¹ Makura Yesus ayita varongwa vendi murongo navaviri atapa nkondo daku tjida mpepo dakunyata, dirupuke mumarutu ghavantu, naku verura ma uvera na mahamba ghaku kushuva-shuva. ² Madina ghava Apositoli murongo navaviri ngo ghano agha kukwamoko. Wakuhova, Simoni (ogho kava twenyanga ashi Peturusi), ntani Andriyasi mu unyendi; Jakopu mona Zebede; ntani Johanesi mu unyendi; ³ Filipusi, ntani Bartolomeusi; Tomasi; ntani Mateusi mufutiti mutero; Jakopu mona Alufeusi, ntani Tadeusi; ⁴ Simoni wamupampi; ntani Judasi Isikalyoto ogho amu tuliro muliyome. ⁵ Ovano murongo navaviri Jesusi ava tumu varupuke. Ava tantere kumwe na kughamba ashi, ''Kapishi muyende kulivango oko vatunga vaHedana, ntani kapishi muka ngene mudoropa davaSamaritani. ⁶ Nane ngoli yendenu kuntjwi dakukombana mumandi ghava Israeli; ⁷ yendenu, kayuvitenu kumwe naku vatantere ashi, 'untungi wa liwir pepi ghuna kara.' ⁸ Kaverurenu vaveli, karambwitenu va fe, kaverurenu vavingondwe, ntani katjidenu mpepo dadidona muvantu. Maghoko-ghoko mwavi wana, ntani kavi tapenu maghoko-ghoko. ⁹ Kwato kushimba ngorodo, na siliveli, ndi ngoporo mundjato denu. ¹⁰ Kwato kushimba ndjato damuruyendo, ndi vikoverero viviri, ndi vicapa, ndi shiruwanita kehe shino, muruwani kwa hepa kuwana ndya dendi. ¹¹ Nkene muna ngene mushitata ndi mukunda, muna hepa kuyenda murombe mararo mumundi omo vana mutambura, muna hepa kukara momo dogoro mpopo ngamu tundamo. ¹² Kumeho yaku ngena mo mumundi, muna hepa kumorora. ¹³ Nkene vana mutambura mumundi, muna hepa kukandayika ogho mundi ukare mu mpora. Nkene kapi vana mutambura, ghupenu mpora yenu yi vyuke kukwenu. ¹⁴ Nkene vantu kapi vana mutambura, ndi kapi vana tambura nkango denu, muna hepa kuyenda mupitakane ogho mundi ndi shitata, ntani muna hepa ku kukumuna mbundu kumpadi denu. ¹⁵ Vya ushili naku mutantera ashi, opo ngali tika mo liyuva lya mpanguro, mpanguro ya shino shitata ngayi kapitakana ya Sodomu naGomora. ¹⁶ ''Kengenu, ame kuna kumu tuma yira ndjwi mukatji kamambungu, mpo ngoli shi karenu muna vangara yira mayoka ntani muna hepa ku kuruka yira vankuti. ¹⁷ Karenu mu nomene vantu! Vavo ngava mutwara kumpanguro, ntani ngava mushepura na ngoreka muSinagoge davo. ¹⁸ Vavo ngava mutwara kumeho ya vapangeli na vaHompa mukonda yande, anwe ngamu ka kare vambangi vande kukwavo ntani na ku vaHedana. ¹⁹ Opo ngava mukwata, kapishi ngamu kare nashinka ashi vinke mukaghamba ndi weni omo mu kaghamba, ovyo ngamu kaghamba ngava vimutantera mpopo paruvede oro. ²⁰ Ntani kapishi anwe ngamu kaghambo, ano ngoli Mpepo ya Shenu ndjo ngayi kaghambo mu mwenu. ²¹ Vakuruvenu nava univenu ngava kamu tapa va mudipaye, ntani vasha ngava katapa vana vavo va vadipaye. Vanuke ngava kaku limba na vakurona vavo, vavo ngava kakudipaya-dipaya vene-na-vene. ²² Va vayingi ngava kamunyenga mukonda ya lidina lyande. Ano ngoli kehe ghuno ngaka karo nalididimiko dogoro ku uhura, ghuye ngaka yoghoka. ²³ Nkene kuna kumuhepeka muno mushitata, muna hepa kutundamo muyende mushitata shaku kwamako, vya ushili na kumutantera ashi, anwe kapi ngamu yenda mumane vitata navintje vya muIsraeli makura Mona Muntu naye ngamoneke. ²⁴ ''Murongwa kapi apitakana mushongi wendi, ndi mukareli kapi akara pawiru ya muhona wendi. ²⁵ Ano ngoli vyatikiliramo tupu ashi murongwa afane yira murongi wendi, ntani mukareli yira muhona wendi. Nkene shi vavo kwa twenyine muhona wenu ashi ndje Belisebuli - mukurona wa mpepo dadidona, anwe varongwa vendi ngava kamuyitita na madina ghamadona unene! ²⁶ Mpo ngolishi kapishi ngamu va tjire, kwato osho shavando ashi ngashipire kushoroka paghukenu, ntani kwato osho sha vando ashi ngava pira kushi yiva. ²⁷ Kehe vino nganu mutantera mu mundema, muna hepa kuvighamba mu ukenu, ntani kehe vino ngamu yuvha mukahore-hore, yendenu mukavighambe kwa kehe ghuno. ²⁸ Kapishi kutjira vantu kudipaghaya rutu tupu ano ngoli vavo na kuvhurashi kudipaya monyo. Nane ngoli tjirenu wa kudipaya navintje monyo na rutu vidjonauke mumundiro wa naruntje. ²⁹ Nane mandjunge maviri kwato kughaghulita ku senda yimwetupu? Ano ngoli kwato nampili limwe tupu liwere palivhu shenu apire kuliyiva. ³⁰ Nampili huki damu mutwe ghoye nado dapwa kuvarura. ³¹ Kapishi ghukare naghoma. Ove wakara na mulyo unene kupitakana mandjunge ghama yingi. ³² Mpo ngolishi kehe ghuno ngatongonono akare mbangi yande kumeho ya vantu, name nka nganu katongonona umbangi wendi kumeho yava Vava vamuliwi. ³³ Ano ngoli kehe ghuno ashweno kuya kukwande kumeho yavantu, name nganu kamushwena kumeho ya vaVava va muliwi. ³⁴ ''Kapishi mughayare ashi ame kwaya nuyite mpora pano palivhu. Ame kapi naya mukuyita mpora, ame kwayita rufuro. ³⁵ Ame kwayita unkore pakatji ka monarume aku gaunuke na vashe, ntani mukodona aku gaunuke na vawina, ntani mukadikwara aku gaunuke na vangumweyi yendi. ³⁶ Ovo wa tunga navo mumundi ghoye mbo ngava karo vanankore voye. ³⁷ Kehe ghuno wakuhora vashe ndi vawina kupitakana ame, ogho kapi awapera kuya kwande; kehe ghuno wakuhoro monendi wa mumati ndi wa mukadona kupitakana ame, ogho kapi awapera kuya kukwande. ³⁸ Kehe ghuno wakupira kudamuna shilivindakano shendi akwame mumwande, ogho kapi a wapera kuya kukwande. ³⁹ Kehe ghuno wakuhora liparu lyendi ghuye ngaka likombanita. Ano ngoli kehe ghuno waku nyenga liparu lyendi mukonda yande ghuye ngaka liwana. ⁴⁰ ''Kehe ghuno wakumutambura ame tupu ana tambura, kehe ghuno wakuntambura ame ghuye kuna tambura nka ndjegho antumo ame. ⁴¹ Kehe ghuno wa kutambura muporofete mukonda ya lidina lyendi lya muporofete, ghuye nga wana mfuto, na ushwi na matungiko ghaghuporofete, ntani kehe ghuno wa kutambura muntu wamuhungami mukonda yaghuhungami wendi ghuye ngawana mfuto, na ushwi na matungiko ghakutunda kumuntu wa uhungami. ⁴² Kehe ghuno wakutapa nkinda ya mema ghamatenda mulidina lyande ogho ndje mukareli wande ndjegho, vya ushili na kumutantera ashi, muntu waku fana weno kapi ngaka kombanita mfuto yendi.''