¹ Ame, Paulus, kuna kumu kanderera, mulidina lyakupongoka na mbili ya Kristus. Vantu kughamba ashi ame kukudidipita nkene mukatji kenu na kara, ano ngoli nke ure na kara nanwe ame kudi muvyuka. ² Namu kanderere, kapishi ngamu ntininike nganu ya dimuvyuke nkeneshi mponuli mukatji kenu. Mukonda shi ame nayiva nawa-nawa ashi kuvhura nganuya vyuke ovo vaghambango ashi atwe kwa ruwanenanga shihoro shapa marutu. ³ Nampili momu twa kara mu udjuni, kapi twa rwanita nga virwita vya mu udjuni. Virwita vyetu ovyo twa rwanitanga kapi shi yira vya muno mu udjuni. ⁴ Nane ngoli, virwita vya nkondo da Karunga, da ku hanaurangopo ma urunde gha vantu. Na ku djonaura po makanyi ghama dona agho gha renkitango vantu va pire kuyiva Karunga. ⁵ Atwe kuhanaurapo ndunge nadintje daku kutumba odo daku limbo na ndunge da Karunga. Atwe kukondjita turwanite maghano gha vantu tughatjindje ghavhure kulimburuka ku nkango da Kristus. ⁶ Pa kutanga anwe kare va limburuki kwa Karunga, ntani ngamu vhura ku kara nankondo da kutengeka kehe uno wa kupira kulimburuka. ⁷ Anwe karenu na lirwameno lyavi vyakumeho. Ano ngoli nkene shi pwali umwe ogho aku huguvaro mwene ashi ghuye kwahama kwa Kristus, mutanterenu naye aviyive ashi natwe kwa hama kwa kristus nawa-nawa yira momu ahamako uye. ⁸ Nampili nukufumadeke unene ku nkondo odo atapa kukwande Hompa, ame na ku kuyuvha shi ntjoni, mukonda shi Hompa kwadi tupa tumu pameke kapishi tumu djonaure po. ⁹ Ame kapi nashana muvikenge ashi ame kuna kumutjilita na ntjangwa tumwa dande. ¹⁰ Vamwe kughamba ashi, "Ntjangwa tumwa da Paulus dikukutu unene ntani dado didito da kara na nkondo unene, ano ngoli uye muntu ko mwene mu pira nkondo. ntani nkango dendi navi mweshi da tanta." ¹¹ Vantu ovo vaghambango vya weno vayive tupu ashi kapi pakara likushuvo pankango detu odo twa tjanganga mu ntjangwa tumwa detu kumwe na viruwana vyetu ovyo twa ruwana nanga nkene shi mpo tuna kara na umwetu. ¹² Atwe kapi twa kara ndi kapi twa fana yira vantu ovo va kukupandayikira ngo unene wavo vavene. Ogho ugova ogho vakara nagho wa kukushetakanita vene-na-veve, kwato mutompo. ¹³ Ano ngoli, atwe, kapi twaku fumadekanga ashi dogoro tupitakanite. Nane ngoli, Atwe kukupandayika kutwara mu shiruwana shetu yira momu ashitapa Karunga ku kwetu, dogoro na ku kwenu anwe vaKorinte. ¹⁴ Atwe twa hoviro kuya kukwenu tuya muyuvitire Mbudi ya Ruhafo ya Kristus. Atwe kapi tuna shana kupitakanita pa marudi ogho vatapa kukwetu. ¹⁵ Atwe kapi twa kufumadekeranga viruwana vya vantu peke tupitakanite pa marudi ogho vatapa kukwetu. Nane ngoli, atwe twahuguvara ashi nkene ngali kura lipuro lyenu, atwe ngatu vhura kuruwana viruwana vyavinene vya kupitakana pavino mukatji kenu. ¹⁶ Atwe kuna shana, ngatu tware Mbudi ya Rufafo mu virongo vya peke vya musheli munya ya vaKorinte. Atwe kapi tuna shana kukupandayikira viruwa vya va unyetu ovyo varuwana kare muvirongo vya peke. ¹⁷ Yira momu tupu vatjanga ashi, "Kehe uno ana shano kukufumadeka, aku fumadekere mwavi vya Hompa." ¹⁸ Kuvhura ukufumadekera viruwana vyana umoye ano ngoli kapi vakutoghorora. Nane ngoli, ndjegho atoghorora Hompa, ndje va fumadeka muviruwana vyendi.