¹ Jesus na varongwa vendi opo vaya tikire muJerusalemu ava yendi kuBatipagi, kundundu ya Maghuywe, makura Jesus atumu varongwa vendi vaviri, ² ava tantere ashi, ''Yendenu ku mukunda waku kwamako, kumu kawana shidongi osho vana mangerere po, kumwe na shidongighona. Kashuturenu shidongi mukaviyite navintje kumwe kuno ku kwande. ³ Nkene shi mpwali ogho aka mupuro kuhamena vino, kamu tanterenu ashi, 'Hompa ana vishano,' mpopo tupu ogho muntu kwa ka shitapa kukwenu. ⁴ Vino kwa shorokire mposhi nkango odo aghambire muporofete ditikiliremo. Ghuye kwa ghambire ashi, ⁵ "Tanterenu vana vamuSiyoni ashi, 'Kenga, Hompa wenu kuna kuya kukwenu, kuna kudidipita ntani ghuye kuna rondo pa shidongi - ano ngoli shidongighona, kuna shimbi murongerero.'' ⁶ Makura varongwa vendi ava yendi varuwane yira momu ava tantilire Jesus. ⁷ Ava kayita shidongi na shidongighona ava turapo vyuma vyavo, makura ava murondekepo Jesus ashungire. ⁸ Mbunga na yintje ava ghupu vyuma vyavo vayare mu shitaura, ntani vamwe ava kateta dimutavi davitondo vayare mu ndjira. ⁹ Mbunga ya vantu ayi piti kumeho yaJesus ntani vamwe ava mukwama munyima kuna kuyimba ashi, ''Hosana kwa Mona David! Vamu pande wa kuya mu lidina lya Hompa! Hosana wakuwiru-wiru!'' ¹⁰ Jesus opo angenine muJerusalemu, mukumo wendi aghu kuhanene mushitata na shintje, vavo ava pura shi, ''Murume munke ghuno?'' ¹¹ Mbunga ayi limburura ashi, "Ghuno ndje Jesus muporofete wamu NAZARETA yamu Galileya.'' ¹² Makura Jesus aka ngena muNtembeli. Ghuye aka tjidamo navantje ovo vayitiromo ntani navo vaku ghulitira muNtembeli, makura agandanga vitafura da vatjindji vimaliva ntani navipuna vyavo va kughulita vankuti. ¹³ Ghuye aghamba ashi, ''Matjangwa kwa tanta ashi, 'Ndjugho yande ngava kayi twenya ashi ndjugho ya ndapero,' ano ngoli anwe mbyo mwa yitura yikare yava kawidi''. ¹⁴ Kutunda mpopo ntani ngoli vayiremo vatwiku na virema muNtembeli kukwendi, ghuye ava verura. ¹⁵ Vapristeli vavanene na varongi matjangwa opo vamonine vitetu vya vinene ovyo aruwanine, ntani opo vayuvire vanuke kuna kuyimba muNtembeli kumwe naku ghamba ashi, ''Hosana kwa Mona David,'' vavo ava garapa unene. ¹⁶ Vavo ava mupura shi, ''Kuna kuvi yuvha ovino vana kughamba vano ndi?'' Jesus ava limburura ashi, Yii! Nane kapi mwa varura rumwe matjangwa ogho atanto ashi, 'Ove kwa ronga vanuke vava-keke vaku shamberere?'' ¹⁷ Makura Jesus ava shuvu atundumo mushitata ayendi kuBethani nko aka ralire. ¹⁸ Ngura-ngura liyuva lyaku kwa mako Jesus avyuka kushitata, mundjira yendi ayuvhu ndjara. ¹⁹ Makura amono shitondo sha ghukuyu kuntere yandjira, ayendi ko, ano ngoli kwato nyango aka wanineko nkwandi ngo mahako tupu akaliroko. Ghuye atantere shitondo ashi,'' Naru-mweshi nka ngaku yima nyango kuno ku shitondo,'' mpopo tupu makura shitondo ashi kukuta. ²⁰ Varongwa vendi opo vamonine vino, ava tetuka kumwe naku ghamba ashi, ''Weni omo shina kukuta kare shino shitondo?'' ²¹ Jesus ava tantere kumwe naku ghamba ashi, ''Ushili naku mutantera ashi, nkene tupu anwe ngamu kara na lipuro ntani anwe mupire mashinganyeko, anwe ngamu ruwana yira mbyovi vina shoroko ku shitondo shaghukuyu, ntani ngamu ruwana vya vinene anwe kuvhura kutantera yino ndundu ashi, 'Tundapo pano ntani yenda ghuka tentame mulifuta; vina kona kushoroka ngoli. ²² Kehe vino ngamu romba mundapero, anwe muna kara na lipuro, ngamu viwana.'' ²³ Jesus kwa yire angene muNtembeli, Vapristeli vavanene ntani na matimbi avaya ku kwendi ghuye kuna kuronga, makura ava mupura ashi, ''Na nkondo munke ghuna kuruwana vino vininke, ntani are atapo dino nkondo ku koye?'' ²⁴ Jesus alimbura naku ghamba ashi, "Name kuna kumupura tupu lipuro limwe tupu. Nkene tupu kumu tapa lilimbururo, ame ntani numu tantera ashi kuni nawana nkondo daku ruwana vino. ²⁵ Liyoyero lya Johanesi - kuni nko oku lya tunda? Kwa tunda muliwiru ndi kwa tunda ku vantu?'' Vavo ava kuyongo mukatji kavo, makura ava ghamba ashi, "Nkene kutu ghamba ashi, 'Kwa tunda muliwiru,' ghuye kwa tutantera, ashi, 'Mukonda munke mwa pira kupura mu mwendi?' ²⁶ Ntani nkene kutu ghamba ashi, ''Kwa tunda ku vantu,' atwe tuna tjira mbunga, mukonda shi na vantje vayiva ashi Johanes muporofete.'' ²⁷ Makura vavo ava mulimburura Jesus kumwe naku ghamba ashi, "Kapi tuvi yiva.'' Naye ava tantere ashi, ''Name shi kapi nuvhura kumutantera ashi na nkondo munke na ruwananga vino vininke. ²⁸ Weni omo muna kughayara kwa vino? Mukafumu kwa kara na vana vendi vaviri va vamati. Ghuye ayendi kwaghu wa kuhova aka mutantera ashi, 'Monande, yenda ghuka ruwane na muntji mu shikunino sha vinyu.' ²⁹ Monendi alimburura kumwe kughamba ashi, 'Kapi nuyendako,' Kunyima ya shirugho atjindji maghano ghendi makura ayendi aka ruwane. ³⁰ Makura murume ayendi kwa monendi wa uviri amu tantere ayende aka ruwane. Ghuye alimburura ashi, 'Kunuyenda, vava,' ano ngoli kapi ayendireko. ³¹ Pakatji kavano vamati vaviri ghunindjepo ogho aruwanino mpangera ya vashe yitikemo? Vavo ava ghamba ashi,'' Waku hova''. Jesus ava tantere ashi, ''Vya ushili naku mutantera ashi, vafutiti mutero na vantu varushonda ngava kangena mu untungi waKarunga kumeho yenu. ³² Johanes kwa yita ndjira ya uhungami ku kwenu, ano ngoli anwe kapi mwa pura. Ano ngoli vafutiti mutero na vantu varushonda vavo vapura mu mwendi. Ntani anwe, na mpili opo muna kumona vino weno, shimpe kapi muna ku kushighura muwapeke ghukaro wenu mu vhure kupura mu mwendi. ³³ ''Tererenu nka ku shifanikito shimwe shino. Pa kalire mukafumu ghumwe, ogho akaliro na lifuva. Ghuye akunu mo mushipata shendi mandjembera ghaku ruwana vhinyu, aturako ngumbu yaku pama, aturamo shikamito vhinyu, ntani atungumo ndjugho yava kungi lifuva, makura aghupu shikunino atape kuva ndimi varuwanemo. Mwenya shikunino ayendi ugenda kushirongo sha peke. ³⁴ Opo shatikire shirugho shaku yangura muyangu, ghuye atumu ko vakareli vendi kuva ndimi shikunino vaka shimbe ko kumuyangu wendi. ³⁵ Ano ngoli vandimi shikunino ava kwata vano vakareli vendi, ghumwe ava mutoghona, ghumwe ava mudipaya, ntani ghumwe ava mutoghona na mawe. ³⁶ Shimpe, mwenya lifuva atumuko nka vakareli vendi vamwe, vavayingi kupitakana vakuhova, ano ngoli vandimi shikunino ava kava ruwana yira momu varuwanine vamuhovo. ³⁷ Kunyima ya shirugho, mwenya shikunino atumuko Monendi wa mwene ku kwavo, ghuye kwa ghayalire ashi, 'Vavo kuva kamu fumadeka ghuno monande.' ³⁸ "Ano ngoli vandimi shikunino opo vamonine ana tumuko monendi, vavo ava ghamba ashi, 'Ghuno ndje mupingi wa shikunino. Tokwenu, tumu dipaye makura ngatu ghupe ghupingwa.' ³⁹ Makura ava mukwata, ava muvhukuma pandje ya shikunino shavhinyu makura ava kamu dipaya. ⁴⁰ Opo ngaya mwenya shikunino, vinke ngaya vhura kuruwana vano vandimi shikunino?'' ⁴¹ Vavo ava limburura ashi, "Ghuye akona ku djonaurapo vano vantu vavadona navantje mundjira yayidona, ghuye ngadamune shino shikunino shavhinyu ngatape kwa vantu peke, ngava wanemo muyangu nkene shirugho shina tikimo.'' ⁴² Jesus ava tantere ashi, ''Nane kapi mwavarura matjangwa kwatanta ashi, 'Liwe olyo vashwena vatungi ndyo vatura likare mulikovhu. Vino kwavi ruwana Hompa, ngavi kare vitetu vyavinene kukwenu'? ⁴³ Mbyo nakumutantera ashi, untungi waKarunga ngava kaghu-ghupako ku kwenu makura ngava kaghutape kwa vantu peke ovo ngava kayimo viyimwa. ⁴⁴ Kehe ghuno ngapunduko muno muliwe ngatjokauka ngawera palivhu. Ano ngoli kehe ghuno ngali wera ngali mumyona.'' ⁴⁵ Vapristeli vavanene na Vafalisayi opo vayuvire shino shifanikito, vavo vakwatire lighano ashi ghuye mbo atambire mukughamba weno. ⁴⁶ Vavo kwa shanine vamukwate mpopo, ngoli vatjilire mbunga ya vantu, mukondashi vantu kwamu fumadekire unene ashi ghuye muporofete wa munene.