¹ Vakurona, tapenu kuvapika ovyo vyawapo ntani vyashetakana, mwayiva anwe waro mwakara namukurona muliwiru. ² Twikirenu naghupampi mundapero. Karenu munavangarara mumwavyo mukutapa mpandu. ³ kandererenu kumwe natwe waro, ashi Karunga agharwire livero nkango, mukughamba mahoramo ghaKristusa. Mukonda yavino, Ame kwamangerera. ⁴ Kandererenu ashi Ame nivikenitange, yira momo Ame navishanena kuvighamba. ⁵ Yendenu mughunongo novo vapandje, ntani rughanitenu shirugho. ⁶ Renkenu nkango denu kehe pano dikarange daghufe nkenda. Direnkitenu ditovare namungwa, mposhi anwe ngamuyive ashi weni mwakulimburura kehe muntu. ⁷ Kuvininke vyakuhamena Ame, Tychicus ngavirenkita viyivikwe kukwenu. Ghuye ndje ghunyande wakuhora, mukareli wakuhuguvara, ntani ghumwe wamupika mwa Hompa. ⁸ Ame kwamutumina kukwenu vino, ashi anwe ngamuyive vininke vyakuhamena atwe, ntani mpo ashi ghuye ngakorangede dimushima denu. ⁹ Ame namutuma kumwe na Onesimus, ghunyande wakuhuguvara ntani wakuhora, ogho ghumwe wenu. Ngavayayivita kukwenu navintje ovyo vyashoroko kuno. ¹⁰ Aristarchus, nkwate ghunyande, anamumororapo anwe, ntani waro na Marukusa, shiro sha Baranabasi (kogho mwatambulire manangwiro: ntjene ngaya kukwenu anwe, mutamburenu ghuye), ¹¹ ntani waro Jesusa ogho vatwenyanga Justusi. Vavo pentjavo vavamba mbo varughani vaghunyande vaghuntungi wa Karunga. Vavo kwakara valikorangedo kwande. ¹² Epaphras anamumororapo. Ghuye ghumwe wenu ntani mupika wa Kristusa Jesusa. Ghuye kehe pano kwakukwamberanga anwe mundapero , mpo ashi anwe ngamuyimane nawa-nawa ntani ngamutikiliremo mumpangera nadintje da Karunga. ¹³ Mbyovyo Ame kuvura kungambipara ashi ghuye kurughana naghupampi mwarwenu, navo vamu Layodishiya, ntani navo vamu Hiyerapolisi. ¹⁴ Rukasa ndokotora wakuhora ntani Demasi vanamumororapo anwe. ¹⁵ Mororenupo vaghunyenu vamu Layodeshiya, ntani Nkirishe oyo yakaro mumundi wendi. ¹⁶ Opo ntjangwa-tumwa yino ngavayivarwira mukatji kenu anwe, ngavakayivarwire waro munkirishe yava kaLaodishia. ¹⁷ Tanterenu Archippus,'' Kengenu kughuyivi ogho mwatambulire mwa Hompa, ashi mughutikitemo. ¹⁸ Ghano makundo namaghoko ghana ghumwande-Paurusa. Vurukenu maghuketanga ghande. Ghufe nkenda ghukare nanwe.