¹ ''Untungi wa liwiru kwa fana yira nturaghumbo oghunya ayendiro ngura-ngura yayinene aka shane varuwani vaka ruwane mushikunino shendi shavinyu. ² Makura ava kuyuvhu mfuto ya lidenali limwe (shiringa ya kutika 20) muliyuva, makura ava tumu vakaruwane mushikunino shendi shavinyu. ³ Paviri ya muvyu avyuka ayende ko nka, shimpe aka wana vantu vamwe vana yimana palivango lyamaghulitiro, kwato viruwana. ⁴ Ghuye ava tantere ashi, ''Nanwe nka, yendenu mukaruwane mushikunino shande shavinyu, nganu wana mfuto yenu ya uhunga.' Makura ava yendi vakaruwane. ⁵ Ghuye avyuka ko nka ayendeko paviri yamuronga-na-mbiri ntani na paviri ya utatu, aka yita vantu vaya ruwane. ⁶ Ghuye avyuka ayende ko nka paviri utano shimpe aka wana vantu vamwe kuna yimana tupu kwato ovina vana kuruwana. Ghuye ava pura ashi, "Mukonda munke muna yimanene pano liyuva nalintje?' ⁷ "Vavo ava limburura ashi, 'Mukondashi kwato ogho ana vhuro kutupa viruwana.' ''Ghuye ava tantere ashi, 'Nanwe yendenu mukaruwane mushikunino shande shavinyu.' ⁸ Opo shatikire shirugho shangurova, mwenya shikunino ayita mukareli wendi ashi, ' Yenda ghute varuwani vawane ndjambi yavo, tameka kufuta ovo vana uhuliliro paviruwana ntani ghuka manita kufuta vakuhova paviruwana'. ⁹ "Makura ahovo kufuta ovo vayiro pa viruwana paviri ya utano, kehe ghuno kwa wanine ndjambi yendi ya lideneli limwe (shiringa ya 20). ¹⁰ Varuwani ovo vahoviro paviruwana opo vayire vawane ndjambi yavo, kwa ghayalire ashi vavo kuva wana ndjambi yakuyeruka mukondashi kwa ruwanine liyuva na lintje, ano ngoli navo kehe ghuno kwa wana lideneli limwe (shiringa ya 20). ¹¹ Opo va wanine ndjambi yavo vayimone, makura ava yendi kwa muhona vaka tape runyeyenyo rwavo.' ¹² Vavo ava ghamba ashi, 'Varuwani vaku hulilira kuna ruwana tupu viri yimwe tupu, ano ngoli mbyo vana wana ndjambi yaku shetakana kumwe natwe, atwe kuna ruwana liyuva na lintje, ghupyu wa liyuva kuna yendi parutu rwetu.' ¹³ ''Mwenya shikunino alimburura naku ghamba ashi, 'Vakwetu, ame kapi na ruwana lipuko. Katu kuyuvhu kare mfuto ya ndjambi ya lideneli limwe? ¹⁴ Ghupenu ndjambi yenu muka yende. Ame kuna shana kufuta varuwani vaku hulilira ndjambi yaku shetakana na nwe. ¹⁵ Nane ame kapi na kara na nkondo daku ruwana ovyo na shana ku limona lyande ndi? Ndi anwe muna kara na mfudu mukondashi ame kwa kara naghutapi?' ¹⁶ Mposhi vakuhulilira mbo ngava kakaro vakuhova mu untungi wa muliwiru, ntani vakuhova mbo ngava kakaro vakuhulilira.'' Matjangwa ghamwe kwatanta ashi, "Vayingi vayita, ntani vasheshu vatoghorora." ¹⁷ Jesus kuna kuyendu kuJerusalemu, mundjira yendi ayita varongwa vendi murongo-na-vaviri kwa pentjavo, ghuye ava tantere ashi, ¹⁸ ''Kengenu, atwe kuna kuyenda ku Jerusalemu, makura Mona Muntu ngava kamutape ku vapristeli vavanene na varongi matjangwa. Vavo ngava kamupangure naku mutokwera ku mfa, ¹⁹ vavo ngava kamutape ku vaHedana ngava kamu hepeke naku mushwaghura, ntani ngava kamu pamparere kushilivindakano. Ano ngoli muliyuva lya utatu ngaka vhumbuka kughufe.'' ²⁰ Makura vawina vaZebede ava ya kwaJesus kumwe na vana vendi vavamati. Ghuye atongamene kumeho ya Jesus makura arombo lishungido kukwendi. ²¹ Jesus amupura ashi, ''Vinke ghuna hepa?'' Mukadi alimburura ashi, ''Renka ghupulitire vano vana vande vaviri ngava kashungire nove, ghumwe kurulyo roye ntani ghumwe kurumontjo roye, mu untungi ghoye wa muliwiru.'' ²² Ano ngoli Jesus alimburura kumwe na kughamba ashi, ''Ove kapi ghuna yiva ashi vinke ghuna ku shungida. Anwe shili kuvhura kunwa munkinda ya kunwa me ndi?'' Vavo ava ghamba ashi, ''Atwe Kuvhura.'' ²³ Ghuye ava tantere ashi, ''Mu nkinda yande kuvhura munwe mo. Ano ngoli kushungira kurulyo rwande ntani na kurumontjo rwande kapishi matokoro ghande, ghano mavhango ghaku shungira mbovo va wapayikira ko vaVava.'' ²⁴ Ovano varongwa murongo opo vayuvire dino nkango, vavo ava garapa unene kwavano namati vaviri. ²⁵ Mukura Jesus ava yita vaye kukwendi ava tantere ashi, ''Anwe mwavayiva ashi vahompa kupangera di muhoko davo, vavo kutapa nkondo ku matimbi varuwane vino viruwana. ²⁶ Ano ngoli anwe kapishi kuruwana vino mundjira ya weno. Nane ngoli, kehe ghuno ana shano ngaka kare wamunene mukatji kenu akare muruwani wa navantje, ²⁷ ntani kehe ghuno ana shano kukara wakuhova mukatji kenu akona kuruwanena navantje, ²⁸ yira momu akara Mona Muntu kapishi kwaya ashi vantu vamu ruwanene, nane ngoli kwaya mukuruwanena vantu, ntani nakutapa monyo wendi mukuyoghora vantu vavayingi. ²⁹ Opo vatundire muJeriko varupukemo, mbunga yayinene ayi vakwama. ³⁰ Vamona ko tupu varume vaviri vavitwiku vana shungiri kuntere ya shitaghura. Opo va yuvire ashi Jesus kuna kupita, ava yiyiri na liywi lyaku dameka ashi, ''Hompa, Mona David, tu fere nkenda.'' ³¹ Mbunga ayi vaharukiri, kumwe naku vatantera vamwene ko, ano ngoli vavo ava yiyiri ngoli unene vadameke ashi, ''Hompa, Mona David, tu fere nkenda.'' ³² Makura Jesus akayimana ava yita naku vapura ashi, ''Vinke muna shana ovyo nuvhura kumu ruwanena?'' ³³ Vavo ava limburura ashi, ''Hompa, kuna shana tupahuke mantjo ghetu.'' ³⁴ Makura Jesus, ava fere nkenda yayinene, ava kukwata pa mantjo. Mpopo tupu makura ava pahuka vamone, vavo ava kwama Jesus.