¹ Vafarisayi navarongi matjangwa vamwe kwa tundire ku Jerusalemu vaye kwa Jesus. Vavo ava mupura ashi, ² ''Mukonda munke varongwa voye vapiranga ku kwama mpo yetu naku tikitamo veta yava kurona vetu? Vavo kapi vaku kushanga kumaghoko pa kulya.'' ³ Ghuye alimburura kumwe naku vapura ashi, ''Anwe vinke mwapiranga kulimburuka veta daKarunga mushuve viruwana vya mpo yenu? ⁴ Karunga kwa tanta ashi, 'Fumadeka vasho na vanyoko, ntani ashi, 'Kehe ghuno waku tuka Vashe ndi Vawina nga fa.' ⁵ Ano ngoli anwe kughamba ashi, 'Kehe ghuno waku tantera vashe ndi vawina ashi, ''Kehe yino mbatero ya tumbukiro kukwenu yaku tunda ku kwande weno kuna kuyitapa kwa Karunga," ⁶ muntu wa weno kapi nka ngavhura kupakera mbili vakurona vendi.' Mundjira yino mo ngoli mwa pengitanga nkango da Karunga mukonda ya mpo denu. ⁷ Anwe vavi kupaki! Nkango damu porofete Isaya kukwenu datamba odo datanto ashi, ⁸ 'Vano vantu vamuhoko ghuno kufumadeka tupu Karunga muka nwa, ano ngoli dimutjima davo ghure name dakara. ⁹ Ghukareli Karunga wavo wamaghoko-ghoko mukondashi vavo kuronga marongo gha mpo davo dikare yira nkango da Karunga.''' ¹⁰ Makura ayita mbunga ya vantu vaye kukwendi ghuye ava tantere ashi, ''Tererenu nawa ntani kukwate lighano vino - ¹¹ Kehe shino shaku ngena muka nwa kapi shanyatekanga muntu. Nane ngoli, mbyovyo vyaku rupuka muka nwa, mbyo vyaku nyateka muntu.'' ¹² Varongwa vendi avaya ku kwendi ava mutantere Jesus ashi, ''Ghuna yiva ashi Vafalisayi vana garapa unene mukonda ya nkango dino ghuna ghamba?'' ¹³ Jesus alimburura naku vatantera ashi, ''Kehe shino shimenwa osho vapira kutapeka Vavava vamu liwiru ngava shiduramo. ¹⁴ Vashuvenu tupu, vavo vatwiku. Ntani mutwiku nkene apititiri mutwiku ghunyendi, navantje ngava wera mulikwina limwe tupu.'' ¹⁵ Peturus aghamba atantere Jesus ashi, ''Ghamba ghufwaturure shino shifanikoto ovyo shatanta.'' ¹⁶ Jesus aghamba ashi, ''Nove nka shimpe kapi ghuna yuvhu ghukwate lighano dino nkango ndi? ¹⁷ Kehe vino vyaku lya muntu kuyenda vika kare mulipumba, ntani ngavi karupuka mo murutu? ¹⁸ Ano ngoli kehe vino vyaku rupuka muka nwa ka muntu vyaku tunda mumutjima. Ovino mbyo vyaku nyateka muntu. ¹⁹ Mbyovyo mumutjima mo mwa tundango maghano gha madona, kudipaya, rushonda, ghurunde, widi, vimpempa ntani na ghudwa . ²⁰ Ovino mbyo vya nyatekango rutu rwa muntu. Vyaku lya nama ghoko vana piri kukusha kapishi mbyo vya nyatekango rutu rwa muntu." ²¹ Makura Jesus atundupo palivhango aka yende ku ruha rwa virongo vya Tirusi na Sidoni. ²² Mpopo tupu amono, mukamali wamu Kanani kuna kutunda kuruha rwa virongo vyavo. Ghuye aghamba na liywi lyaku dameka ashi, ''Hompa, Mona David, mfere nkenda! Monande wamukadona kuna kuhepa unene ku mpopo dadidona.'' ²³ Ano ngoli Jesus amwena teyete kwato nkango oyo alimburura. Varongwa vendi avaya kwa Jesus ava mutantere atantere ashi, ''Mutjide po ghuno mukadi aka yende, kuna kutu yoyerera.'' ²⁴ Makura Jesus alimburura mukadi kumwe naku ghamba ashi, ''Ame kwantuma ntani kwaya tupu ku ndjwi daku kombana damuhoko wava Israel.'' ²⁵ Makadi aya kukwendi atongamene kumeho yendi, aghamba ashi, ''Hompa, mpopere.'' ²⁶ Ghuye alimburura ashi, ''Kapi vya hungama muntu ghudamune mboroto yavanuke ghutape kuvi mbwaghona.'' ²⁷ Mukamali naye aghamba ashi, ''Yii, Hompa, nampili vimbwaghona navyo kuparuka ku ndya daghu fere-fere dakuwa kutafura ya muhona.'' ²⁸ Makura Jesus tantere mukadi ashi, ''Mukadi, ove wakara na lipuro lya linene; renka vino vishoroke yira moomu ghuna vishanene.'' Mpopo pashirugho osho monendi wamukadona averuka. ²⁹ Makura Jesus atundupo pano palivhango ayendi pepi na lifuta lyaGalileya. Makura aka ronda kundundu aka shungira pawiru. ³⁰ Mbunga ya vantu yayinene avaya ku kwendi. Vavo ava yita virema, vatwiku, vipuru-puru kumwe nava veli vavangi. Vavo ava vayita vavature kumpadi da Jesus, ghuye ava verura navantje. ³¹ Mbunga kwa tetukire unene opo vamonine vipuru-puru kuna kughamba, virema kuna kuyenda, vaveli vana veruka ntani vatwiku kuna kumona. Vavo ava tanga naku panda naku shamberera Karunga wa Israel. ³² Makura Jesus ayita varongwa vendi ava tantera ashi, ''Ame kuna kufera nkenda yino mbunga ya vantu vana kara name ghure wa mayuva matatu vahana kulya ndya. Kapi nashana kuva tuma vatundepo pano vaka yende vahana kulya ndya, ku vhura vawere mundjira.'' ³³ Varongwa vendi ava mupura ashi, ''Muno mumburundu tuna kara, kuwana kuninko mboroto daku vhura kugwaneka mbunga ya vantu vaku tika pano valye vakute. '' ³⁴ Jesus ava pura ashi, ''Mboroto dingashi muna kara nado?'' Vavo ava limburura ashi, ''Ntano na mbiri, ntani na ntjwi dadi sheshu tupu. ³⁵ Makura Jesus atantere mbunga ya vantu vashungire pa livhu. ³⁶ Ghuye aghupu dino mboroto ntano na mbiri ntani na ntjwi, opo amana kutapa mpandu kwa Vashe, makura abomona dino mboroto atapa kuvarongwa vendi. Varongwa vendi ava tapere mbunga. ³⁷ Vantu navantje avali dogoro ava kuta. Makura ava yuda vikumba vitano navi viri vya ndya darupwa. ³⁸ Vantu ovo va liro dino ndya kwa kalire mayovi mane shino shavaro shava kafumu tupu, kughupako vakamali na vanuke. ³⁹ Jesus ntani atantilire vantu vashapuke vaka yende, makura ghuye aka ronda muwato ayende kushirongo sha Magadani.