¹ Weno kuna tokora na umwande ashi ruyendo rwande rwa uviri kapi nashana kuya nganu ya mupe udito. ² Nkene nganu muyitira liguvo, are umwe ogho ngaya vhuro kuya ntambura na ruhafo, nkeneshi kapishi mbovo vantu na yitiri liguvo. ³ Ame mbyo naku tjangera yino ntjangwa tumwa ashi ame kapi na shana kuya nganuya kare muliguvo nane ngatuya kare kumwe na ruhafo. Ame na kara na lihuguvaro ashi nkene shi anu kara na ruhafo nanwe ngamu kara na ruhafo kumwe na me. ⁴ Ame kwa tjangilire kukwenu ame kuna kara mu ma udito ghamanene, na mpatakani ya mumutjima kumwe na ma runtjodi mu mantjo ghande. Mpo ngoli ashi kapi nashanine kumu yitira ma udito. Nane ngoli, ame kwa shanine kumu neyeda ashi ame kwa kara na shihoro sha shinene unene kukwenu. ⁵ Nkene shi umwe amuyuvita kukora, kapishi ame tupu ana kuyitira kukora, hawe namu vantje - ndi nutante ashi vamwe po tupu - nupire kuya mupakerera. ⁶ Kwa muntu wa weno nkene shi vantu vavangi vana yiva undjoni wendi mpanguro na matengeko ghendi ghana gwana po. ⁷ Weno ntantani mulivhango lya kurenka ashi mumupe matengekero, muna hepa kumu upirapo ntani nka muna hepa kumu shengawida. Muna hepa kuruwana vino mpo ashi kapishi mukare na liguvo lya linene. ⁸ Ame kuna kumu korangeda na ku mupampilikida ashi muna hepa kumu hora unene. ⁹ Yino ndjo konda na tjangere yino ntjangwa tumwa, nu sheteke lipuro lyenu ashi kuvhura mulimburuke mutikitemo navintje ndi. ¹⁰ Kehe uno ngamu upirapo anwe, na me nganu mu upirapo. Nkene ngapa kara kehe shino nganu dongonona po - ame kushi dongonona po - mukonda yenu kushipara sha Kristus. ¹¹ Vino kuvi ruwana mpo ashi Satana kapi shi awane nkondo atu funde. Mukonda shi twayiva maghano ghendi. ¹² Opo na yire mu shitata sha Torowa ashi nuya yuvite Mbudi ya Ruhafo ya Kristus, Hompa kwa gharulire livero nu ruwane shiruwana shendi. Ano ngoli mu mutjima wande kapi mwa kalire mbili mukonda shi kapi naya muwanine mo unyande Titus mu shitata. ¹³ Makura mpo na ya vashuviremo vavo makura anu pitakana ku Makedoniya. ¹⁴ Ano ngoli ame kupandura kehe pano kwa Karunga, agho atu pititirango mwa Kristus kehe pano tu kare va fundi. Ntani Karunga kuvatera tu tware Mbudi ya Kristus ku vantu na vantje yira momu lya yendanga lidumba lya kunuka rupekwa. ¹⁵ Atwe vitutumukita vya lidumba lya liwa vya Kristus vya ku fumadeka Karunga, lyalyo kunukira na vantje ovo ngava kaparuko navo ngava ka djonauko. ¹⁶ Ku vantu ovo ngava ka djonauko, lino lidumba ngali vatwara ku mfa dadi dito. Kwavo ngava kaparuko lino lidumba ngali va twara ku liparu lyaliwa. Are oghu vya wapera vya weno? ¹⁷ Vantu va vangi ku kambadara kehe pano ashi va wane limona lya lingi mukuyuvita nkango da Karunga. Nane ngoli, atwe vatumi va Karunga, atwe kuyuvita Mbudi ya Ruhafo ya Kristus, yira momu ya tunda kwa Karunga, na Karunga ndje mbangi yetu.