¹ Opo amanine Jesus kughamba dino nkango, makura atundumo muGalileya ayende kuruha rwa mukunda wa Judeya musheli munya ya Mukuro waJorodani. ² Mbunga yayinene ayi mukwama, makura ghuye averura vaveli navantje ovo vakaliropo. ³ Makura Vafarisayi ava ya ku kwendi, vamusheteke, ava mupura ashi, ''Vya pulitira mukafumu kukomba mukamali wendi mukonda kehe yino tupu ndi?'' ⁴ Jesus ava limburura kumwe naku vapura ashi, ''Nane kapi mwa varura mantjangwa ogho aghambo ashi ogho ashitiro vantu pakutanga kwa shitire pakare murume na mukadi ndi? ⁵ Ogho ashitiro vantu ndje ava tantero nka ashi, "Mukonda ndjoyino murume akona kutunda mumundi wa vashe na vawina ayende aka ku pakerere na mukamali wendi, makura vano vantu vaviri vakare rutu rumwe tupu.' ⁶ Vavo ne kapishi marutu maviri nka, nani ngoli rutu rumwe. Mpo ngoli shi kwavyo atura Karunga vigwanekere kumwe, kwato ghumwe kehe ghuno waku vhura kuvigaununa." ⁷ Vavo ava mupura ashi, ''Mukonda munke Moses atulirapo veta ashi nkene kuna kushwena mukadi ghuna kona kumutjangera mbapira yakukukomba ntani ghuna kumu tjidamo aka yende?'' ⁸ Ghuye ava tantere ashi, "Mukonda ya dimutjima denu dadikukutu, Moses mbyo apulitira mukombe vakadi venu, ano ngoli pakutanga kapishi ngoli vyakalire. ⁹ Ame kuna kumutantera ashi, kehe ghuno wa kukomba mukamali wendi pa hana konda ya kushondera, makura ayende aka kware mukamali wapeke, ogho kuna tura ndjo ya shakushondera; ntani mukafumu waku kwara ogho mukamali va komba naye kuna tura ndjo yaku shondera.'' ¹⁰ Varongwa vendi ava tantere Jesus ashi, ''Nkeneshi mo ngoli vya kara pakatji kamurume na mukamali wendi, hasha tupu nkene muntu kwato ku kwara.'' ¹¹ Ano ngoli Jesus ava tantere ashi, ''Ovino Kapishi marongo ghaku vhura ku kwata lighano kehe ghuno, nkwandi kwa mbovo tupu vatapa shino shiruwana. ¹² Mukondashi mpovali vantu vamwe ovo vapiro kuwapera nkwara kutunda kulishampuruko, ntani mpovali varume ovo vatoghorora vapiro kuwapera nkwara, ntani mpovali vamwe ovo vapiro kukwara mu untungi wa muliwiru. Kehe ghuno wa kuvhura kukwata lighano ghano marongo, ayive ashi vinke ana kutanta.'' ¹³ Makura vantu vamwe ava vayita vanuke kwa Jesus ava vakambeke maghoko naku varaperera , ano ngoli varongwa vendi ava vaharukiri naku vashweneka. ¹⁴ Makura Jesus atantere varongwa vendi ashi, "Shuvenu vanuke vavadidi vaye kukwande, kapishi muva shweneke, untungi wa liwiru kwa hamena ku kwavo.'' ¹⁵ Makura ava kambeke maghoko akandayike vanuke, opo amanine makura atundupo akayende. ¹⁶ Mpopo tupu, murume ghumwe aya kwa Jesus makura amupura ashi, ''Murongi wa muwa, viruwana munke vya uhunga nganu vhura kuruwana mposhi nganu kawane monyo wanaruntje?'' ¹⁷ Jesus alimburura ashi, ''Mukonda munke ghuna kughambera ashi ame murongwa wa muwa? Karunga tupu ndje wa muwa ahuru, ano ngoli nkene kuna shana ngaghu kawane liparu lya naruntje, wahepa kutikitamo dimuragho nadintje.'' ¹⁸ Ghuno Mukafumu amupura ashi, ''Dimuragho dinindo po?'' Jesus alimburura ashi, ''Kwato kudipaya, kwato kushondera, kwato kuvaka, kwato kutapa umbangi wa vimpempa, ¹⁹ fumadeka vasho na vanyoko, ntani hora ghunyoye yira moomu wakuhora naghumoye''. ²⁰ Ghuno mumati ghona makura aghamba ashi, "Dino dimuragho nadintje ame kwa ditikitamo kutunda ku wanuke wande. Vininke munke shimpe na hepa kutikitamo? ²¹ Jesus alimburura ashi, ''Nkene kuna shana kutikitiliramo navintje, yenda, kaghulite limona lyoye na lintje, katape ku vantu varuhepo, makura ove ngaghu wana limona lya untingi wamu liwiru; ntani ove ghuna hepa kuya kukwande, ghuya nkwame.'' ²² Makura mumati ghona opo ayuvire dino nkango aghambire Jesus, atundupo akayende ghuye kwa kalire naliguvo unene, mukonda shi ghuye kwa weka limona lya liyingi unene. ²³ Jesus atantere varongwa vendi ashi, ''Vya ushili na kumutantera ashi, ghudito unene muntu wa ghungagho muku kangena mu untungi waliwiru. ²⁴ Ntani nka ame kuna kumutantera ashi, ghureru ngamero muku ngena yipite mu lintjo lya ntonga kupitakana muntu wa ngagho ashi ngaka ngene mu untungi waliwiru.'' ²⁵ Varongwa vendi opo vayuvire dino nkango, ava tetuka ava kara na liguvo unene makura ava ghamba ashi, ''Nkene shi mo ngoli are ogho ngaka vhuro kuparuka?'' ²⁶ Jesus ava kengurura makura aghamba ashi, ''Ku vantu vino vidito unene naku vivhurashi, ano ngoli kwa Karunga vininke navintje ghureru.'' ²⁷ Makura Peturusi amu tantere kumwe na kughamba ashi, ''Kenga, atwe twa shuva limona lyetu nalintje mbyo twaya kukoye tuya kukwame. Vinke ngoli ngatu kawane-namo?'' ²⁸ Jesus ava tantere ashi, "Vya ushili naku mutantera ashi, shirugho kuna kuya opo nga shungira Mona Muntu kulipundi lyendi lya uHompa mughuyerere wendi, anwe muna kunkwamo ngamu ka shungira kuvipundi vya uHompa, vino vipundi murongo-navi-viri, ngamu kapangure dino dimuhoko murongo-na-mbiri da vaIsraeli. ²⁹ Kehe ghuno ashuvo lipata lyendi, vakuru vendi, vaghuni vendi, vashe, na vawina, vana vendi, ntani na shirongo shavo mukonda ya lidina lyande ghuye ngaka wana ghupingwa wakupitakana palifere limwe ntani ghuye ngaka wana monyo wa liparu lya naruntje. ³⁰ Ano ngoli ghungi vantu vakuhova mbo ngava kakaro vakuhulilira, ntani vakuhulilira mbo ngava kakaro vaku hova.