¹ Ame kuvhura nuku pandayike, ano ngoli kwato ovyo nganuwa mo. Ano ngoli ame kukupandayikira mamoneko na lishororo olyo lya tundo kwa Hompa. ² Ame kwa yiva murume umwe wa mu kriste - ogho va twalire muliwiru lya utatu weno mwaka murongo na-ne dina kapito po - ame kapi nuyiva ashi uye kwa yendire mo na rutu rwendi ndi, monyo wendi tupu wa yendiro mo, Karunga ndje tupu ana viyivo. ³ Ame na muyiva uno murume - vikare shi kwa yendire mo na rutu rwendi, ndi mpepo yendi tupu ya yendiro mo, ame na kuviyiva shi, Karunga ndje wa ku viyiva - ⁴ ghuye kwa mutwalire mu Paradisa mbyo aka yuvire nkango daku pira kuvhura kutanta, muntu kapi vamupa livhango lya kuvhura kudi ghamba. ⁵ Murume uno ndje na ku kufumadekera. Ame kapi nuku fumadeka na umwande, nkwandi mu upira nkondo wande. ⁶ Nkene shi anu kufumadekere vino, ame kapishi mukonda ya ugova, ame kuna kughamba vya ushili. Ano ngoli kapi na shana ku kupandayika, mposhi kapishi ngava ghambe vya vingi vapitakanite povi vamona navi vayuvha vya kuhamena ku kwande. ⁷ Ame kuna kughamba kwavyo na mona kapi shi kuna ku kunenepita ku mamoneko ghama nene ogho na mona, mbyo va vhukukuma ntonga murutu rwande, mu Engeli wa Satana mbyo atoghona na ngomi - mposhi kapi shi nukutumbe. ⁸ Ame kwa raperera rukando rutatu kwa Hompa kwavino, ashi angupe yino tjutju. ⁹ Ano ngoli Karunga a limburura ashi, "Nkenda yande ndjo una hepa po unene, mbyovo shi nkondo dande kunene pa unene mu upira nkondo ghoye." Makura ame kuku pandayikira mu upira nkondo wande, mposhi nkondo da Kristus divhuke mumwande. ¹⁰ Ame mbyo na hafera mu upira nkondo wande, na matuka, na ma udito, na mahepeko, na matjida-tjido, ntani na ma upyakadi gha mwa Kristus. Mbyovo shi nkene mwato nkondo mu mwande, ntani nu kara na nkondo dadinene. ¹¹ Ame kwa kutumba na umwande mbyo nakara ligova! Anwe mwa ntininiko nuruwane vino, ndi anwe mwa wa pero kupandayika viruwana vyande. Nampili yira momu tupu na kara muntu wa maghooko-ghoko, kwato opo naku shuvira nava apostoli venu vavanene. ¹² Viyivito vya ghu Apostoli wa ushili kwa viruwananga na lididimiko lya linene, na viyivito, na vitetu, ntani na mu viruwana vya nkondo. ¹³ Anwe matungiko gha masheshu tupu ogho mwa pira kuwana kukwande, ogho na tapa mbungakriste na dintje, kapi na hepire mbatero ya vitapa kukwenu? Ngupirenu po kwa uno undjoni wande! ¹⁴ Kengenu! Ame kuna kuya kukwenu rukando rwa utatu. Na mpili weno kapi na shana kuya mupa mudigho, ame kapi na hepa vimaliva vyenu. Ame kuna hepa ko anwe na umwenu. Mukonda shi vanuke kapishi mbo varerango va kurona. Va kurona mbo varera ngo vanuke. ¹⁵ Ku kwande ko ame nganu tapa navintje ovyo na weka naruhafo ntani na na umwande nganuku tapa kukwenu mukonda ya monyo denu. Na mpili momu na muhora nwe unene, anwe karenu tupu na shihoro sha shididi kukwande. ¹⁶ Vi shuvenu vikare ngoli, ame kapi na muyitira udito. Ano ngoli ame kwa kara na ukonentu wa unene, mbyo na mu kwata muvineya vyenu vyavinene. ¹⁷ Mpwali umwe ogho na tuma aye kukwenu ogho aya mushakano limona lyenu ndi? ¹⁸ Ame kwa tumine Titus, kumwe na unyendi umwe va ye kukwenu. Opo ayire Titus aya mushakanine limona lyenu ndi? Ghukaro agho aya kalitire Titus kapi wa kufana na wande ndi? Na me na Titus kapi twa kara mu mpepo na ukaro umwe tupu ndi? ¹⁹ Nkene atu ghamba weno anwe kughayara ashi atwe kuna kukupopera kushipara shenu? Atwe kuna kughambera kushipara sha Karunga, ku mbunga ya Kristus ashi navintje ovino tuna kughamba atwe vya kumunkondopeka. ²⁰ Ame na kara na ghoma ashi pamwe kapi nganuya muwana yira momu naya mushuvire. Ndipo anwe nga mu ya mona yira momu mwa pira kuvishanena. Ame na kara na ghoma ashi kuvhura nganu ya mu wane muna kara na dimutangu, na mfudu, na ndjorongani ya ugara, na makutondororo, na kukurundira, na ushoti, na ndino, ntani na mapiyagano. ²¹ Ame na kara na ghoma ashi nganuya kufa ntjoni opo nganuya kukwenu, kuna kuromba kwa Karunga wande nganuya kudidipite kushipara shenu. Ame kuna kara na ghoma mukonda vantu vavangi kapi vashuva viruwana vyavo vya vidona ovyo ka varuwananga kapi vaku shighura va tunde ku viruwana nya nyata na rushonda na viruwana vya ntjoni ovyo ka varuwananga pa muhovo.