¹ Atwe varuwani va Karunga, atwe kuna kumu korangeda shi nkenda ya Karunga oyi mwa tambura kapishi mu yihepeke maghoko-ghoko. ² Karunga kwatanta ashi, "Pashirugho shashiwa na kuyuvire, ntani pa shirugho shiliparu na mupopilire." Kengenu, shirugho shashiwa shina tiki. Kengenu, shirugho sha liyoghoro linu ntjoshino. ³ Atwe kapi tuna kutura liwe mundjira ya muntu ashi nga pundukemo, kapi tuna shana ashi viruwana vyetu ngavi shwauke. ⁴ Ano ngoli, muvininke navintje ovino twa ruwananga, atwe kuneyeda ashi vakareli va Karunga. Atwe va kareli vendi mwanavintje mulididimiko, na mumpatakani, na muvihuna, na mu maudito, na ma upyakadi, ⁵ na kutoghona, na mudorongo, na mu ndjorongani, na mu viruwana vya rukisho, na kupira kurara matiku naghantje, na mundjara; ⁶ na mu ukushuki, na ukonentu, na mu kukukorerera, na mu unongo, na mumpepo ya kupongoka, na mu shihoro shakutikiliramo. ⁷ Atwe vakareli vendi mu nkango da ushili, da nkondo ya Karunga. Atwe kwa kara na virwita vya uhungami kuliwoko lya rulyo na lilya kurumontjo. ⁸ Atwe kuruwana kehe pano vatu fumadeka ndi vatushwaure, vatu ghambe mwa mudona ndi mwamu uwa. Atwe kutu rundira kehe pano ashi twapuka nane ngoli atwe vantu va ushili. ⁹ Atwe kutu kuruwana vya vidona yira kapi vatuyiva nane ngoli tuva ndambo kukwavo. Atwe kuruwana yira twafa nane - tuva yumi - kuna kumona! Atwe kuruwana yira vaka dorongo ano ngoli kapi twafa. ¹⁰ Atwe kuruwana na liguvo ano ngoli atwe kukara muruhafo kehe pano. Atwe kuruwana yira tuva hepwe, mposhi vantu vavangi va kare na limona. Atwe kuruwana yira kwato ovyo twaweka ano ngoli atwe twa weka navintje. ¹¹ Atwe twa mudukulira ushili na untje, anwe vaKorinte, ntani atwe mbyo twa muhora na dimutjima detu nadintje. ¹² Atwe kapi tuna mulimbiki, nane ngoli na umwenu muna ku kulimbo na dimutjima denu. ¹³ Muku vyuta rughoko - Ame kuna kughamba nanwe yira mu vana vande ashi - nanwe tuhorenu unene, tutamburenu. ¹⁴ Walye mwa kambadaranga kuruwanena kumwe na vantu va kupira lipuro. Ghukwavo munke wa karo pa vahungami na vakorokotji? Ntani ukwavo munke wa karo pa ukenu and mundema? ¹⁵ Ndi likuyuvho munke lya karo pa katji ka Kristus na vantu vakavipempa? Ndi panke vakuyukira mundiro vapuli navo vakupira lipuro? ¹⁶ Likuyuvho munke lya karo pakatji ka Ntembeli ya Karunga and Ntembeli ya Satana? Atwe Ntembeli ya Karunga wa monyo, yira momu atanta Karunga ashi: "Ame nganu tunga mu mwavo ntani nganu yenda ura mukatji kavo. Ntani ame nganukara Karunga wavo, vavo ngava kare muhoko wande." ¹⁷ Karunga kuna kutanta ashi, "Tundenumo mukatji kavo, kukarerenu," Mposhi, "Kapishi mukwate kuvininke vya kunyata, ame nganu mutambure. ¹⁸ Makura ame nganu kare Shenu, anwe ngamu kare vana vande vavakafumu na vakamali," mo ana kutanta Hompa wa nkondo nadintje.