¹ Ame kuna shana ashi ndi mukudidimike name ku nkango dande da ugova. Kudidimikirenu tupu name kamadidi! Ame kuna kurwa lifupa kukwenu. ² Ame kuna kurwa lifupa lya mwene Karunga kukwenu, mukonda shi ame kwamu vandekera murume umwetupu. Mbyo namu toghorora nwe nganu mu tape kwa Kristus yira mukadona wa mu kushuki. ³ Ano ngoli ame na kara naghoma ashi, kuvhura limu konge liyoka yira momu lya kongire Eva nama mundunge-ndunge ghalyo ghama dona, pamwe maghano ghenu nagho kuvhura vagha djonaure mushuve uhungami na ukushuki wa Kristus. ⁴ Mukonda shi kuvhura ngaye muntu umwe ngaya muyuvitire Jesus naye peke, kapi shi ndjeghu twa muyuvitira atwe. Ndi ngava mupe mu tambure mpepo peke kapishi yira ndjoyi mwawana kukwetu. Ndi ngamu tambure mbudi peke ya kupira kukufana nayi mwawana kukwetu. Makura ngamu vitambure na lididimiko. ⁵ Amen kwato viruwana vya ghu Apostoli ovyo vya mvhuro po kuruwana nampili ku viruwana vya va Apostoli vavanene. ⁶ Nampili momu na pira kuyiva kughamba nawa-nawa, ano ngoli ame na kara na ukonentu wa unene. Vino atwe twavi muneyeda munkedi nadintje namu vininke navintje. ⁷ Ame kwa djona kwavyo na kudidipita mposhi anwe munene pe ndi? Ame kwamu yuvitira Mbudi ya Ruhafo ya Karunga kukwenu maghoko-woko. ⁸ Ame kwa djonine ngoli muku upa vitapa ku mbungakriste dakuku shuva-shuva nuya tape mbatero kukwenu ndi. ⁹ Opo nayire kukwenu naya hepire vihepwa vya ngandi, ano ngoli kapi na shanine numupe mudiwo. Vihepwa vyande kwavi wanine kuva unyande va ovo vatundiro kuMakedoniya mbo vampiri mbatero. Ame kapi na shanine numupe mudiwo, nampili ndi kumeho oko tuna tamba kapi navi shana. ¹⁰ Ushili, mu ushili wa Karunga na kughana ashi, ame kukunenepitira mushiruwana shande ashi kwato kehe uno wa mushirongo sha mu Gereka ogho nga vhuro ku ghamba ashi kapishi nukunenepitire mu mushiruwana shande. ¹¹ Mukonda munke na kughambera vino? Mukonda shi kapi namuhora ndi? Karunga mwene ndje aviyivo ashi ame na muhora unene. ¹² Ame nganu twikira kuruwana vino viruwana, mposhi ngavi va limbe ovo va Apostoli vamwe vakufumadeko ntani navo vaghambango ashi vavo kuruwana viruwana vya kufana yira mbyovyo twa ruwananga. ¹³ Mukonda shi vantu va weno va Apostoli va vipempa ntani vavo varuwani vakukukitaukira. Vavo kwaku kitaukira vakuture mughu Apostoli wa Kristus. ¹⁴ Vino kapishi vimu teture, nampili Satana mwene naye kukutjindja akare yira mu Engeli wa mu ukenu. ¹⁵ Vino kapi shi vimuteture nkene shi vakareli vendi vakutjindje vakupake mu ukareli wa uhungami. ano ngoli uhura wavo ngauka kuyenda navi ruwana vyavo. ¹⁶ Ame kuna kughamba nka ashi: Ame kapi shi munkenge ashi ligova. Nampili nukare ligova, vitamburenu tupu ashi ame ne ligova mposhi name nukufumadekere po shirugho shashifupi. ¹⁷ Kwavino na kughamba vyaku kupandayika - kapishi kwa Hompa vina tundu ashi nuvighambe - Ame kuna kughamba yira ligova. ¹⁸ Yira momu tupu vaku fumadekeranga vantu viruwana vyavo vyapa marutu, name kuna kuku fumadekera vyande. ¹⁹ Anwe vakukotoka muna hepa kuku didimikira na magova. Mukonda shi anwe mwa kara na ukonentu? ²⁰ Anwe kudidi mikirenu ku vantu nampili vamuture mu upika, nampili vamushunune, na mpili vamushekurure, na mpili vamu dininine po, ndi po vamutoghone muvipara. ²¹ Ame kukuyuvha ntjoni nkene anughamba ashi atwe kwa kalire na ghoma wa kuruwana vino. Nkene shi vavo ava kupandayiki - name kuvhura ku viruwana - Ano ngoli ame kuna kugha ashi magova ngo ghaku ruwana vya weno. ²² Nkene shi vavo va Juda? Na me muJuda. Nkene shi vavo va Israeli? Na me mu Israeli. Nkene shi vavo va tekuru va Abrahamu? Na me mutekuru wa Abrahamu. ²³ Nkene shi vavo vakareli va Kristus? (Ame kuna kughamba yira muntu wa kupira ndunge.) Ame na va pitikana na vantje muviruwana vya ukareli. viruwana vyande vya ukareli vinene unene, na va pitikana muku ngena mudorongo rukando rwarungi, na va pitakana omo vantoghona unene na ngora rukando rwarungi, ame kwa gwanekera na viponga vya mfa rukando rwarungi. ²⁴ Kuva Juda kwa ntjepulire rukando rutano "Ngoreka di murongo ntatu na ntano-nane." ²⁵ Rukando rutatu kwa ntoghonine na mburo, rukando rumwe kwa ntoghonine na mawe. Rutatu kwa tjokire mu ruyendo rwa mu shikepa. ²⁶ Rukando rumwe kwa pupire - pupire mu lifuta matiku na mwi. Mu ruyendo rwande rwarungi, kwa kara muviponga vya mu mukuro, viponga vya vakawidi, viponga na vaJuda, viponga vya vapagani, liparu lyande kwa kalire mushiponga muvitata vya kukushuva-shuva, viponga vya mumburundu, viponga vya mulifuta, muviponga na vaApostoli vavimpempa. ²⁷ Ame kwa ruwana unene ntani kwa kara muviponga vya vinene, kapi kanu rararanga matiku naghantje vikando vyavingi, kanu karanga nandjara na linota vikando vyavingi, rukando rwarungi kwa kara pa ndapero da kupira kulya ndya, vikando vyavingi kwa kara mu utenda, ntani kwa kara shintjentja rutu-rutu. ²⁸ Ku upa ko navintje vino, ame kwa kara navinka vya vingi kehe liyuva ku mbungakriste na dintje. ²⁹ Nkene shi va unyande kapi vana kara na nkondo, na me kwato nkondo? Nkene va unyande vana punduka vakugande, ame kugarapa unene na me nukugande, ngoli na kuwa shi. ³⁰ Ame nkene shi nu kufumadeka nkwandi, nu kufumadekere upira nkondo wande. ³¹ Karunga she vashe vaHompa wetu Jesus, ana yiva ashi kapi na ku mukonga, ghuye vamu pande naruntje na naruntje. ³² Opo nakalire mu Damaskusi, lirenga lya Hompa Aretas kwa tantilire vakungi shitata va nomene mavero naghantje gha shitata vakwate Paulusi. ³³ Makura ava mpititiri pa likende nu sheumukire kuli kuma, nuva shenduke nurupuke mu shitata.