¹ Yesus kwa rondire muwato, avindakane lidiva, ayende ku shitata shavo. ² Makura, ava yita kukwendi mukafumu wa shirema shamundambo ghuye kuna rara pa ghuro. Jesus opo amonine ashi vavo vana kara na lipuro, ghuye aghamba atantere mukafumu wa shirema ashi, "Monande, kara naruhafo. Ndjo doye vanadi dongononapo.'' ³ Makura, vamwe mukatji kavarongi matjangwa ava ghamba mumutjima davo ashi, ''Ghuno mukafumu kuna kushwaura Karunga.'' ⁴ Yesus ayivire ovyo vana kughayara munda yadi mutjima davo makura aghamba ashi, ''Vinke muna kughayarera vyavidona munda yadi mutjima denu? ⁵ Vyaghurerupo ne vinimbyo, vyaku kughamba ashi, ''Ndjo doye vana didongononapo,' ndi vyaku ghamba ashi, 'Shapuka yenda'? ⁶ Mposhi ngamu yive ashi Mona Muntu kwakara nankondo pano pa livhu ghuye kuvhura kudongononapo ndjo,... '' Makura atantere shirema ashi, ''Shapuka, damuna ghuro ghoye, kayende kumundi ghoye.'' ⁷ Makura mukafumu ashapuka ayendi kumundi wendi. ⁸ Mbunga opo vamona vino, avatetuka unene makura ava fumadeke Karunga, ogho atapango nkondo ku vantu. ⁹ Yesus makura atundupo aka yende, ghuye amono mukafumu walidina Mateusi kuna shungiri ku tende ya vafutiti mutero. Ghuye amutantere ashi, ''Nkwame.'' Ghuye ashapuka amu kwama. ¹⁰ Yesus aka shungira mundjugho ghuye kuna kulya, makura, vafutiti mutero vavangi na vantu va ndjo navo avaya vayalye kumwe naYesus na varongwa vendi. ¹¹ Va Farisayi opo vamonine vino, ava ghamba na varongwa vendi ashi, "Mukonda munke murongi wenu ana kulya kumwe na vafutiti mutero ntani na vantu va ndjo?'' ¹² Yesus opo ayuvhire vino, ghuye aghamba ashi, "Vantu va ukanguki pa rutu kapi va shananga nganga, nkwandi vaveli. ¹³ Muna hepa kuyenda muka kuronge ovi dina kutanta dino nkango vaghamba ashi: 'Ame kwa hora ghufe nkenda, kapi shi ndjambo.' Ame kapi nayera vahungami ashi vatjindje ukaro, nane ngoli kwayera va ndjoni.'' ¹⁴ Varongwa va Johanesi avaya ku kwendi va mupure shi, ''Mukonda munke atwe na vaFarisayi kehe pano kuraperera na kudililira, ano ngoli varongwa voye kapi varapereranga naku dililira?'' ¹⁵ Yesus ava limburura ashi, ''Vantu vakuya ku shipito shankwara na kuvhura shi vakare muliguvo nkene mukwali shimpe mpwali kukatji kavo? Ano ngoli shirugho ngashiya opo nga tundamo mukwali mukatji kavo, ntani navo ngava kara pa ndapero yaku dililira. ¹⁶ Nakuvhurashi muntu kutura vivandeko vyavi kuru-kuru pa vyuma vyavipe, shivando shashikuru-kuru ngashi taghukapo shitundepo pavyuma, makura vyuma ngavidjonauka nakutauka mwamu nene. ¹⁷ Ntani nka muntu na kuvhurashi kuturanga marovhu ghamape mushipapa shashikuru-kuru. Nkene ngaghutura marovhu ghamape mushipapa shashikuru-kuru, marovhu ghamape ngagha taura shipapa shashikuru-kuru, makura ngaghu kombanita marovhu kumwe nashipapa. Mpo ngolishi, ghuna hepa kutura ntani marovhu ghamape mushipapa shashipe, ntani ngaghu renka navintje vikarepo.'' ¹⁸ Yesus ghuye shimpe kuna kughamba navo, vaharukako tupu, murume umwe wa matimbi aya atongamene kumeho ya Jesus. Ghuye aghamba ashi, ''Monande wa mukadona ntantani tupu ana kudohoroka, tuyende ghuka kambeke lighoko lyoye pendi, makura akare na monyo. ¹⁹ Makura Yesus ashapuka vayende kumwe naye, varongwa vendi navo ava kwamako. ²⁰ Mundjira yavo, mukamali ogho akaliro na uvera wa kupita honde ghure wa mwaka murongo-nambiri akwama Yesus munyima dogoro aka kwata ku lirwakani lyendi. ²¹ Mukondasi ghuye ghambire munda ya mutjima wendi ashi, ''Nkene tupu kunu kwata kulirwakani vyendi, ndi kunu veruka.'' ²² Makura Yesus mpopo tupu apiruka kunyima amu mono, aghamba ashi, ''Monande wa mukadona, wakara nalipuro; lipuro lyoye lina kuverura.'' Mpopo tupu mukadona averuka. ²³ Yesus opo ayatikire mumundi wa litimbi, aya wanamo vaveti vamarumbendo na mbunga kuna ku lira. ²⁴ Ghuye ava tantere ashi, ''Rupukenumo, ghuno mukadona kapi ana fu, kuna rara,'' Ano ngoli vavo ava mushepe na kumushwaura. ²⁵ Opo va rupukiremo vantu navantje, ghuye angene mo mundjugho makura amukwata kulighoko, mukadona arambuka. ²⁶ Makura yina mbudi ayi kughanene mushirongo nashintje. ²⁷ Yesus opo atundirepo akayende, vakafumu vaviri vavatwiku ava mukwama muruku. Vavo ava yiyiri naliywi lya kudameka unene ashi, ''Mona David, tufere nkenda!'' ²⁸ Yesus ayendi aka ngena mumundi, vakafumu vavatwiku ava mukwama navo vaka ngene mumundi. Yesus ava pura ashi, ''Muna pura vya ushili ashi ame kuvhura numu verure ndi?'' Vavo ava limburura ashi, '' Yii,, Hompa.'' ²⁹ Makura Yesus aya kwata pa mantjo ghavo aghamba ashi, ''Vishoroke kutwara mulipuro lyavo,'' ³⁰ mpopo tupu ava pahuka mantjo ghavo. Makura Yesus atapa marondoro kukwavo ashi, ''Kengenu, kwato ogho muvhura kutantera kuhamena vino.'' ³¹ Ano ngoli vano vakafumu vaviri ava yendi ndjira nayintje vahanite yino mbudi na kuntje. ³² Tupu vatundirepo vano vakafumu vaviri vaka yende, mpopo tupu, ava yita mukafumu washipuru-puru kwa Yesus ogho akaliro na mpepo dadidona. ³³ Tupu atjidiremo mpepo dadidona mumwendi, mukafumu makura atameke kughamba. Mbunga ayi tetuka unene kumwe naku ghamba ashi, ''Ovino shimpe kapi twavi mona rumwe mu Israel!'' ³⁴ Ano ngoli Vafarisayi vavo avaghamba ashi, ''Ghuye kuruwanitnga mupangeli wa mpepo dadidona, makura atjidemo mpepo dadidona.'' ³⁵ Makura Yesus ayendi vitata navintje ntani na dimukunda nadintje. Ghuye ayendi muSinagoge aronge na kuyuvita Mbudi ya Ruhafo ya untungi wa liwiru kumwe naku verura ma uvera na mahamba naghantje. ³⁶ Opo amonine mbunga yayinene, ghuye ava fere nkenda unene, mukonda shi vahepire unene ntani kwa kalire na liguvo. Vavo kwakalire yira ndjwi dakupira mushita. ³⁷ Ghuye aghamba kuvarongwa vendi ashi, ''Muyangu ghuna vhuka unene, ano ngoli varuwani va sheshu. ³⁸ Mpo ngoli shi shungidenu kwaHompa mwenya-muyangu, nga tume varuwani vavayingi mulifuva vaka wapayike muyangu.