¹ Nkeneshi anwe kwamu vvumbura kuufe kumwe na Kristus, kondjerenu ngoli vya muliwiru, omo ana kara Kristus kuna shingiri ku rulyo rwa Karunga. ² Ghayarenu ngoli vya muliwiru, kapishi mughayare vya palivhu. ³ Mbyovyoshi anwe mwa fa, monyo denu mbyo vadihoreka kumwe na Kristus mwa Karunga. ⁴ Monyo wenu wa ghupe kwa kara mwa Kristus , opo ngashoroka nanwe ngamu shorokera mu mwendi kumwe naye, nanwe ngamu kara mu Uyerere yira momu akara ghuye mu Uyerere. ⁵ Dipayenu ngoli, ogho, madowo akaro mumwenu gha pantunda ya livhu yira ngoghano - rushonda, na nyata ya kupira ukushuki, lidowo, na Urunde, kumwe na makuru lya, kutanta ashi Ukareli wa vaKarunga va vimpempa. ⁶ Vino mbyo vya yitango po lishandu lya Karunga liye kuva dini Karunga. ⁷ Vino mbyo kamu ruwananga nanwe opo mwa kalire mu ukaro wa weno. ⁸ Weno shuvenu ngoli navintje vino - yira lishandu, na Ugara, na nyanya, na matuka ntani na nkango dadidona ditunde mo mukanwa kenu. ⁹ Kapishi mukutantere-tantere vimpempa, anwe ova mwa shuturo muntu wa mukuru-kuru na Ukaro wendi owo akara nagho, ¹⁰ anwe weno muna dwata muntu wa mupe mbyo muna kufana na shishwi shamushiti wenu karenu ngoli na Ukonentu mposhi mumuyive. ¹¹ Kwato nka ashi uno muGereka ndi muJuda, Oghu varuwana vyavamba ndi ogho vapira kuruwana vyavamba, wa kukuronga, ndi libotwa, ndi mupika, ndi mumanguruki, Kristus kwakwata navintje ntani ghuye kwa kara mwa navantje. ¹² Mpongolishi, anwe ova atoghorora Karunga, mukare vapongoki ovo ahora, karenu na dimutjima da nkenda, na mbili, na kukudidipita, na Unongo ntani na lididimiko. ¹³ Karenu nalididimiko mukatji kava unyenu. Kughupira-ghupirenupo nkene muna kudjono umwe na unyendi, dongononenu po va unyenu ma undjoni ghavo yira momu adongonona po Hompa ma undjoni ghenu. ¹⁴ Mwavino navintje, karenu na shihoro, oshi shakwatakano navintje kumwe nalikukwatakano lya kutikiliramo. ¹⁵ Renkenu ngoli mbili ya Kristus yi pangere munda ya dimutjima denu. Mukondashi yino mbili ndjo ya muyito muya kare murutu rwendi. Pandurenu Karunga virugho navintje. ¹⁶ Renkenu mbudi ya Kristus yivhuke na kuhungamena mu mwenu. Karenu na Ukonentu wa kuronga na kupukurura - pukurura va Unyenu na Unongo na Untje ntani na dimutjima da ruhafo yimbenu kumwe mapisalome na ntjumo ntani na ntjumo dapa mpepo. Yimbirenu Karunga na dimutjima da ruhafo. ¹⁷ Kwa kehe vino muna kuruwana, navi muna kughamba, viruwanenenu mulidina lya Hompa Jesus kumwe na kupandura Karunga shetu mumwendi. ¹⁸ Anwe vakamali, muna hepa kulimburuka kwa kuva kafumu venu, yira momu vya wapera kushipara sha Hompa. ¹⁹ Anwe vaka fumu horenu vakamali venu, kapishi mukare na nyanya kukwavo. ²⁰ Anwe vanuke limburukenu kuva kurona venu kwa kehe vino, vino mo vyahungamo kushipara sha Hompa. ²¹ Anwe vasha, kapishi kugarapera vana venu na ugara wa kupitakanena, dogoro vanuke vapire kukara na lihuguvaro mumwenu. ²² Anwe vapika, limburukenu kuva hona venu vapa ntunda ya livhu ku navintje, kapishi nkene tupu kuna karapo vamu kengere na mantjo, ntani muna kuruwana muhafite vantu, ano ngoli anwe ruwanenu na mutjima na Untje. Mbyovyo shi anwe kwa tjira Karunga. ²³ Kehe vino mwa ruwananga, muna hepa kuviruwana na mutjima na Untje yira ndjeghu aruwanenango Hompa kapishi vantu. ²⁴ Mwa yiva nawa-nawa ashi anwe ngamu kawana mfuto na upingwa wenu ogho amu twenyedera Hompa. Mbyovyo shi anwe kwa ruwanenanga Hompa Kristus. ²⁵ Kehe uno aruwano udona ngaka wana mfuto yendi ya udona yira momu aruwana udona wendi, pa hana kukara likushuvo.