¹ Vakwetu, atwe kuna shana tumu tantere ko ovyo ya ruwana Nkenda ya Karunga mu mbungakriste da ku Makedoniya. ² Vavo kwa kalire na mahepeko ghamangi, mukonda ya ma udito ghamanene na ruhepo rwarunene, ano ngoli vavo kwa tapire mbatero ya yinene unene, mbyo va tapire limona lyavo lyalinene, na dimutjima dadiwa. ³ Ame mbangi yavo vavo kwa tapire vyavingi unene dogoro mpopo vakahulira, hawe vaka pitakanitirepo nka unene, ntani vavo kwatapire mushihoro sha vavene ⁴ vavo kwa kudjambilire unene vatambure muligwanekero lyavo va tamburango vantu vaKarunga. ⁵ Vavo kwa ruwanine kupitakana pavyo twatatilire ashi ndi mbyo varuwana, vavo pa muhovo kwa kutapire kwa Hompa ntani kukwetu yira momu avi shaninine Karunga. ⁶ Atwe mbyo tuna kukukorangeda ove Titus, ashi ngau tikitiliremo shiruwana osho sha Nkenda mukatji kenu, yira momu ashitamikire pa muhovo. ⁷ Anwe muva ngagho kwa navintje ovyo mwa kara navyo - mu lipuro, na kuyuvita, na ukonentu, na likudidimiko, ntani nashihoro shenu ku kwetu. Anwe karenu ngoli vatapi vamushiruwana shino sha nkenda. ⁸ Yino kapishi veta na ku tapa kukwenu. Nane ngoli, ame kuna ku shana tupu kusheteka shihoro shenu sha kutapa vitapa mu ku shishetakanita nashi sha vantu peke. ⁹ Anwe mwa yiva nkenda ya Hompa wetu Jesus Kristus. Nampili momu akalire ghuye mungagho, kwayire aya kare mu naruhepo mukonda ya shihoro shendi kukwenu, mposhi ghuye akare muhutu anwe mukare mu vangagho. ¹⁰ Mughukaro wa ku fana weno ame kuna kumupako tupu maghano ogho avhuro ku muvatera. Mwaka umwe una kapito, anwe vakuhova ovo mwahoviro kutapa vitapa, mukonda shi kwa shanine mutape. ¹¹ Tikitenumo navintje ovyo mwa tameka. Anwe mwakalire na shihoro sha ku viruwana, kehe uno atape kutwara movyo aweka, mposhi muneyede ashi anwe kuvhura kuruwana ovyo mwa tamikire. ¹² Ano ngoli nkene shi shihoro sha kutapa mposhili, Karunga nga tambura ushwi wenu momu mwa uwekera. Kehe uno akona kutapa mbyovyo aweka, kapishi ovyo apira kuweka. ¹³ Kwa shino shiruwana ame kapi na shana shikare ureru ku vamwe ntani viditopo kukwenu. Hawe, navintje vishetakane mu uhunga. Pantantani anwe muna kara na limona lyalingi uwa unene nkene mu vaterenu vahepwe. ¹⁴ Mposhi nke ngamu kara muruhepo ngava muvatera navyo va weka, makura nga mu shetakane. ¹⁵ Yira momu tupu vatjanga ashi, "Ogho aku pongayikiro vya vingi kwato ovyo vya hupiropo, ntani kwagho aweko vyavi sheshu kwato ovyo avhulire kuhepa." ¹⁶ Atwe kupandura Karunga, mukonda shi ana ragopeke Titus aya mukwafe yira momu twamu kwafa nga twe. ¹⁷ Ghuye kapi ana kuya kukwenu ashi mbyovyo mwa mushungida, ano ngoli nampili mwamwene naye kare avi tokomena. Naye kare ashana kuya kukwenu mushihoro shendi mwene. ¹⁸ Atwe kuna kumutuma kumwe na unyendi ogho afumano unene mumbungakriste na dintje mukonda ya kuyuvita kwendi Mbudi ya Rufafo. ¹⁹ Ano ngoli kapishi mbyovino tupu, ghuye kwamu toghorora mumbungakriste ayende kumwe natwe mushiruwana sha nkenda. Vino kwavi ruwananga tufumadeke Hompa, mukutapa umbangi wa shihoro shetu shakutapa kuva unyetu. ²⁰ Atwe ku yendita nawa viruwana vya kutambura vitapo mposhi kapishi vatupe untjoni wa kupongayika vitapa vino vyaviyingi unene. ²¹ Atwe kushana kuruwana uhunga, kapishi kushipara sha Hompa tupu, nane na mpili kumeho ya vantu. ²² Atwe kuna kutuma unyetu umwe kumwe navano vaviri. Ghuye twamu kona-kona rwarungi mbyo twa muwana ashi ghuye kuvhura kumu huguvara mu viruwana vyakuku shuva-shuva. Ghuye nampili weno kuna shana avatere unene mukonda shi akara na lihuguvaro lyalinene mumwenu. ²³ Ogho Titus, muruwani unyetu ntani umwe ogho atupango mbatero. Ovo va unyendi, vantumi vamu mbungakriste. Vavo kwa fumadeka Kristus. ²⁴ Vatamburenu na maghoko maviri na shihoro, neyedenu mbungakriste nadintje dimone shihoro shenu osho twa kufumadekeranga twe kukwenu ashi mu uhunga.