¹ Opo amanine kuronga Jesus makura atumu varongwa vendi murongo na vaviri, ava tundupo vaka yende tunda shitata yenda shitata vaka yuvite naku ronga. ² Johanes ghuye mudorongo opo ayuvire viruwana vya Jesus, makura atumu mbudi ku varongwa ndi, ³ vakamupure ashi, ''Ove twa yuvha ghuna kuyo ndi?, ndi tu taterere ko wa peke?'' ⁴ Jesus alimburura naku vatantera ashi, ''Yendenu kwa Johannes kamu tanterenu ovi muna mono ntani navi muna yuvhu. ⁵ Vatwiku vana pahuka kuna kumona, virema kuna kuyenda, vavingondwe vana kukushuka vana veruka, vipuru-puru kuna kuyuvha ntani kuna kughamba, va fe vana rambuka ku mfa, ntani Mbudi ya Ruhafo kuna kuyi yuvita kuva hepwe. ⁶ Muna lirago ndjeghu waku pira ku kulimba name.'' ⁷ Opo va tundirepo vano va ntumi, Jesus makura atantera mbunga ya vantu vyaku ghamena kwa Johannes ashi, ''Vinke ovyo mwa yendilire muka mone mu mburundu - rughu rwaku kunyunganga ku mpepo ndi? ⁸ Vinke ovyo mwa yendilire muka mone mu mburundu - murume waku dwata vyuma vya ndiro vyaku rerema ndi? Ame shi, vakudwata vyuma vyaghu fughuli vyaku rerema kwatunga mumbara dava Hompa. ⁹ Vinke mwa yendilire muka mone mu mburundu - mu Porofete ndi? Yii, ano ngoli ame kuna kumu tantera ashi, ghuye kwapitakana mu Porofete. ¹⁰ Ghuno ghuye ndjegho vatjanga mumbapira ashi, 'Kengenu, ame kuna kutuma ntumi wande kumeho yenu, ogho ngaka wapa yiko ndjira yenu.' ¹¹ Vya ushili naku mutantera ashi, mukatji kavo vashampuruka vakamali kwato ghumwe wamunene waku pita kana Johanes Muyoyi. Ano ngoli muntu wamu didi mu untungi wa liwiru ndje wamunene ogho amu pitakano ghuye. ¹² Kutunda pa shirugho sha Johannes Muyoyi dogoro weno, Untungi waliwiru kwa kara mumahepeko, ntani vantu vavarunde kwaghu pangeranga na nkondo davo vavene. ¹³ Nkango dava porofete ntani na veta Moses odo vaghambire kwa kalireko dogoro mpopo amonikire Johanes; ¹⁴ ntani nkeneshi anwe kuvhura kuvitambura, ghuye ndje Elijah ogho vaghamba ngakayo rukando rwaghu viri. ¹⁵ Kehe ghuno akaro na matwi ghakuyuva, ayuvhe dino nkango. ¹⁶ Anwe vantu vantantani kumu fanikita kunke? Anwe kuna fana yira vanuke vana kudanauko paliyandja, vavo kuna shungiri kuna kudanaghuka ¹⁷ ntani vavo kuna kughamba ashi, 'Atwe katumu yimbiri ntjumo mudane, ano ngoli anwe kapi muna kudana. Ntani kuna kuyimba ntjumo damu litamu daliguvo ashi ndi mulire, ano ngoli anwe kapi muna kulira.' ¹⁸ Johanes ghuye kwayire kapi kalyanga ndya ntani kapi kanwanga vikorwita, anwe amughamba ashi, 'Ghuye kwa kara na Mpepo ya yidona.' ¹⁹ Ano ngoli Mona Muntu opo ayire ghuye kalyanga na kunwa, makura anwe amu ghamba ashi, 'Mukengenu shi, ghuye muntu wama kurulya ntani naghu nkorwi, ntani ghuye mbyo akukwata ghukwavo navafutiti mutero ntani na vantu ndjo!' Kehe ghuno akaro na ukonentu wa ushili kughu neyeda muviruwana vyendi.'' ²⁰ Makura Jesus aghamba naghugara naku rondora vino vitata navintje omo ayuvitilire nkango da Karunga na nkondo ntani navitetu vyavinene, ano ngoli kapi vaku shighulire vapure mumwendi. ²¹ "Lihudi lya linene kukoye ove, shitata sha Gorasini ! Lihudi lya linene kukoye ove, shitata sha Betesaida! Vino viruwana na vitetu vyavinene vina shorokero mu shirongo shenu, ashi ndi kuna shorokere mushitata sha Tirenu ntani na Sidoni, ndi vana shayeke kuruwana udona vaku shighure varaperere naku kukwita mutwitwi vadwate vyuma vyaku tavaghuka vaku shighure. ²² Ame kuna kumu rondora ashi mpanguro ya shitata sha Tirenu na Sidoni ngayi kakara ghureru ntani yenu ngava kadameka uenene opo ngali tikamo liyuva. ²³ Nampili, ove Kaperenaumu, vakutunga mbyo vakutumba mbyo wanenepa ashi dogoro ngaghu katike kuliwiru ndi? Hawe, nampili kuna kumanga ove tupu kukarumuka ngaghu yende mushirongo sha vafe! Ovino vitetu vya vinene vina shorokero mumoye ndi kwa shorokilire mushitata sha Sodomu, shino shitata ndi shimpe mpo shilipo na namuntji. ²⁴ Ame kuna kukurondora ashi, mpanguro ya Sodomu ngayi kakara ghureru ntani yoye ngava kadameka unene, liyuva lyoye lyaghuhura ngali kakara lyaghu dito unene kukoye.'' ²⁵ Pashirugho shino Jesus araperere ashi: ''Ame kuna kutapa mpandu kukwenu, Vava, Hompa waliwiru na livhu, mukondashi anwe kwahoreka vino navintje kuva konentu na vantu vandunge, mbyo mwa vishorora tupu kuvantu vaku kukarera vayive ushili wenu vakare yira vanuke. ²⁶ Yii, Vava, anwe kwa ruwana ghuhunga yira momu mwa vishanena. ²⁷ Vavava kwa tapa naku neyeda vininke navintje kukwande, ntani kwato ghumwe ogho ayivo Mona nkwandi Vashe tupu pentjavo, ntani kwato ghumwe ogho ayivo Vashe nkwandi Mona tupu pentjendi, ntani kwa kehe ghuno atoghorora Mona ghuye kuneyeda naku shorora navintje vamuyive. ²⁸ Yenu kuno ku kwande, anwe namuvantje mwa damuno mudigho wa udito, ngamuya wane ghupwiyumukiro. ²⁹ Damunenu djoko yande kukambekenu ntani kurongenu marongo ghande, mukondashi ame kwa ghomoka mbyo naku didipita mumutjima, mposhi anwe ngamu yawanenemo lipwiyumuko lya monyo denu. ³⁰ Mukondashi djoko yande yireru ntani mudigho wande ghureru unene."