¹ Atwe twa yiva shi ghano marutu ghetu ne kwa kara tupu ndjugho dapano palivhu nga gha ka djonauka po, ano ngoli atwe ngatu ka tunga mundjugho ya naruntje. Mu mundi ogho vapira kutunga vantu na maghoko, mu mundi wa naruntje mu liwiru kwa Karunga. ² Weno mbyo tuna kukema, mukonda shi tuna shana va tu upe mo tudirukire mumundi wetu wa muliwiru. ³ Atwe kuna shana vatu dwateke rutu rwarupe mposhi kapishi ngatu kare nka muhere-here. ⁴ Weno atwe shimpe kuna kara na marutu ghapa livhu, mbyo tuna kukema, mukonda ya ma udito. Atwe kapi tuna shana vatu shuture runo rutu. nane nongoli, kuna shana vatu dwateke marutu gha kukarerera po gha muliwiru, makura rutu rwa monyo wa naruntje nga rumine rutu rwa kufa, rwa pa nyama. ⁵ Karunga mwene ndje atu wapayikiro shino shiruwana shashinene unene, mbyo atupa mpepo yendi yikoreke shiruwana shakumeho ngashi tikiliremo. ⁶ Atwe kwa kara na lihuguvaro lya linene. Karenu muyive ashi shirugho shino tuna kara mu marutu gha palivhu, atwe ure unene tuna kara na Karunga. ⁷ Atwe kwa ruwananga vya mulipuro, kapishi kwavi twa monanga na mantjo. ⁸ Atwe kwa kara na lihuguvaro lya linene. Mbyo ngoli tuna shana po ashi ndi tutunde muno mu marutu ghetu tuka kare kumwe na Hompa. ⁹ Oshino ntjo shitambo shetu, tukare shi ure tuna kara na Hompa, ndi kumwe naye, atwe tuna hepa kumu tanga akare na ruhafo. ¹⁰ Mukonda shi na tu vantje ngatu kamoneka kumeho ya shipundi sha mpanguro ya Kristus, kehe uno ngakawane ovi aruwanine mu ukaro wa rutu rwendi yira momu aviruwanine mwene, vikare vya viwa ndi vya vidona. ¹¹ Mukonda shi, atwe twayiva ashi kutjira Hompa vinke shina kutanta, atwe mbyo tuna kukambadara kupukurura vantu. Atwe Karunga atu yiva nawa-nawa, ntani ame nahuguvara ashi nanwe mwa tuyiva nawa-nawa mudi mutjima denu. ¹² Atwe kapi tuna shana tuku fumadekere papenu, ashi atwe vantu vavawa. Nane ngoli, atwe kuna shana mukuyuvhe mfumwa mukonda yetu, mposhi mu wane lilimbururo lya uhunga, kwavo vaku kumonikitira limona lya marutu lya hanashi lya kumutjima. ¹³ Nkeneshi atwe tuna piyagana mundunge detu, ovyo vikare vyetu na Karunga; ano ngoli nkene shi tuva walika pa ndunge, ovyo vikare ma uwa ghamu mwenu. ¹⁴ Atwe kwatu pangeranga shihoro sha Jesus omo atu hora, mukonda atwe twayiva vino ashi: Muntu ghumwe tupu ndje afero na vantje, makura vantu navantje mbyo vafa kumwe naye. ¹⁵ Kristus kwa fera navantje, mposhi ovo vakaro na monyo, kapishi vaparuke liparu lya vavene ano ngoli va karere po ogho afiro mbyo aka vhumbuka. ¹⁶ Mukonda ndjoyino, atwe kapi tuna ku mona nka kuviruwana vya vantu, na mpili na Kristus naye mo twamumonine ngoli pa untu. Ano ngoli ntantani kapi shi mo tuna kumumona weno nka waro. ¹⁷ Mpo ngoli shi, kehe uno wa kukara mwa Kristus, akona ntani kukara muntu wa mupe. Muntu wa mu kuru-kuru akona kushaya po. Monenu, vavo vana kara ngoli vavape. ¹⁸ Vininke navintje vino kwa tunda kwa Karunga ndje avi ruwano. Karunga kwa tu yita tuya gwanenekere kumwe naye kupitira mwa Kristus mbyo atu pa shiruwana ashi vantu vagwanekere naye kupitira mwa Kristus. ¹⁹ Vino kuna kutanta ashi, Karunga kwa kalire mwa Kristus agwanikitire udjuni adongonone po ndjo da vantu ava yite kwa mwene, ghuye kapi nka avarulire viruwana vyavo vya ndjo. Mbyo atupa tuyuvite mbudi yendi ya ligwanekero. ²⁰ Atwe va ntumi na vakareli va Kristus, Karunga kuna shana aghambe nanwe kupitira mumwetu. atwe kuna kumu shungida mulidina lya Kristus ashi: "Tamburenu mbudi ya Karunga!" ²¹ Kristus kapi akalire na undjoni kehe uno. Karunga mbyo amutura akare ntjambo ya ndjo detu. Karunga kwa ruwanine vino mposhi atwe vandjoni ngatu tukare tuvahungami kwa Karunga kupitira mumwendi.