¹ Vya kuhamena mbatero ya vantu vaKarunga vamuJudeya, ame kapi na hepa kuvi mutjangera. ² Mbyovyoshi shihoro shenu shakukwafa na shiyiva, ame mbyo na kupandayikiranga nutantere vantu vamu Makedoniya. Ame kwava tantera ashi vaGereka vakuwapayikira kutapa kutameka mwaka una kapito. Mbatero yenu ndjo ya renkito vavangi vatameke kutapa. ³ Ame kuna kutuma va unyande kukwenu, mposhi muku wapayikire yira momu mwavi tanta, ngamu yavaneyede ashi atwe kwavyo twa ghambanga vya kuhamena kukwenu kapishi vya maghoko-ghoko. ⁴ Ndipo, nkeneshi ngatuya kukwenu kumwe na vaMakedoniya vamwe ngatu ya muwane kapi muna kuwapayikiri, atwe ngatuya kuyuvha ntjoni unene-ntani kwato ovyo ngautuya vhura kuya ghamba nanwe-kwavyo twa mupandayikanga kuvantu. ⁵ Ame mbyo nakughayara ashi nahepa kutuma va unyande ngava hove kuya vaya wapayike vitapa ovyo mwa tutulikira. Mposhi ngavikare vitapa vyaviwa, kapishi vya mutjima koka. ⁶ Yivenu vino ashi, Kehe uno wa kukuna mbuto ya yisheshu kuyangura muyangu wa usheshu, ntani kehe uno wa kukuna mbuto yayingi nashihoro naye kuyangura muyangu wa ghungi. ⁷ Kehe muntu atape mukukuyenda na mutjima wendi, kapishi na mutjima koka ndi yira vyamu mutininiko, mokondashi Karunga kwa hora vakutapa na shihoro na mutjima wa uwa. ⁸ Karunga kuvhura atape limona lyalingi unene kukwenu, mposhi, kehe pano, mukare na limona olyo mwahepa, ntani na limona lyalingi kwenu na umwenu. Mposhi ngamu kare nalimona lyalingi unene ngamu ruwane viruwana vyenu. ⁹ Yira momu tupu vavitjanga ashi: "Kehe uno wa kudamuna limona lyendi atape ku vahepwe. Ghuhungami wendi ngaghukarererapo naruntje na naruntje." ¹⁰ Karunga ogho atapango mbuto ya kukuna kwa mukuni na ndya da kulya ngamupa mbuto yayingi oyo mwahepa nga mukune. Ntani nka uye ngamenita nga vhukite muyangu wa mbuto yenu ya uhungami. ¹¹ Ghuye ngamupa limona lyaliyingi unene ngamukare vatapi va uhunga kwa kehe vino. Makura vavangi ngava pandura Karunga wetu kupira mumwenu. ¹² Mukonda shi viruwana vino muna kuruwana kapishi kuna kuhepurura tupu vapongoki pentjavo, nane ngoli kuna kutapa mpandu kwa Karunga mu marupe ghaku ku shuva-shuva. ¹³ Muneyede shiruwana shenu sha kufumadeka Karunga mukonda ya kulimburuka ku Mbudi ya Ruhafo ya Kristus. Anwe ngamu fumadeka nka Karunga na vitapa vyenu vyaviwa ku kwavo na kwa kehe uno. ¹⁴ Vavo kumu vhuruka na kumu tura muma kanderero kehe pano. Vavo kuruwana vino mukonda ya ufe nkenda wa Karunga wa unene kukwenu. ¹⁵ Tupandurenu Karunga mukonda ya ushwi wa ghungi wa kupira kuvhura kutanta?