¹ Kuruku rwa mayuva matano-na-limwe Jesus atantere Peturusi, naJakopu, ntani na Johanes vantu-namunyendi, ayende navo kuwiru ya ndundu yayire unene vakakare nkoko pentjavo. ² Ghuye makura aku shintumuka nakukutjindja kumeho yavo. Shipara shendi kuna kutema yira shite sha liyuva, ntani vyuma vyendi kuna kutema ghukenu wa unene yira shite sha liyuva. ³ Mpopo tupu, apa moneke Moses ntani na Eliya kuna kughamba naye. ⁴ Makura Peturusi alimburura atantere Jesus ashi, ''Hompa, kuviwapa unene kukwetu nkene tukare mpopano. Nkene ghuna shana, Ame kunu dikapo pano ndjugho ntatu - yimwe yoye, ntani yimwe yaMoses, ntani yimwe yaEliya.'' ⁵ Ghuye shimpe kuna kughamba, mpopo tupu, liremo lya kupayima unene aliyapo alivafikiliri, mpopo tupu, liywi kuna kutundamo mu liremo, kuna kughamba ashi, ''Oghuno ndje Monande ayendo kumutjima wande. Muna hepa kuterera kukwendi.'' ⁶ Varongwa vendi opo vayuvire lino liywi, ava were palivhu vana ghombomana shipara palivhu ntani vavo ava kara naghoma wa unene. ⁷ Makura Jesus aya ava kwata kumwe na kughamba ashi, "Shapukenu ntani kapishi mukare naghoma.'' ⁸ Makura ava kankuka vakenge kuwiru, ava kenge Jesus kuna yimana pentjendi palivhango. ⁹ Mundjira yavo yakughurumuka vatunde kundundu, Jesus atapa marondoro kukwavo na kughamba ashi, ''Ovino muna mono vinashoroko kwato kuvitantera kehe ghuno dogoro Mona Muntu ngaka vhumbuke kumfa.'' ¹⁰ Makura varongwa vendi ava mupura, na kughamba ashi, ''Mukonda munke varongi matjangwa vaghamberanga ashi Eliya ndje ngahovo kuya ngapite kumeho?'' ¹¹ Jesus alimbura kumwe naku vatantera ashi, ''Eliya ndje ngahovo kuya, ngaya wapeke vininke navintje. ¹² Ano ngoli Ame kuna kumutantera ashi, Eliya ayatika kare, ano ngoli vavo kapi tupu va mudimburura. Makura, vavo ava muhepeke tupu yira momu vana shana. Nampili, Mona Muntu naye mo ngava muhepa weno.'' ¹³ Makura varongwa vendi ava dimburura naku kwata lighano ashi ghuye kuna tamba Jahanesi mukushi. ¹⁴ Opo vayatikire kumbunga, mukafumu ghumwe aya ku kwendi, atongamene kumeho yendi, makura aghamba ashi, ¹⁵ "Hompa, fera nkenda monande wa mumati muverure, ghuye kwa kara na ghuvera wa shinyonywa ntani ghuye kuhepa unene. Ghuye kehe pano kuwera mumundiro ndi mumema. ¹⁶ Mbyo namuyita ku varongwa voye, ano ngoli kapi vana vhuru kumuverura.''' ¹⁷ Jesus alimburura kumwe na kughamba ashi, '' Anwe vantu vakupira lipuro na ravharo rwaku puka, dogoro shirugho shakuhura kuni nko nganu vhura kukara nanwe? Dogoro shirugho shakutika kuni nko ntani ngamu vhura kukuronga? Muyitenu ku kwande.'' ¹⁸ Jesus makura aharukiri yino mpepo yayidona, makura ayi tundumo mu mwendi, mpopo tupu mumati averuka. ¹⁹ Kuruku makura varongwa vendi avaya kwa Jesus mukaholya - holya makura ava mupura ashi, ''Mukonda munke tuna piri kuvhura kuyitjidamo?'' ²⁰ Jesus ava alimburura ashi, ''Mukonda ya lipuro lyenu lya lididi. Ghushili naku mutantera ashi, nkene tupu ngaghu kara nalipuro lyalididi nampili litike tupu pantanga ya mbuto, anwe kuvhura kutantera yino ndundu ashi, 'Tundapo pano yenda panya; ngayi tundapo, ntani kwato osho ngashi muditopero.'' ²¹ Matjangwa ghamwe kwatanta ashi, "Mpepo ya yidona ya kufana weno kwato kuyi tjidamo, nkwandi ndapero na kudililira. ²² Vavo shimpe kuna kara muGalileya, Jesus atantere varongwa vendi ashi, ''Mona Muntu ngava kamutapa mumaghoko gha vantu, ²³ makura vavo ngava kamudipaye, ano ngoli kuruku rwa liyuva lya utatu ngaka vhumbuka ku mfa.'' Varongwa vendi makura ava kara na liguvo unene. ²⁴ Opo vayatikire kuKapeernimu, varume vavafutiti-mutero wa muNtembeli avaya kwa Peturusi ava ghamba ashi, ''Murongi wenu kapi afutanga mutero wa muNtembi ndi?'' ²⁵ Ghuye alimburura ashi, "Kufuta.'' Makura Peturusi opo angenine mundjugho, Jesus ahovo kumupura ghuye ashi, "Weni omo ghuna kughayara, Simoni? Kware vawa nanga vaHompa vapano palivhu mutero? Kuvantu vavo ndi kuva ntunda virongo?'' ²⁶ 'Petrus alimburua ashi, "Kuva navirongo.'' Jesus aghamba kukwendi ashi, "Vantu vendi kwato kufuta mutero.'' ²⁷ Ano ngoli kapi tuna shana kugarapita vafutiti mutero vature ndjo, yenda tupu mulidiva, kavhukuminemo lirogho, makura katampure ntjwi yaku hova kukwata. Kakenge mu kanwa kayo, kughu kawanamo shiringa. Kayite ghuyatape kuva futiti mutero ghuya futire natuvantje name nove.