¹ Pa shirugho ntjosho tupu varongwa vendi avaya kwaJesus ava mupura shi, ''Mukatji ketu arepo ogho ngakakaropo wamunene mu untungi wa liwiru?'' ² Makura Jesus ayita mwanuke wamudidi aye kukwendi, makura shungiri mukatji kavo, ³ mukura aghamba ashi, ''Vya ushili nakumutantera ashi, nkwandi muna kona kutjindja ghukaro wenu mukare yira mwanuke wamudidi, ndi kapi ngamu kangena mo mu untungi wamuliwiru. ⁴ Mpo ngoli ashi, kehe ghuno waku kudidipita mwene akare yira ghuno mwanuke wamudidi ghuye ndje wamunenepo mu untungi wa muliwiru. ⁵ Kehe ghuno waku tambura mwanuke wamudidi yira ndjeghuno mulidina lyande ame tupu ana tambura. ⁶ Kehe ghuno waku renka mwanuke wamudidi ogho apuro mu mwande ature ndjo, hashako tupu ogho muntu nkene vamu mangerere liwe lya linene muntingo yendi, vaka muvhukumine mumukuro wa litondo aka dame kuntji ya mema. ⁷ ''Ani nane ghuno udjuni wa lihudi mukondashi kwa karamo mapukito! Mapukito kuvhura ghakare mo, ano ngoli lihudi unene kwa muntu wa kuyitapo ogho mapukito! ⁸ Nkene lighoko lyoye ndi lighuru lyoye kuna kukupukita ghuture ndjo, liteteko tupu litundeko ghuka livhukume. Hasha ko tupu ove ngaghu kangene muliparu lya naruntje na shironda ndi na ghurema kupitakana omo ngava kavhukumina rutu naruntje mumundiro wanaruntje mukonda ya ndjo. ⁹ Nkene lintjo lyoye kuna ku kurenkita ghuture ndjo, likororemo litundemo ntani kavhukume. Hasha tupu ove ngaghu ka ngene muliparu lya naruntje na lintjo limwe tupu ku pitakana omo ngava kavhukumina rutu naruntje runa karo na mantjo maviri. ¹⁰ Karenu muna viyiva ashi anwe naka didishi kupukita ndi kuhepeka vanuke. Mukonda shi vakara na vaEngeli vavo muliwiru vaku vakunga naku vapakera mbili vavo kutapa mbudi ku vaVava mu liwiri. ¹¹ Matjangwa ghamwe kwatanta ashi, "Mona Muntu kwaya aya ngayayoghore ovo vakombano." ¹² Weni omo ghuna kughayara? Nkene muntu kwa weka ndjwi lifere limwe, makura yimwe yipanguke mo yikombane, kapi ngashuva dino ndjwi dimurongo-muvyu-na-muvyu kundundu ngayende aka shane yinya yimwe yina kombano ndi? ¹³ Nkene ngaka yiwana, vya ushili naku mutantera ashi, ghuye ngakara naruhafo rwa runene kwayino yimwe kupitakana dino ndjwi dimurongo-munvyu-na-muvyu dina piro ku kombana. ¹⁴ Ntani nka mo ngoli ashi, kapishi mushihoro shaShenu wa muliwiru ashi ghumwe wavano vavadidi ngaka kombane po. ¹⁵ ''Nkene ghunyoye ana kudjono, yenda kukwendi kamutantere ghundjoni wendi, viruwanenu pamu vaviri tupu. Nkene shi ghuye kuna kuterera ntani ana tambura undjoni wendi, ove ghuna kongwa ghunyoye. ¹⁶ Ano ngoli nkene kapi ana kuterera kukoye, yitako muntu ghumwe ndi vaviri vakare mbangi kunkango doye mposhi ngava kakare vambangi kunkango odo wa ghambire. ¹⁷ Ano ngoli nkene shimpe ana shwena kuterera, yenda ghutware ghuno udito kuva kurona vankirishe. Nkene shimpe ana shwena kuterera kuva kurona vankirishe, renkenu ngoli oghuno muntu akare yira ghumwe wavaHedana ndi vafutiti mutero mukatji kenu. ¹⁸ Vya ushili naku mutantera ashi, kehe shino ngaghu manga pano palivhu namu liwiru ngava shimanga, ntani kehe shino ngaghu shutura pano palivhu na muliwiru ngava shishutura. ¹⁹ Ntani nka ame kuna kumutantera ashi, nkene anwe muvaviri muna kuyuvhu pano palivhu kuhamena kwa kehe shino muna hepa, ngava shimu ruwanena vaVava vamu liwiru. ²⁰ Ntani kehe kuno ngava ponga vaviri ndi vatatu mu lidina lyande, name nganu kara mukatji kavo.'' ²¹ Makura Peturus aya kwa Jesus amupura ashi, ''Hompa, rukando rungapi rwa ku ndjona unyande rwa kuvhura kumu ghupirapo? Kumu ghupirapo rukando rutano-na-ruviri?" ²² Jesus alimburura ashi, '''Ame kapi naku tantere ashi rukando rutano-na-ruviri, nane ngoli rukando dimurongo-na-dimurongo mbiri. ²³ Mpo ngoli ashi untungi wa liwiru kwa fana yira ghunya Hompa ashanino kuyiva ashi makongo ghakutika kuni valya vakareli vendi. ²⁴ Opo atamikire kuvarura ayive navantje, mukareli wendi ghumwe ayita muntu ogho akaro na makongo ghakutika ku mayovi murongo shiringa. ²⁵ Ano ngoli mukonda ya kupira kuvhura kufuta makongo ghendi, muhona wendi aghamba ashi vamughulite, kumwe na mukamali wendi ntani na vana vendi navantje na limona lyavo na lintje, vafute makongo ghendi. ²⁶ Makura mukareli wendi aya ku kwendi, atongamene pa ngoro kushipara shendi, aghamba ashi, ''Muhona, mpeko shirugho, ame nganu futa makongo ghoye dogoro nganu mane.' ²⁷ Makura muhona wendi, opo ayuvire dino nkango dendi amufere nkenda unene, makura amumangurura kumwe naku dongononapo makongo ghendi. ²⁸ Makura ghuno mukareli ayendi aka wane ovo vaghupo makongo kukwendi, ghakutika ku lifere limwe. Ghuye amu kwata, pamulighu kumwe naku ghamba ashi, 'Futa makongo ghande ogho wa korota ku kwande'. ²⁹ "Makura ghuno mukareli ghunyendi atongamene pangoro ashungida ku kwendi, na kughamba ashi, 'Didimika tupu ghumpeko shirugho, ame nganu futa makongo ghoye dogoro nganu mane.' ³⁰ Ashwena kutambura mashungido ghendi. Ghuye, amukwata ayende mudorongo dogoro mpopo nga mana mufuta makongo naghantje. ³¹ Vano vaghunyendi opo vamonine ovino aruwanine kwa mukareli wendi, vavo ava garapa unene. Vavo ava yendi vaka murapote kwa muhona wendi kwa navintje ovyo vya shorokiro. ³² ''Makura muhona wendi amuyita ayende ku kwendi, aka mutantera ashi, 'Ove muntu wa urunde, ame kwa dongononapo makongo ghoye naghantje mukonda shi ove kwa shungidire ghurombe nkenda ku kwande. ³³ Ove mukonda munke ghupira kufera nkenda mukareli ghunyoye, yira momu na fire nkenda kukoye? ³⁴ Muhona wendi agarapa unene makura amutapa vamutoghone naku muhepeka dogoro nga mane kufuta makongo naghantje ogho aghupa. ³⁵ Mo ngoli ngava kumu ruwana vaVava vamu liwiru, nkene kapi mwa ghupirangapo vaghunyenu kutunda munda yamutjima denu.