hamena kulivhumbuko lyava fe, nane kapi mwa varura omo atanta matjangwa ku nkango odo aghamba Karunga ashi, ³² 'Ame Karunga waAbrahamu, na Karunga wa Isaki ntani na Karunga waJakopu'? Ghuye kapishi Karunga wava fe, nane ngoli Karunga wa vaka monyo." ³³ Mbunga opo vayuvhire dino nkango, ava tetuka unene ku marongo ghendi. ³⁴ Vafalisayi opo vayuvire ashi Jesus kuna mwenekida vaSadukayi, vavo avaya vaponge pamwe tupu. ³⁵ Ghumwe wavo, murongi waveta, amupura lipuro, lyaku musheteka ashi - ³⁶ "Murongi, veta munke yayinene po kuveta nadintje?'' ³⁷ Jesus alimburura naku vatantera ashi, ''Ghuna hepa ku Hora Hompa Karunga ghoye na mutjima ghoye na ghuntje, na monyo ghoye naghuntje, ntani na ndunge doye nadintje.'' ³⁸ Yino ndjo veta yayinene po ntani ndjo veta yaku hova kuveta nandintje. ³⁹ Ntani veta ya uviri ndjoyino ashi -' Hora ghunyoye yira momu waku hora naghumoye. ⁴⁰ Padino veta mbiri mpo dakorera veta nadintje da Moses ntani nadi davaporofete.'' ⁴¹ Vavo vafalisayi shimpe kuna pongo palivhango kumwe, makura Jesus ava pura lipuro. ⁴² Ghuye ava pura ashi, ''Anwe weni omo muna kughayara kuhamena ghuno Kristus? Ghuye ne mona are?'' Vavo ava limburura ashi, ''Mona David.'' ⁴³ Jesus ava pura shi, ''Ghuye David weni omo aghamba mu Mpepo ya Karunga ayite Hompa, ashi, ⁴⁴ 'Hompa kwa tantera Hompa wande ashi, ''Shungira ku rulyo rwande, dogoro mpopo nganu tura vana nkore voye vakare ghulyatero wa mpadi doye?'' ⁴⁵ Nkene shi David kwa twenyine Kristus ashi 'Hompa,' weni nka omo akara ashi Kristus Mona David?'' ⁴⁶ Kwato ghumwe ogho avhuliro kulimburura lino lipuro, ntani kutundapo kwato ogho avhuliro kumupura lipuro kehe lino.