¹ Vakwetu vakuhora, matumbwidiro ghano naghantje kwetu ghahamena, renkenu ngoli tuku kushuke kwa kehe vino vya tunyateko parutu na mu dimutjima detu. Tukondjerenu ngoli kutjira Karunga kumwe na upongoki ndi. ² Tupenu livhango mudi mutjima denu? Atwe kwato ogho twa ruwana udona. Atwe kwato ogho twa twa remeka ndi kwato ogho twa shakana kehe shino. ³ Ame kapi na ku ghamba vino ashi kuna kumu pangura. Ame kare na ghamba vino ashi atwe kwa muhora unene mudi mutjima detu ashi, ndi tukare kumwe kehe pano muliparu ndi mu mfa ngatu kara kumwe. ⁴ Ame kwa muhuguvara unene, ntani ame ku kuyuvha mfumwa unene mukonda yenu. Ame kuna ku kuyuvha nkondo unene. Ame kuna kara na ruhafo rwarunene muma udito ghetu naghantje. ⁵ Nampili opo twa yire ku Makedoniya, kapi twaya wanine lipwiyumuko. Ntani, twa gwanikilire na ma udito ghavi tjokongana na vantu pa marutu ghetu avi tuyitilire liguvo na utjirwe mudi mutjima detu. ⁶ Ano ngoli Karunga, ogho apamekango di mutjima davantu va liguvo, uye kwa tupire nkondo opo aya tikire Titus kukwetu. ⁷ Kapishi momu tupu ayire Titus kukwetu mpo atu pire Karunga nkondo, nane ngoli na upampi wenu ogho awanine Titus kukwenu. Titus aya tutantilire ma udito ghenu, na runyando rwenu, ntani na shinka shenu shashinene kukwande. Ame anu kara naruhafo rwarunene. ⁸ Ame nampili momu ya mu guvitire ntjangwa tumwa yande, ame kapi na kuvi pakera mbili. Ame anu ya kuvere tupu opo na ya monine ashi ntjangwa tumwa yande yina mu guvita mudi mutjima, mushirugho shashifupi. ⁹ Ame weno na kara na ruhafo, kapishi mbyovo muna kara na liguvo, nane ngoli ruguvo rwenu kuna mutwara muka kushiure dimutjima. Atwe kapi twa muyitilire ma udito, ano ngoli anwe kwa kalire na liguvo muhafere Karunga yira momu avishanena. ¹⁰ Liguvo lya shihoro sha Karunga kuyita likushiuro mutjima lya kuyita liparu, liguvo lino muntu na ku vhurashi kukuvera. Ano ngoli liguvo lya mu udjuni lya kuyita mfa. ¹¹ Kengenu ashi vinke lina yita liguvo lya kutunda kwa Karunga mudi mutjima denu. Anwe kwa shanine muneyede ashi kapishi mu vandjoni kwa vino. Anwe mwa kara na ugara, anwe mwakara naghoma, anwe kuna kurura, anwe mwakara na ukonentu, ntani anwe kuna shana muruwane uhungami! Mwa navintje anwe kuna shana muneyede ashi mu vandjoni kwa navintje. ¹² Na mpili momu namutjangilire, kapi na tambire ovo varuwanango udona, ndi ovo varuwana udona, nane ngoli kwa shanine kumuneyeda uwa wenu ngamu kauku monene na umwenu kushipara sha Karunga. ¹³ Ovino vina tupa upampi wa unene. vino vina tuhafita unene, tuna kara na ruhafo rwarunene mukonda ya Titus, Mpepo yendi mwa yitendeka unene anwe na muvandje. ¹⁴ Ano ngoli nkeneshi ame na mufumadeka kushipara shendi, ame kapi vya ndjitira ntjoni. Yira momu tupu vyakara ovyo twa mutantere ashi ushili, navi twa mufumadeka nwe mwa Titus navyo nka ushili. ¹⁵ Anwe kwamuyenda unene kumutjima, nkene avhuruka ulimburuki wenu wa unene na muvantje, omo mwaya mutambulire na ghoma kumwe na utjirwe. ¹⁶ Ame kumpa ruhafo rwarunene mukonda shi anwe kuvhura kumu huguvara mwa navintje.