¹ Mpo ngolishi, Karunga kwa tupa shino shiruwana shendi, yira momu atupa Nkenda yendi, mpo ngolishi kapishi tudombe dimuntjima. ² Atwe twa shuva viruwana vya mukahore-hore navi vya kuyita ntjoni. Atwe kapi nka twa kara na vipempa ntani ndi tupukite na nkango da Karunga. Nane ngoli atwe kushorora ushili pa ukenu, tu kupopere kushipara sha Karunga kwa kehe muntu ogho ana kuyuvho liywi lya mumutjima wendi. ³ Ano ngoli nkeneshi mbudi yetu ya kara mulihoramo, nkwandi kwa horama kwavo ngava kadjonauko. ⁴ Mukonda yino, mupangeli wa mudona wa muno mu udjuni ghuye adjonaura ndunge davo vapiro kupura. Vino kwavi ruwana, mposhi va pire kumona ukenu wa Mbudi ya Ruhafo ya uyerere wa kristus, oghu akaro shishwi sha Karunga. ⁵ Atwe kapi twa ku yuvitanga na umwetu, atwe kuyuvita ashi Kristus ndje Hompa, atwe na umwetu va kareli venu morwa Jesus. ⁶ Karunga ogho aghambiro ashi, "Mu mundema ngamu tema shite sha kuyita ukenu." Ghuye ndje atuliromo shite sha ukenu wendi shiteme mu dimutjima detu, tu vhure kuronga vantu va yive uyerere wa Karunga ogho wa karo kushipara sha Jesus Kristus. ⁷ Ghu ngagho wa pa Mpepo atwe kwa ushimbira yira mu marutu gha lirova, mpo shi vivhure kushoroka ashi nkondo da dinene po da Karunga kapishi detu. ⁸ Atwe kwa kara muviponga kehe vino kehe pano, ano ngoli kapi vatudininina po. Atwe kwa kara muruhepo rwa runene, ano ngoli kapi vatushuvilira. ⁹ Atwe kwa kara muma hepeko ano ngoli Karunga kapi atu shuva; kutu ruwana vya vidona ano ngoli kapi va tudjonaura po; ¹⁰ kehe pano atwe kwa shimba mfa da Jesus mu marutu ghetu, mposhi monyo wa Jesus nagho umoneke mumarutu ghetu. ¹¹ Atwe mu ukaro wetu na untje kwa kara tupu mu mfa mukonda ya Jesus, mposhi monyo wa Jesus umoneke mumarutu ghetu ghano gha ku fa. ¹² Vino kutanta ashi mfa kuna kuruwana mumwetu, mposhi monyo uye mumwenu. ¹³ Matjangwa kwa tanta ashi: "Ame kwa pura, mbyo na kuvi ghamba." Mukonda ya Mpepo yino ya lipuro natwe mbyo tuna kuvi kughamba, mukonda shi natwe twapura, ¹⁴ mukonda atwe twayiva ashi Karunga ogho avhumburo Hompa Jesus ku ufe natwe nka ngaka tuvhumbura ku ufe kumwe na Jesus makura ngatu yende tuka kare kumwe naye. ¹⁵ Vino navitje kushoroka mukonda yenu, yira momu tupu yina kuvhuka nkenda ya Karunga yikuhanene mu vantu vavangi mo tupu nka vantu vavangi ngava shamberera na kufumadeka Karunga. ¹⁶ Mukonda ndjo yino atwe nakufashi unye. Nampili adjonauke marutu ghetu ghapa nyama, monyo detu da munda kuna kukara dadipe diwaperere. ¹⁷ Ghano ma udito, gha ureru kuna kutu wapayikira uyerere wa naruntje wa unene wa kupira kuvhura kutanta. ¹⁸ Atwe kapi tuna tamba vininke ovyo vina kumoneko weno, atwe kwa tamba vininke vya kupira kumoneka. Mukondashi vininke vya kumoneka kapi ngavi karerera po, vya kupira kumoneka ngavi karerera po naruntje na nuruntje.