¹ Vafarisayi na vaSadukayi avaya kukwendi vamu sheteke, vavo ava mushungida ashi ava neyede viyivito na vitetu vyaku liwiru. ² Ano ngoli ghuye alimburura na aghamba ashi, ''Nkene shi ngurova, kukenga kuwiru kuna gehe, anwe kughamba ashi, 'Yona ngali kara liyuva lya liwa, mukonda shi liwiru lina gehe.' ³ Nkene ngura-ngura, anwe kughamba ashi, 'Namuntji kuku kara mpepo na likundungu na mbundu, mukonda shi kuwiru kuna kara ghugeha na ghutipu.' Anwe mwa yiva kufaturura viyivito ovyo vya monekango ku liwiru, ano ngoli anwe kapi mwa yiva kufwaturura viyivito vyaku uhura wa udjuni. ⁴ Vantu vavarunde na ruvharo rwaghu piki-piki mbo vashanango vava neyede viyivito, ano ngoli kwato shiyivito osho nuvhura kutapa kukwenu nkwandi shiyivito sha Jona.'' Makura Jesus atundupo aka yende.' ⁵ Opo vakatikire mushelimunya varongwa vendi, ntani vana kughamba ashi vana vhurama kupshimba mboroto. ⁶ Jesus ava tantere ashi, "karenu muna kotoka ntani vangarenu ku hingo yavaFarisayi nava Sadukayi.'' ⁷ Makura varongwa ava kupura vavene naku ghamba ashi, "Mukonda shi kapi tuna shimbi mboroto.'' ⁸ Jesus opo ayuvire ovyo vana kughamba makura ava tantere ashi, ''Anwe mwa karo na lipuro lya lididi, vinke muna kughambera vya kufana weno mukatji kenu, mbyovyo shi anwe kapi muna shimbi mboroto ndi? ⁹ Anwe shimpe kapi muna ku kwata lighano ndi kapi muna kuvhuruka odinya mboroto ntano dakutitiro vantu mayovi matano, ntani vikumba vingashi mwa pongikire vyaruhupwa? ¹⁰ Ndi vhurukenu nka mbororto ntano-na-mbiri dakutitiro vantu mayovi mane, na ruhupwa rwa vikumba vingashi mwapongikire? ¹¹ Kuna kumoneka ashi anwe shimpe kapi muna ku kwata lighano ashi vinke natamba, ame kapi na kughamba kukwenu vyaku hamena mboroto? Karenu muna kotoka ntani vangarenu ku hingo yavaFarisayi na vaSadukayi. ¹² Makura vavo ntani vana ku kwata lighano ashi ghuye kapishi kwa tambire hingo ya mboroto, nane ngoli vakotoke kumarongo ghavaFarisayi ntani vaSadukayi. ¹³ Opo ayatikire Jesus pepi na shirongo sha Kasareya Filipu, ghuye apura varongwa vendi ashi, ''Weni omo vana kughamba vantu ashi are nane oghuno Mona Muntu?'' ¹⁴ Vavo ava ghamba ashi, ''Vamwe kuna kughamba ashi Johanesi muyoyi; vamwe ashi, Eliya; ntani vamwe ashi, Jeremiya, ndi ghumwe wa vaPorofete.'' ¹⁵ Makura ghuye ava pura vavo ashi, ''Anwe ne weni omo muna kughamba ashi Ame re?'' ¹⁶ Simon Petrusi kuna kulimburura, aghamba ashi, ''Ove Kristusi, Mona Karunga wa monyo.'' ¹⁷ Jesus alimburua kumwe naku ghamba kukwendi ashi, ''Simon mona Jona, Ove muna lirago, ovino ghuna ghamba kapishi muntu wa parutu na honde ana vishororo kukoye, nane ngoli Vavava vamu liwiru. ¹⁸ Ame kuna kukutwenya ngoli ashi, ove Petrus (Kutanta ashi Liwe), pano pa liwe lino ame mpo nganu tungira Nkirishe yande. Livero lya shirongo sha va fe kapi ngali kara na nkondo daku lighupapo. ¹⁹ Ame nganu tapa tjapi da untungi wa liwiru kukoye. Kehe shino ngaghu manga pano palivhu namu liwiru ngava shimanga, ntani kehe shino ngaghu mangurura pano pantunda ya livhu na muliwiru namo ngava shimangurura.'' ²⁰ Makura Jesus atapa marondoro kuvarogwa vendi ashi, nakadidishi vatantere kehe ghuno ashi ghuye ndje Kristus. ²¹ Kutunda pashirugho osho Jesus atameke kutantera varongwa vendi ashi ghuye ana hepa kuyenda kuJerusalemu, ngaka kare murunyando namu mahepeko ghakutunda kumatimbi ghavaJuda navaPristeli vavanene ntani naVarongi matjangwa, ngava kamudipaye, ntani ngaka vhumbuka ku ghufe muliyuva lya utatu. ²² Makura Peturusi amu ghupupo amutwara kumpengi amu kava kumwe nakumutantera ashi, "Vino vyaku fana weno vikare ghure nove, Hompa; nakadidishi ntani narumweshi ngavi shoroke kukoye vya weno''. ²³ Mpopo tupu Jesus apiruka atantere Peturusi ashi, ''Tundapo papande, Satana! Ove kuna kara liwe lina karo mundjira yande ashi nupundukemo, mukondashi ove kapi wakara na ndunge dakughayara viruwana vya Karunga, nane ngoli ove kwa ghayaranga tupu yira muntu.'' ²⁴ Jesus makura aghamba atantere varongwa vendi ashi, ''Kehe ghuno ana shano kunkwama ayende name, akona kushuva liparu lya mwene, ghuye ngadamune shilivindakano shendi mwene, makura ngaye nga kwame. ²⁵ Kehe ghuno waku popera monyo wendi ngaka ghukombanita, ntani kehe ghuno waku kombanita monyo wendi mukonda ya lidina lyande ngaka ghuwana. ²⁶ Vinke ngavi vhura kuvatera muntu ngaweke limona lya mu udjuni naghuntje makura ghuye ngaka kombanite monyo wendi? Ndi vinke walye vyaku vhura kutapa muntu mposhi ngayoghore monyo wendi? ²⁷ Mona Muntu na vaEngeli vendi ngavaya mughuyerere wa Vashe. Makura ghuye ngaya tapa mfuto kwa kehe ghuno kutwara muviruwana vyendi. ²⁸ Vya ushili naku mutantera ashi, vamwe mukatji kenu pavano vanayimano pano kapi ngava makera mfa vavo ngava kenga Mona Muntu omo anakuya mu untungi wendi.''