¹ Atwe shimpe tu tameke nka ku kunene pitira viruwana vyetu na umwetu ndi? Ndi atwe tuna hepa kutjanga ntjangwa tumwa di tunde ku kwetu ndi ditunde kukwenu mposhi mutantere va unyenu vya kuhamena viruwana vyetu, vino mbyo muna hepa ndi? ² Anwe ko na umwenu anwe ntjangwa tumwa detu da mu udjuni da viruwana vyetu, odo va tjanga mudi mutjima detu, mbyo vavi yiva na vantje, ntani yayo kuyi varura na vantje. ³ Mwayiva nawa-nawa ashi anwe ne ntjanwa tumwa oyo ya tundo kwa Kristus, oyo ya pitiro mu mwetu. Yayo kapi va yi tjanga na shitjangito sha inka nane ngoli na Mpepo ya Karunga wa monyo. Ntani nka yayo kapi vayi tjanga pa shitafura sha liwe, nane ngoli kwayi tjanga mudi mutjima da vantu. ⁴ Atwe vino kuvi ghamba na lihuguvaro lya linene mukonda shi atwe twa huguvara Karunga morwa Kristus. ⁵ Atwe kapi twa kara na ukonentu wa kuruwana vino viruwana vitunde mumwetu ashi vitompoke. Nane ngoli, ukonentu wetu wavino viruwana kwa tunda kwa Karunga. ⁶ Karunga ndje atuturo mushiruwana tu kare vakareli vendi mu likukwatakano lyendi lya lipe. Lino likukwatakano lya lipe kapi lya tunda kuveta oyi vatjanga nane ngoli kwa tunda mu Mpepo. Mukonda shi veta oyo vatjanga yayo kudipaya, ano ngoli Mpepo kutapa monyo wa liparu. ⁷ Veta kwa yita mfa - yayo kwayi tjanga pa vitafura vya liwe - mposhi yitape uyerere wa Karunga kwa Moses akare mu uyerere mpo ashi va Israeli kapishi va wape kukenga kushipara shendi. Mukonda shi uyerere oghu wa kaliro kushipara shendi, kapishi uyerere wa ku karerera po, nga utundapo. ⁸ Likukwatakano olyo yayitapo Mpepo ngali runduruka lipitakane po pavino? ⁹ Nkene shi viruwana vya veta oyo ya pangura ngo vantu kwa kara na uyerere wa weno, ku tanta shi uyerere wa viruwana vya Mpepo oyo ya tapango shiruwana sha uhungami ku vantu vakare vana hungama kwa Karunga wa urunduruka wa pitakana unene? ¹⁰ Mpo ngoli shi, uyerere oghu wa hoviro kukara ko nkeneshi ku ushetakanita na uno wa ntantani na kukuyenda shi, uyerere wa ntantani wa pitakana ntani unene unene. ¹¹ Nkeneshi ovyo vya shayopo kwa kalire na uyerere, vino vya kukarerera po vyavyo kwa kara na uyerere wa unene unene? ¹² Mukonda shi atwe tuna kara na lihuguvaro lya linene, mbyo tuna kughambera na upampi wa unene. ¹³ Atwe kapi twa fana yira Moses, ogho fikiro shipara shendi mpo ashi va Israeli kapishi va mone uyerere omo una kudongonoka po. ¹⁴ Maghayaro gha vantu gha kukuta gha kumanga. Dogoro mpopano, nkene ava varura veta da mu Testamente ya kuhova, shimpe nda vakarera na kawiwiri pantjo. ¹⁵ Mantjo ghavo kapi apahukire, dogoro opo ayire Kristus ndje aya pahuliro mantjo ghavo va tameke kumona. Nampili weno na muntji, nkene kuna kuvarura veta da Moses, dimutjima davo kukara yira kuna difikiliri. ¹⁶ Ano ngoli nkene shi muntu akushiura avyuke kwa Hompa, ntani ana kumanguruka avhure kupahuka amone. ¹⁷ Weno Hompa kuna kara pa Mpepo. Kehe kuno yina kara Mpepo ya Hompa, nko kuna karo limanguruko. ¹⁸ Weno na tuvantje, tuna pahuka kuna kumona, uyerere wa Hompa. Atwe weno tuna kutjindji tuna fana shishwi sha Hompa sha tunda uyerere yenda uyerere, Mpepo ya kupongoka ndjo yina tutura tukufane na Hompa.