¹ Mukondashi, Kristus kwaya hepire parutu muno mu udjuni, nanwe kuwapayikirenu mukare ngoli muna pama yira momu akalire ghuye. Kehe uno wa kukara mumasheteko kuneyeda ashi ghuye ashayeke kuruwana undjoni. ² Kutantashi, muntu wa weno, ukaro wendi na untje wa pantunda ya livhu, kukarera afumadeke shiruwana sha Hompa, ghuye na kulimburukashi kumadogho ghapa marutu. ³ Anwe mwaruwana shirugho shashire viruwana vya upwagani, anwe kwa kalire vantu varushonda, na madogho, na unkorwi, na makurulya, mwakalire mumbunga da kunwa marovhu, ntani na kukarera vakarunga va vimpempa mwamudona. ⁴ Weno va unyoye ovo wakalire navo vana tetuka ashi mukonda munke wa shayekera kuruwana ukaro wa nkosha-nkoshi na mapiyagano kumwe navo, mbyo vana kukushwaura na kukughamba mwamudona. ⁵ Ano ngoli vavo ngava katapa lilimbururo kwagho akuwapayikiro mukupangura vayumi navafe. ⁶ Mbudi ya Ruhafo kwa yiyuvita kwa navantje na kuvafe mposhi opo ngava kapwa kuva pangura kuviruwana vyavo nama ukaro ghavo vantu navantje, ngava kawane monyo wapa mpepo ngava kakare kumwe na Karunga naruntje na naruntje. ⁷ Ghuhura wavi ninke navintje papepi una kara. Mpongoli shi kudidimikirenu mukare muna kotoka, na kuvangara mukare mu ndapero kehe pano. ⁸ Ghunenepo kwa navintje, karenu na shihoro shashinene ku muntu na unyendi, mukondashi shihoro kudongononapo ndjo dadiyingi unene. ⁹ Anwe tamburenu vagenda mumandi ghenu ntani vayumburenu na kuvatekura nawa mwahana kuvhunguta. ¹⁰ Anwe kehe uno kwa wana ushwi wendi wa mulipuro, ruwanita ushwi ghoye utape mbatero yayiwa kuvantu, mukukuyenda na nkenda ya Karunga yayingi unene. ¹¹ Kehe uno akaro na ushwi wa ukonentu wa kughamba, ayuvite nkango da Karunga. Kehe uno akaro na ushwi wa kutapa mbatero, akona kutapa mbatero na nkondo da kutunda kwa Karunga. Anwe viruwanenu navintje vino mposhi Karunga afumane mwa navintje kupitira mwa Jesus Kristus. Ghuye ndje akaro na lifumano na nkondo da naruntje na naruntje. Amen ¹² Vakwetu vakuhora, kapishi vimuteture ndi vimughupe nkondo mukonda ya mundiro wama sheteko ogho muna kugwanekera nagho, yira kapi mwavi mona vimushorokere rumwe. ¹³ Nane ngoli, anwe karenu na ruhafo rwarunene nkene amugwanekere na masheteko ghamanene yira ngogho amonine Kristus, karenu na ruhafo, ghano masheteko kuna kumu wapayikira ruhafo rwa runene ngamu kapembure naye opo nga shoroka mu uyerere wendi. ¹⁴ Nkene ngava mutuka mukonda ya lidina lya Kristus, anwe vana lirago, vino mbyo viyivito ashi mpepo ya uyerere na mpepo ya Karunga yina sheghumuka yina kara papenu. ¹⁵ Ano ngoli kapishi mukare umwe mukatji kenu ogho vana kuhepeka mukonda ya kudipaya, na widi, na kuruwana urunde ndi mukonda ya kukutura mu nkango da vantu. ¹⁶ Ano ngoli kehe uno wa kuhepera mukonda ya ukriste, kapishi aku yuvhe ntjoni; nane ngoli, ghuye atape mpandu kwa Karunga mukonda ya lidina lya ukriste wendi. ¹⁷ Shino shirugho shakutameka kupangura va mundjugho ya Karunga shina tikimo weno. Nkeneshi mpanguro oyino yina kutamekero kuno kukwetu atwe vahungami kuna fana weno, weni ngayikakara ntani kuni ngayikahulira kwavo vapiro kulimburuka vatambure Mbudi ya Ruhafo, ya Karunga? Matjangwa kwa tanta ashi, ¹⁸ "Nkeneshi va hungami kapi vana kuparuka vashenduke yino mpanguro, vadini Karunga nava ndjoni kuninko oku ngava kapitira vaka yishenduke?" ¹⁹ Ano ngoli kwavo vana kuhepo mukondashi mo avishanena Karunga vatwikire ngoli kuruwana ghuwa ntani vavo vatape monyo davo kwa mushita wavo wa kulimburukwa.